ಒಂದು ಅಡ್ಡರಸ್ತೆಯಿಂದ ಮತ್ತೊಂದು ಅಡ್ಡರಸ್ತೆಗೆ ಸಂಪರ್ಕ ಕಲ್ಪಿಸಬೇಕಿದ್ದ ಗಲ್ಲಿ ರಸ್ತೆಗಳು ಸಂಚಾರ ಬಳಕೆಗೆ ಯೋಗ್ಯವಲ್ಲ ಎನ್ನುವ ಸ್ಥಿತಿ ತಲುಪಿವೆ. ಕುವೆಂಪುನಗರದ ಒಂದನೇ ಅಡ್ಡರಸ್ತೆಯಿಂದ ಎರಡನೇ ಅಡ್ಡರಸ್ತೆಗೆ ಸಂಪರ್ಕ ಕಲ್ಪಿಸುವ ಗಲ್ಲಿ ಹೊರತುಪಡಿಸಿ, ಉಳಿದೆಲ್ಲ ಗಲ್ಲಿರಸ್ತೆಗಳು ಭಾಗಶಃ ಮುಚ್ಚಿದ್ದು, ಸದ್ಯ ತ್ಯಾಜ್ಯ ವಿಲೇವಾರಿಯ ತಾಣಗಳಾಗಿವೆ. ಅದರಲ್ಲೂ ಎರಡನೇ ಅಡ್ಡರಸ್ತೆಯಿಂದ ಮೂರನೇ ಅಡ್ಡರಸ್ತೆಗೆ ಸಂಪರ್ಕ ಕಲ್ಪಿಸುವ ಗಲ್ಲಿಯಂತೂ ಸಂಪೂರ್ಣವಾಗಿ ಕಸದಲ್ಲೇ ಮುಚಿದೆ. ತ್ಯಾಜ್ಯ ತಿನ್ನಲು ಹಂದಿ, ನಾಯಿ, ಬೀಡಾಡಿ ದನಗಳು ಗುಂಪು ಗುಂಪಾಗಿ ಗಲ್ಲಿಯನ್ನು ಅಡ್ಡಾ ಮಾಡಿಕೊಂಡಿವೆ. ಅಲ್ಲದೇ ಕಸದ ಜತೆಗೆ ಗಿಡಗಂಟಿಗಳೂ ಬೆಳೆದಿರುವ ಕಾರಣ ಈ ಮಾರ್ಗಗಳಲ್ಲಿ ಸಂಚಾರ ಅಸಾಧ್ಯವಾಗಿದ್ದು, ಇಲ್ಲಿನ ನಿವಾಸಿಗಳು ನಿತ್ಯ ಕಿರಿಕಿರಿ ಅನುಭವಿಸುವಂತಾಗಿದೆ.
