ಒಂದೇ ಕಡೆ ತಳವೂರಿದ ವಿಎಗಳು

ಜಗನ್ನಾಥ್ ಕಾಳೇನಹಳ್ಳಿ

ತುಮಕೂರು: ಜಿಲ್ಲೆಯ ಆಯಕಟ್ಟಿನ ಜಾಗದಲ್ಲಿ ಗ್ರಾಮ ಆಡಳಿತ ಅಧಿಕಾರಿಗಳು (ವಿಎ) ತಳವೂರಿರುವ ಹಿನ್ನೆಲೆಯಲ್ಲಿ ಕಂದಾಯ ಪಾವತಿ, ಖಾತೆ, ಪಿಂಚಣಿ, ಜನನ-ಮರಣ ಪ್ರಮಾಣ ಪತ್ರ, ಆದಾಯ ಪತ್ರ ಪಡೆಯಲು ಗ್ರಾಮೀಣಭಾಗದಲ್ಲಿ ಜನರು ಪರದಾಡುವಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ.

ಜಿಲ್ಲಾಧಿಕಾರಿ, ಉಪವಿಭಾಗಾಧಿಕಾರಿ, ತಾಲೂಕು ಕಚೇರಿ, ಭೂಮಿ ಕೇಂದ್ರ ಸೇರಿದಂತೆ ಮತ್ತಿತರರ ಆಯಕಟ್ಟಿನ ಜಾಗಗಳಲ್ಲಿ ಬೀಡುಬಿಟ್ಟಿರುವ ವಿಎಗಳು ಕಂದಾಯ ಇಲಾಖೆಯಲ್ಲಿನ ಬ್ರಹ್ಮಾಂಡ ಭ್ರಷ್ಟಾಚಾರದ ಮೂಲವಾಗಿದ್ದಾರೆ ಎನ್ನಲಾಗಿದೆ. ಜಿಲ್ಲೆಯ ಎಲ್ಲಾ 10 ತಾಲೂಕುಗಳಲ್ಲಿ ಗ್ರಾಮ ಆಡಳಿತ ಅಧಿಕಾರಿಗಳನ್ನು (ಗ್ರಾಮ ಲೆಕ್ಕಾಧಿಕಾರಿ) ನಿಯೋಜನೆ ಹೆಸರಲ್ಲಿ ಮೂಲಕರ್ತವ್ಯ ಸ್ಥಳದಿಂದ ಆಯಕಟ್ಟಿನ ಜಾಗಗಳಿಗೆ ಸ್ಥಳಾಂತರಿಸಿರುವುದು ಸಾರ್ವಜನಿಕ ಸಮಸ್ಯೆಗೆ ಕಾರಣವಾಗಿದೆ.

ಹೊಸ ಸಮಸ್ಯೆ ಸೃಷ್ಟಿ: ವಿಎಗಳ ನಿಯೋಜನೆಯೇ ದೊಡ್ಡ ದಂಧೆಯಾಗಿ ಮಾರ್ಪಟ್ಟಿದೆ. ಗ್ರಾಮ ಆಡಳಿತ ಅಧಿಕಾರಿಗಳು ಸಂಬಂಧಪಟ್ಟ ವೃತ್ತಗಳಲ್ಲಿ ಇಲ್ಲದಿರುವುದರಿಂದ ಕಂದಾಯ ಪಾವತಿಗೆ, ಖಾತೆ, ಜನನ-ಮರಣ ಪ್ರಮಾಣ, ಜಾತ್ರಿ, ಆದಾಯ ಪ್ರಮಾಣ ಪತ್ರ ಇನ್ನಿತರೆ ದಾಖಲಾತಿ ಪಡೆಯಲು ಪರುದಾಡುವಂತಾಗಿದೆ. ಸಣ್ಣಪುಟ್ಟ ಕೆಲಸಗಳಿಗು ಹಳ್ಳಿಗಳಿಂದ ವಿಎಗಳನ್ನು ಹುಡುಕುತ್ತಾ ತಾಲೂಕು ಕಚೇರಿಗೆ ಮತ್ತಿತರರ ಕಡೆ ಗ್ರಾಮೀಣಭಾಗದವರು ಪ್ರತಿನಿತ್ಯ ಅಲೆದಾಡುವಂತಾಗಿದೆ.

8-10 ವರ್ಷಗಳಿಂದ ಒಂದೇ ಕಡೆ ತಳವೂರಿರುವರನ್ನು ಏನೇ ಆರೋಪ, ದೂರುಗಳು ಕೇಳಿಬಂದರು ಯಾರೊಬ್ಬರು ಮುಟ್ಟುವಂತಿಲ್ಲ. ಎಲ್ಲ ರೀತಿಯಲ್ಲೂ ಸದೃಢರಾಗಿರುವ ವಿಎಗಳನ್ನು ನಿಯೋಜನೆಗೊಂಡಿರುವ ಸ್ಥಳದಿಂದ ಅಲುಗಾಡಿಸಲು ಆಗುತ್ತಿಲ್ಲ. ಒಂದುವೇಳೆ ವರ್ಗಾವಣೆ ಆದರೂ ಅಕ್ಕಪಕ್ಕದ ಆಯಕಟ್ಟಿನ ಸ್ಥಳಗಳಲ್ಲೇ ಗಿರಕಿ ಹೊಡೆಯುತ್ತಿರುತ್ತಾರೆ. ಪ್ರಭಾವಿಗಳು, ಭ್ರಷ್ಟರಿಗೆ ಯಾವುದೇ ಕಾರಣಕ್ಕೂ ಮೇಲಧಿಕಾರಿಗಳು ಬಿಸಿಮುಟ್ಟಿಸಲು ಸಾಧ್ಯವಾಗುತ್ತಿಲ್ಲ. ಇದರಿಂದ ಭ್ರಷ್ಟಾಚಾರದ ಕೂಪವಾಗಿ ಕಂದಾಯ ಇಲಾಖೆ ಮಾರ್ಪಾಡಾಗಿಬಿಟ್ಟಿದೆ.

ಕಾನೂನುಬಾಹಿರ ಹುದ್ದೆ ಬಡ್ತಿ?!: ಗ್ರಾಮ ಆಡಳಿತ ಅಧಿಕಾರಿಗಳಿಗೆ ಸರ್ಕಾರದ ಆದೇಶವೇ ಇಲ್ಲದಿದ್ದರೂ ಕಾನೂನು ಬಾಹಿರವಾಗಿ ಕಂದಾಯ ನಿರೀಕ್ಷಕ ಹುದ್ದೆಗೆ ಬಡ್ತಿ ನೀಡುತ್ತಿರುವುದು ಕಂಡುಬಂದಿದೆ. ಇದು ಸಾಕಷ್ಟು ಅಕ್ರಮಗಳಿಗೆ ದಾರಿ ಮಾಡಿಕೊಟ್ಟಿದೆ. ಈಗಾಗಲೇ ಇಂತಹ ಬಡ್ತಿ ಪಡೆದಿರುವ ಪ್ರಕ್ರಿಯೆ ಬಗ್ಗೆ ತನಿಖೆ ನಡೆಸಿ ಕ್ರಮ ಕೈಗೊಳ್ಳಬೇಕೆಂಬ ಒತ್ತಾಯವು ಸಹ ಕೇಳಿಬಂದಿದೆ.