ಬೆಂಗಳೂರಿನಿಂದ ಮೈಸೂರಿನವರೆಗೂ ಎಕ್ಸ್ಪ್ರೆಸ್ ಹೈವೇಯಲ್ಲಿ ಒಳ ಹಾಗೂ ಹೊರಹೋಗಲು ಕೇವಲ ತಾಲೂಕು ಕೇಂದ್ರಗಳ ಬಳಿ ಹೈವೇ ಎಂಟ್ರಿ, ಎಕ್ಸಿಟ್ ಅವಕಾಶ ನೀಡಲಾಗಿದೆ. ಹೆದ್ದಾರಿಯ ಪ್ರಯಾಣಿಕರು ಟೀ, ಕಾಫಿ ಹಾಗೂ ತಿಂಡಿಗಾಗಿ ಈ ಎಕ್ಸಿಟ್ ಜಾಗಗಳನ್ನೇ ಅವಲಂಬಿಸುವ ಅನಿವಾರ್ಯತೆ ಇದೆ. ಇದರಿಂದಾಗಿ ಸಹಜವಾಗಿಯೇ ಹೆದ್ದಾರಿಗೆ ಸಂಪರ್ಕ ನೀಡುವ ಜಾಗಗಳ ಬಳಿ ಎರಡೂ ಕಡೆ ಹತ್ತಾರು ಹೋಟೆಲ್ ಹಾಗೂ ಇತರ ಅಂಗಡಿಗಳು ತಲೆಎತ್ತಿವೆ. ಅದರಲ್ಲೂ ತಾಲೂಕಿನ ಬೈರಾಪಟ್ಟಣ ಮತ್ತು ಸಂಕಲಗೆರೆ ಗೇಟ್ ಬಳಿಯ ಸರ್ವೀಸ್ ರಸ್ತೆಯಲ್ಲಿ ಹೆಚ್ಚಿನ ಹೋಟೆಲ್ಗಳು ಆರಂಭವಾಗಿದ್ದು, ಇದರಿಂದ ಈ ಜಾಗದಲ್ಲಿ ಹೈವೇಯಿಂದ ಸರ್ವೀಸ್ ರಸ್ತೆಗೆ ಬರುವ ವಾಹನಗಳ ಸಂಖ್ಯೆಯೂ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ.
