ಜಿಲ್ಲೆಗೆ ಮತ್ತೆರಡು ಗೂಟದ ಕಾರು

ಜಿಲ್ಲೆಯ ಇಬ್ಬರು ಶಾಸಕರಿಗೆ ಸ್ಥಾನ, ಮಾನ ನೀಡಿ, ಸಮಾಧಾನಪಡಿಸುವ ಯತ್ನವನ್ನು ಕಾಂಗ್ರೆಸ್ ಮಾಡಿದೆ. ರಾಜ್ಯದ ಹಿರಿಯ ಶಾಸಕ ಆರ್.ವಿ.ದೇಶಪಾಂಡೆ ಅವರನ್ನು ರಾಜ್ಯ ಆಡಳಿತ ಸುಧಾರಣಾ ಆಯೋಗದ ಅಧ್ಯಕ್ಷರನ್ನಾಗಿ ನೇಮಕ ಮಾಡಲಾಗಿದೆ. ಮಂಕಾಳ ವೈದ್ಯ ಅವರ ಹೆಸರನ್ನು ವಿಧಾಸಭೆ ಉಪ ಸಭಾಪತಿ ಸ್ಥಾನಕ್ಕೆ ಶಿಫಾರಸು ಮಾಡಲಾಗಿದೆ. ಆದರೆ ಎರಡೂ ಹುದ್ದೆಗಳು ಹಲ್ಲಿಲ್ಲದ ಹಾವಿನಂತಿದ್ದು, ಯಾವುದೇ ಆಡಳಿತಾತ್ಮಕ ಪವರ್ ಇಲ್ಲವಾಗಿದೆ.

ರಾಜ್ಯದ ಅತಿ ಹಿರಿಯ ಶಾಸಕ ಆರ್.ವಿ.ದೇಶಪಾಂಡೆ ಸಿದ್ದರಾಮಯ್ಯ ಆಪ್ತರಾಗಿದ್ದಾರೆ. ಅವರ ಅವಧಿಯಲ್ಲಿ ಸಚಿವ ಸ್ಥಾನದ ಪ್ರಬಲ ಆಕಾಂಕ್ಷಿಯಾಗಿದ್ದರು. ಆದರೆ, ಮಂತ್ರಿ ಸ್ಥಾನ ಕೈ ತಪ್ಪಿದ ಕಾರಣ ಅವರಿಗೆ ಆಡಳಿತ ಸುಧಾರಣಾ ಆಯೋಗದ ಅಧ್ಯಕ್ಷ ಸ್ಥಾನ ನೀಡಿ ಸಮಾಧಾನ ಮಾಡಲಾಗಿತ್ತು. ಈಗ ಶಿವಕುಮಾರ್ ಅವಽಯಲ್ಲೂ ಅದೇ ಹುದ್ದೆಯಲ್ಲಿ ಮುಂದುವರಿಸಿ, ಅವರಿಗೆ ಗೂಟದ ಕಾರಿನಲ್ಲಿ ತಿರುಗುವ ನೆಮ್ಮದಿಯನ್ನು ಮಾತ್ರ ಸರ್ಕಾರ ಕಲ್ಪಿಸಿದಂತಿದೆ.

ಮಂಕಾಳ ವೈದ್ಯ ಅವರಿಗೆ ವಿಧಾನಸಭೆ ಡೆಪ್ಯುಟಿ ಸ್ಪೀಕರ್ ಮಾಡಲು ಶಿಫಾರಸು ಮಾಡಲಾಗಿದ್ದು, ಆಗಸ್ಟ್ 14 ರಂದು ವಿಧಾನಸಭೆ ಅಽವೇಶನದಲ್ಲಿ ಚುನಾವಣೆ ನಡೆಯಲಿದೆ. ವಿಧಾನಸಭೆಯಲ್ಲಿ ಕಾಂಗ್ರೆಸ್‌ಗೆ ಬಹುಮತ ಇರುವ ಕಾರಣ ವೈದ್ಯ ಉಪ ಸಭಾಪತಿಯಾಗಿ ಆಯ್ಕೆಯಾಗುವುದು ಖಚಿತವಾಗಿದೆ. ಆದರೆ, ಉಪ ಸಭಾಪತಿ ವೈದ್ಯರ ಆಯ್ಕೆಯಾಗಿರಲಿಲ್ಲ.

ಡಿ.ಕೆ.ಶಿವಕುಮಾರ್ ಅವರ ಸಚಿವ ಸಂಪುಟ ವಿಸ್ತರಣೆಯ ದಿನ ಎಐಸಿಸಿ ನೀಡಿದ ಪಟ್ಟಿಯಲ್ಲಿ ಮಂಕಾಳ ವೈದ್ಯ ಹೆಸರಿತ್ತು. ಆದರೆ, ಕೆಲವೇ ಘಂಟೆಯಲ್ಲಿ ಪಟ್ಟಿ ಬದಲಾಗಿದ್ದು, ಮಂಕಾಳ ವೈದ್ಯ ಹೆಸರನ್ನು ಕಿತ್ತು ದಾವಣಗೆರೆಯ ಎಸ್.ಎಸ್.ಮಲ್ಲಿಕಾರ್ಜುನ ಅವರ ಹೆಸರು ಸೇರಿಸಲಾಗಿತ್ತು. ಆಗ ವೈದ್ಯ ಅವರನ್ನು ತಮ್ಮ ನಿವಾಸಕ್ಕೆ ಕರೆದಿದ್ದ ಸಿಎಂ ಡಿ.ಕೆ.ಶಿವಕುಮಾರ್ ಅವರು ತಮ್ಮ ರಾಜಕೀಯ ಕಾರ್ಯದರ್ಶಿ ಹುದ್ದೆ ನೀಡುವ ಭರವಸೆ ನೀಡಿದ್ದರು. ಆದರೆ, ಆ ಹುದ್ದೆಯೂ ವೈದ್ಯರಿಗೆ ತಪ್ಪಿದೆ. ಎಐಸಿಸಿ ಪಟ್ಟಿಯಲ್ಲಿ ಕೊಡಗು ವಿರಾಜಪೇಟೆ ಶಾಸಕ ಎ.ಎಸ್.ಪೊನ್ನಣ್ಣ ಅವರ ಹೆಸರನ್ನು ಉಪ ಸಭಾಪತಿ ಹುದ್ದೆಗೆ ಸೂಚಿಸಲಾಗಿತ್ತು. ಪೊನ್ನಣ್ಣ ಅದಕ್ಕೆ ಒಪ್ಪದ ಕಾರಣ ಅವರಿಗೆ ಸಿಎಂ ರಾಜಕೀಯ ಕಾರ್ಯದರ್ಶಿ ಹುದ್ದೆ ನೀಡಲಾಗಿದೆ.

ಸದ್ಯ ಕಾರವಾರ ಶಾಸಕ ಸತೀಶ ಸೈಲ್ ಸಂಪುಟ ದರ್ಜೆಯ ಕೆಎಸ್‌ಎಂಸಿಎ ಅಧ್ಯಕ್ಷರಾಗಿದ್ದಾರೆ. ಜಿಲ್ಲೆಗೆ ಇನ್ನೂ ಎರಡು ಗೂಟದ ಕಾರುಗಳು ಬರುವ ಸಾಧ್ಯತೆ ಇದ್ದರೂ ಎರಡೂ ಹಲ್ಲಿಲ್ಲದ ಹಾವುಗಳಂತ ಹುದ್ದೆಗಳಾಗಿವೆ. ಆಡಳಿತ ಸುಧಾರಣಾ ಆಯೋಗದ ಅಧ್ಯಕ್ಷರು ಸರ್ಕಾರಕ್ಕೆ ಸಲಹೆ, ಶಿಫಾರಸುಗಳನ್ನು ನೀಡಬಹುದಾಗಿದೆಯೇ ಹೊರತು, ಯಾವುದೇ ನಿರ್ಣಯ ಕೈಗೊಳ್ಳುವ ಅಽಕಾರ ಹೊಂದಿಲ್ಲ. ಇನ್ನು ಡೆಪ್ಯುಟಿ ಸ್ಪೀಕರ್ ಸಾಂವಿಧಾನಿಕ ಹುದ್ದೆಯಾಗಿದ್ದರೂ ಅದು ಕ್ಯಾಬಿನೇಟ್ ಸಚಿವರ ಸಮಾನ ಹುದ್ದೆಯಲ್ಲ. ರಾಜ್ಯ ಸಚಿವ ಸ್ಥಾನಕ್ಕೆ ಸಮನಾದ ಹುದ್ದೆಯಾಗಿದೆ. ಮತ್ತು ವಿಧಾನಸಭೆಯ ಕಲಾಪಗಳಿಗೆ ಸೀಮಿತವಾಗಿದೆ.

ಆಗಸ್ಟ್ 15 ರ ಸ್ವಾತಂತ್ರ್ಯೋತ್ಸವದಂದು ಜಿಲ್ಲಾಡಳಿತ ಆಯೋಜಿಸುವ ಕಾರ್ಯಕ್ರಮದಲ್ಲಿ ಧ್ವಜಾರೋಹಣ ಮಾಡಲು ಸಹಕಾರ ಸಚಿವ ಲಕ್ಷ÷್ಮಣ ಸವದಿ ಅವರನ್ನು ನಿಯೋಜಿಸಲಾಗಿದೆ. ಜಿಲ್ಲಾ ಉಸ್ತುವಾರಿ ಸಚಿವರಾದವರು ಧ್ವಜಾರೋಹಣ ಮಾಡುವ ಪರಿಪಾಠವಿದೆ. ಆದರೆ, ಇದುವರೆಗೂ ಅಧಿಕೃತವಾಗಿ ಜಿಲ್ಲಾ ಉಸ್ತುವಾರಿ ಸಚಿವರ ನೇಮಕವಾಗದ ಕಾರಣ ಸವದಿ ಅವರಿಗೆ ಪ್ರಭಾರ ವಹಿಸಿ ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಆದೇಶಿಸಿದ್ದಾರೆ.