ಎರಡು ವರ್ಷಗಳ ನಂತರ ಮಣ್ಣು ತೆರವಿನ ಕಾರ್ಯಕ್ಕೆ ಚಾಲನೆ

ಕಾರವಾರ: ಅಂಕೋಲಾ ತಾಲೂಕಿನ ಶಿರೂರು ಗ್ರಾಮದಲ್ಲಿ ಬಾರಿ ಭೂಕುಸಿತದಿಂದ ಗಂಗಾವಳಿ ನದಿಯಲ್ಲಿ

ಬಿದ್ದ ಮಣ್ಣಿನ ರಾಶಿಯನ್ನು ರೂ.434 ಲಕ್ಷ ವೆಚ್ಚದಲ್ಲಿ ತೆರವುಗೊಳಿಸುವ ಕಾಮಗಾರಿಗೆ ಕೆ.ಎಂ.ಸಿ.ಎ ಅಧ್ಯಕ್ಷ ಹಾಗೂ ಶಾಸಕ ಸತೀಶ ಕೆ ಸೈಲ್ ಗುರುವಾರ ಚಾಲನೆ ನೀಡಿದರು.

ನಂತರ ಮಾತನಾಡಿದ ಅವರು, ಪಕ್ಕದ ಉಳುವರೆ ಗ್ರಾಮ ಮತ್ತು ರಾಷ್ರೀಯ ಹೆದ್ದಾರಿಗೆ ಸಮಸ್ಯೆ ಯಾಗದ ರೀತಿಯಲ್ಲಿ ನದಿಯಲ್ಲಿರುವ ಮಣ್ಣಿನ ಕೃತಕ ದಿಬ್ಬನ್ನು ತೆರವು ಗೊಳಿಸಲು ಈ ಹಿಂದೆ ಜಿಲ್ಲಾಧಿಕಾರಿಗಳ ಮೂಲಕ ಪ್ರಸ್ತಾವನೆ ಸಲ್ಲಿಸಿದಾಗ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದಿಂದ 2ಕೋಟಿ ಅನುದಾನ ಬಿಡುಗಡೆ ಮಾಡಲಾಗಿತ್ತು. ಈ ಮೊತ್ತಕ್ಕೆ 4 ಬಾರಿ ಟೆಂಡರ್ ಕರೆದರೂ ಯಾರು ಭಾಗವಹಿಸಿರಲಿಲ್ಲ. ನದಿಯ ಆಳ ಮತ್ತು ಮಣ್ಣು ಎಷ್ಟು ಶೇಖರವಾಗಿದೆ ಎಂಬುದನ್ನು ತಿಳಿಯಲು ಹೈಡ್ರೋಗ್ರಾಫಿ ಸರ್ವೆ ಮಾಡದ ಹೊರತು ಸಮಸ್ಯೆ ಬಗೆ ಹರಿಸಲು ಸಾಧ್ಯವಿಲ್ಲ ಎಂದು ತಿಳಿದು ಮುಖ್ಯಮಂತ್ರಿ ಹಾಗೂ ಉಪ ಮುಖ್ಯಮಂತ್ರಿ ಹತ್ತಿರ ಮಾತನಾಡಿ ಮತ್ತೆ 2.34 ಕೋಟಿ ಅನುದಾನ ಬಿಡುಗಡೆ ಮಾಡಿಸಿ ಒಟ್ಟು 434 ಲಕ್ಷ ವೆಚ್ಚದ ಕಾಮಗಾರಿಗೆ 4ಜಿ ವಿನಾಯತಿ ಪಡೆದು ಅಬಿಷೇಯಾ ಒಶಿಯನ್ ಸರ್ವಿಸ್ ಕಂಪನಿಗೆ ನೀಡಲಾಗಿದೆ ಎಂದರು.

ಶಿರೂರು ದುರಂತದಲ್ಲಿ 11 ಜನರು ಮರಣ ಹೊಂದಿದ್ದು, ಆ ಸಂದರ್ಭದಲ್ಲಿ ಅಧಿಕಾರಿ ಸಿಬ್ಬಂದಿಗಳು, ಎನ್.ಡಿ.ಆರ್.ಎಫ್ ಮತ್ತು ಎಸ್.ಡಿ.ಆರ್.ಎಫ್ ನೌಕಾದಳದ ಸಿಬ್ಬಂದಿಗಳು ಹಾಗೂ ಸ್ಥಳೀಯ ಮೀನುಗಾರ ಸಹಕಾರದಿಂದ ಸತತ 72 ದಿನಗಳ ಕಾರ್ಯಾಚರಣೆ ಬಳಿಕ ಕೇರಳದ ಅರ್ಜುನನ ಮೃತದೇಹ ದೊರೆಯಿತು. ಆದರೆ ಸ್ಥಳೀಯ ಇಬ್ಬರ ಮೃತದೇಹ ಸಿಗಲಿಲ್ಲ ಆ ನೋವು ಇನ್ನೂ ಇದೆ ಎಂದರು.

ಜನರಿಂದ ಆಯ್ಕೆಯಾದ ಜನಪ್ರತಿನಿಧಿಗೆ ಜನರ ನೋವಿನ ಬಗ್ಗೆ ಅರಿವು ಇರಬೇಕು. ಜನರಿಗೊಸ್ಕರ ಕೆಲಸ ಮಾಡಿದ ನಂತರ ನಿಂದನೆ ಮಾಡದೆ ಪ್ರಶಂಸೆಯನ್ನು ಮಾಡಬೇಕು. ಕ್ಷೇತ್ರದ ಜನ ನನಗೆ ಜನ ಸೇವೆ ಮಾಡಲು ಅವಕಾಶ ಕಲ್ಪಿಸಿದ್ದು, ಮುಂದಿನ 2 ವರ್ಷದಲ್ಲಿ ಕ್ಷೇತ್ರದಲ್ಲಿ ಸಾಕಷ್ಟು ಅಭಿವೃದ್ಧಿ ಕಾರ್ಯ ಮಾಡಲಾಗುವುದು ಎಂದರು.

ಈ ಸಂದರ್ಭದಲ್ಲಿ ಜಿಲ್ಲಾ ಗ್ಯಾರಂಟಿ ಅನುಷ್ಠಾನ ಪ್ರಾಧಿಕಾರದ ಉಪಾಧ್ಯಕ್ಷ ಪುರುಷೋತ್ತಮ ನಾಯ್ಕ, ತಾಲೂಕು ಅಧ್ಯಕ್ಷ ಪಾಂಡುರಂಗ ಗೌಡ, ತಹಶೀಲ್ದಾರ್ ನಿಶ್ಚಲ್ ನರೋನ್ಹಾ, ತಾಲೂಕು ಪಂಚಾಯತ್ ರಾಮು ಗುನಗಿ, ಬಂದರು ಇಲಾಖೆಯ ಕಾರ್ಯನಿರ್ವಾಹಕ ಅಭಿಯಂತರ ರಾಥೋಡ್, ಸಹಾಯಕ ಕಾರ್ಯನಿರ್ವಾಹಕ ಅಭಿಯಂತರ್ ರಾಜಕುಮಾರ್ ಮತ್ತಿತರರು ಇದ್ದರು.