ಬಂಡೆ ಕುಸಿದು ಶಾಲಾ ಕೊಠಡಿಗೆ ಹಾನಿ Hevy Rain

ಕುಮಟಾ: ಕಳೆದ 24 ಗಂಟೆಗಳಿಂದ ತಾಲೂಕಿನಾದ್ಯಂತ ಜೋರಾದ ಗಾಳಿ ಮಳೆ (Hevy Rain) ಸುರಿದು ತಂಪೆರೆದರೂ ಒಂದಷ್ಟು ಹಾನಿಯನ್ನು ಉಂಟು ಮಾಡಿದೆ.

ಪಟ್ಟಣದ ನೆಲ್ಲಿಕೇರಿಯ ಕರ್ನಾಟಕ ಪಬ್ಲಿಕ್ ಸ್ಕೂಲ್‌ನ ತರಗತಿ ಕೊಠಡಿಯೊಂದರ ಹಿಂಭಾಗದ ದರೆಯ ಎರಡು ದೊಡ್ಡ ಬಂಡೆಗಳು ಕಳಚಿಕೊಂಡು ಬಿದ್ದಿವೆೆ.

ದರೆಯ ಬಂಡೆಗಳು ಬೀಳುವ ಮುನ್ಸೂಚನೆ ಇದ್ದುದ್ದರಿಂದ ಅಲ್ಲಿನ ತರಗತಿಗಳಿಂದ ಮೊದಲೇ ವಿದ್ಯಾರ್ಥಿಗಳನ್ನು ಸ್ಥಳಾಂತರಿಸಲಾಗಿತ್ತು.

ಕೂಡಲೇ ಕಾಯಾಚರಣೆ ನಡೆಸಿ ಯಂತ್ರಗಳ ಸಹಾಯದಿಂದ ಬಂಡೆಗಳನ್ನು ತೆರವುಗೊಳಿಸಲಾಗಿದೆ.

ವಾಲಗಳ್ಳಿಯ ಹಾರೋಡಿ ಕ್ರಾಸ್ ಬಳಿ ಕುಮಟಾ-ಸಿದ್ದಾಪುರ ಹೆದ್ದಾರಿಯಲ್ಲಿ ಎಂದಿನಂತೆ ಈ ಬಾರಿಯೂ ಜೋರಾದ ಮಳೆಗೆ ಜಲಾವೃತವಾಗಿದ್ದು, ಪದೇ ಪದೆ ನೀರಿನ ಮಟ್ಟ ಅತಿಯಾಗುತ್ತ ವಾಹನ ಸಂಚಾರಕ್ಕೆ ಅಡ್ಡಿಯಾಗಿದೆ.

ಪಟ್ಟಣದ ಚಿತ್ರಗಿಯ ಕಲ್ಗುಡ್ಡದ ಬಯಲಿನ ನಿವಾಸಿಗಳಿಗೆ ಮಳೆನೀರು ರಸ್ತೆಯ ಮೇಲೆ ತುಂಬಿ ಹರಿದು ಕೊರಕಲುಗಳಾಗಿ ದಿನನಿತ್ಯದ ಸಂಚಾರಕ್ಕೆ ಸಮಸ್ಯೆ ಎದುರಿಸುವಂತಾಗಿದೆ.

ಗುರುವಾರ ಸಾಯಂಕಾಲದಿಂದ ಎಡಬಿಡದೇ ಸುರಿದ ಮಳೆ ಶುಕ್ರವಾರ ಮಧ್ಯಾಹ್ನದ ಬಳಿಕ ಸ್ವಲ್ಪ ಬಿಡುವು ನೀಡಿತ್ತು.