ವಾರದಲ್ಲಿ ಕೆಲಸ ಆರಂಭಿಸದಿದ್ದರೆ ‘ರಸ್ತೆ’ ಬಂದ್ Road closure

ಕುಮಟಾ ತಾಪಂ ಸಭಾಭವನದಲ್ಲಿ ಶಾಸಕ ದಿನಕರ ಶೆಟ್ಟಿ ಅಧ್ಯಕ್ಷತೆಯಲ್ಲಿ ಕೆಡಿಪಿ ಸಭೆ ನಡೆಯಿತು. ಇಒ ರಾಜೇಂದ್ರ ಭಟ್, ಆಡಳಿತಾಧಿಕಾರಿ ಪ್ರಕಾಶ ಹಾಲಮ್ಮನವರ, ತಹಸೀಲ್ದಾರ್ ಶ್ರೀಕೃಷ್ಣ ಕಾಮಕರ ಇದ್ದರು.

Published on:

08 Jan 2026, 9:59 am

ಪ್ರಮುಖ ಮುಖ್ಯಾಂಶಗಳು

ಸಾಮಾನ್ಯ ಸಭೆಯಲ್ಲಿ ತಾಪಂ ಮಾಜಿ ಅಧ್ಯಕ್ಷ ಬೆಳ್ಳೆಯ ಜಿ.ಜಿ. ಹೆಗಡೆ ಗುಡುಗು

ಕುಮಟಾ: ಕುಮಟಾ-ಶಿರಸಿ ರಾಷ್ಟ್ರೀಯ ಹೆದ್ದಾರಿ ಕಾಮಗಾರಿ ಇನ್ನೂ ಪೂರ್ಣಗೊಂಡಿಲ್ಲ. ರಾ.ಹೆ. ಮುಖ್ಯ ರಸ್ತೆಯಿಂದ ಕವಲು ರಸ್ತೆಗಳಿರುವಲ್ಲಿ ಸಮರ್ಪಕ ಕಾಮಗಾರಿ ಇಲ್ಲ. ಒಂದು ವಾರದೊಳಗಾಗಿ ನಮ್ಮ ಏರಿಯಾದಲ್ಲಿ ಕೆಲಸ ಆರಂಭಿಸದಿದ್ದಲ್ಲಿ ರಸ್ತೆ ಬಂದ್ Road closure ಮಾಡಿ ಹೋರಾಡಬೇಕಾಗುತ್ತದೆ. ಬೇಕಾದರೆ ನನ್ನನ್ನು ಜೈಲಿಗೆ ಹಾಕಿ ಎಂದು ತಾಪಂ ಮಾಜಿ ಅಧ್ಯಕ್ಷ ಬೆಳ್ಳೆಯ ಜಿ.ಜಿ. ಹೆಗಡೆ ಗುಡುಗಿದರು.

ತಾಪಂ ಸಭಾಭವನದಲ್ಲಿ ಶಾಸಕರ ಅಧ್ಯಕ್ಷತೆಯಲ್ಲಿ ಮಂಗಳವಾರ ಹಮ್ಮಿಕೊಂಡಿದ್ದ ಕೆಡಿಪಿ ಸಭೆಯಲ್ಲಿ ಅವರು ಮಾತನಾಡಿದರು.

ಕುಮಟಾ-ಶಿರಸಿ ರಾಷ್ಟ್ರೀಯ ಹೆದ್ದಾರಿಯಿಂದ ಜಿಲ್ಲಾ ಮುಖ್ಯರಸ್ತೆ ಹಾಗೂ ಇತರ ಗ್ರಾಮೀಣ ರಸ್ತೆಗಳಿಗೆ ಅಪ್ರೋಚ್ ಸರಿಪಡಿಸುವುದು ರಾ.ಹೆ. ಪ್ರಾಧಿಕಾರ, ಗುತ್ತಿಗೆ ಪಡೆದ ಆರ್.ಎನ್.ಎಸ್ ಕಂಪನಿ ಅಥವಾ ಪಿಡಬ್ಲ್ಯುಡಿ ಇವರಲ್ಲಿ ಯಾರ ಜವಾಬ್ದಾರಿ ಎಂದು ಜಿ.ಜಿ. ಹೆಗಡೆ ಪ್ರಶ್ನಿಸಿದರು.

ಕಾಮಗಾರಿಯ ಆಮೆಗತಿಗೆ ಸಭೆಯಲ್ಲಿ ಅಸಮಾಧಾನ ವ್ಯಕ್ತವಾಯಿತು. ಆಗ ಆರ್.ಎನ್.ಎಸ್ ಎಂಡಿ ನಿತೀಶ್ ಶೆಟ್ಟಿ ಅವರಿಗೆ ಕೂಡಲೇ ರಸ್ತೆ ಕಾಮಗಾರಿ ಪೂರೈಸಲು ಶಾಸಕರು ಸೂಚಿಸಿದರು. ಮುಂದಿನ ಶುಕ್ರವಾರ ಕಾಮಗಾರಿ ಆರಂಭಿಸುವುದಾಗಿ ನಿತೀಶ ಶೆಟ್ಟಿ ಭರವಸೆ ನೀಡಿದರು.

ತಾಲೂಕಾಸ್ಪತ್ರೆ ಆಡಳಿತ ವೈದ್ಯಾಧಿಕಾರಿ ಡಾ. ಗಣೇಶ ನಾಯ್ಕ, ಆಸ್ಪತ್ರೆಯಲ್ಲಿ ಕಳೆದ ತಿಂಗಳು 150ಕ್ಕೂ ಹೆಚ್ಚು ಮಂದಿ ನಾಯಿ ಕಡಿತಕ್ಕೆ ಚಿಕಿತ್ಸೆ ಪಡೆದಿದ್ದಾರೆ. ಹೆಚ್ಚುತ್ತಿರುವ ನಾಯಿ ಕಡಿತದ ಪ್ರಕರಣಗಳು ಕಳವಳಕಾರಿ ಎಂದರು.

ಶಾಸಕ ದಿನಕರ ಶೆಟ್ಟಿ ಪ್ರತಿಕ್ರಿಯಿಸಿ ಡಯಾಲಿಸಿಸ್ ಪ್ರಕರಣಗಳು ಹೆಚ್ಚುತ್ತಿರುವ ಬಗ್ಗೆ ಸೂಕ್ತ ಅಧ್ಯಯನವಾಗಲಿ. ಸಾರ್ವಜನಿಕರೊಂದಿಗೆ ಸೌಜನ್ಯಯುತ ವರ್ತಿಸದ ಆಸ್ಪತ್ರೆಯ ವೈದ್ಯಕೀಯ ಸಿಬ್ಬಂದಿ ಸಂಬಳ ತಡೆದು ಕೊಡಿ ಎಂದರು.

ಕಳೆದ ಕೆಡಿಪಿಯಲ್ಲಿ ಈ ಭಾಗದಲ್ಲಿ ಕ್ಯಾನ್ಸರ್ ಪ್ರಕರಣ ಹೆಚ್ಚುತ್ತಿರುವ ಬಗ್ಗೆ ವರದಿ ಕೇಳಿದ್ದು ಇನ್ನೂ ಬಂದಿಲ್ಲ. ಹಿಂದಿನ ಸಭೆಯ ನಡಾವಳಿ ಕಡೆಗಣಿಸದಿರಿ ಎಂದು ಕೆಡಿಪಿ ಸದಸ್ಯರಾದ ಭುವನ್ ಭಾಗ್ವತ್, ಧೀರು ಶಾನಭಾಗ ಕೇಳಿದರು.

ಎಆರ್‌ಟಿಇ ರವೀಂದ್ರ ಮಾತನಾಡಿ, ಚಿತ್ರದುರ್ಗದಲ್ಲಿ ಬಸ್‌ಗೆ ಬೆಂಕಿ ದುರಂತದ ಬಗ್ಗೆ ಚರ್ಚೆ ನಡೆದು ಬಸ್‌ಗಳಲ್ಲಿ ಹಿಂದೆ ಎಮರ್ಜೆನ್ಸಿ ಡೋರ್ ಹಾಗೂ ತುರ್ತು ಪರಿಸ್ಥಿತಿಯಲ್ಲಿ ಒಡೆಯುವಂತಹ ಗ್ಲಾಸ್ ಅಳವಡಿಸುವ ಬಗ್ಗೆ ಸೂಕ್ತ ಕ್ರಮವಹಿಸಲು ಈಗಾಗಲೇ ಸರ್ಕಾರದಿಂದ ಮಾರ್ಗದರ್ಶಿ ಸೂತ್ರ ಬಂದಿದೆ ಎಂದರು.

ಶೂ ಸಾಕ್ಸ್ ಅನುದಾನವನ್ನು ಅನುದಾನಿತ ಶಾಲೆಗಳಿಗೆ ಇನ್ನೂ ತನಕ ನೀಡದ ಬಗ್ಗೆ ವಿಧಾನಸಭೆಯಲ್ಲಿ ಶಾಸಕರು ಮಾತನಾಡಬೇಕು ಎಂದು ಧೀರು ಶಾನಭಾಗ ಹೇಳಿದರು.

ಕೋಡ್ಕಣಿ ಶಾಲೆಯಲ್ಲಿ 1-7 ತರಗತಿಗಳಲ್ಲಿ ಒಟ್ಟೂ 130 ವಿದ್ಯಾರ್ಥಿಗಳಿದ್ದು, 125 ವರ್ಷದ ಹಳೆಯ ಕಟ್ಟಡವಾಗಿದೆ. ಹೊಸ ಕಟ್ಟಡ ಮಂಜೂರಿಗೆ ನಾಗರಾಜ ನಾಯ್ಕ ವಿನಂತಿಸಿದರು.

ಸಾರಿಗೆ ಡಿಪೊ ವ್ಯವಸ್ಥಾಪಕ ವಿನಾಯಕ ಭಂಡಾರಿ ಮಾತನಾಡಿ, ಶಿರಸಿ, ಉಪ್ಪಿನಪಟ್ಟಣ, ಬೊಗರಿಬೈಲ್, ಚಂದಾವರ, ಹೊನ್ನಾವರ ಮಾರ್ಗವಾಗಿ ಬಸ್ ಬಿಡುವ ಬಗ್ಗೆ ಚರ್ಚಿಸಲಾಯಿತು.

ಅಘನಾಶಿನಿಗೆ ಬಿಡುವ ಹಳೆಯ ಬಸ್‌ಗಳನ್ನು ಬದಲಿಸುವಂತೆ ಕೆಡಿಪಿ ಸದಸ್ಯರಾದ ರಾಘವೇಂದ್ರ ಪಟಗಾರ, ಭುವನ್ ಭಾಗ್ವತ್ ಆಗ್ರಹಿಸಿದರು. ರಾತ್ರಿ 9 ಗಂಟೆ ನಂತರ ಗೋಕರ್ಣಕ್ಕೆ ಒಂದು ಬಸ್ ಬಿಡುವಂತೆ ಕೆಡಿಪಿ ಸದಸ್ಯ ಜಗದೀಶ ಹರಿಕಂತ್ರ ವಿನಂತಿಸಿದರು.

ನೆಹರು ನಗರದ ಅರಣ್ಯ ಭೂಮಿಯಲ್ಲಿದ್ದ ಸ್ಮಶಾನದ ಜಾಗ ರೈಲ್ವೆ ಇಲಾಖೆಗೆ ಹೋಗಿದ್ದು, ಜನರಿಗೆ ಸಮಸ್ಯೆಯಾಗಿದೆ ಎಂದು ತುಳಸು ಗೌಡ ಗಮನ ಸೆಳೆದರು. ಶಾಸಕರು ಪ್ರತಿಕ್ರಿಯಿಸಿ, ಸ್ಥಳೀಯರಿಂದ ಅರ್ಜಿ ಪಡೆದು, ಅರಣ್ಯ ಇಲಾಖೆಗೆ ಅರ್ಜಿ ಸಲ್ಲಿಸುವಂತೆ ಪುರಸಭೆ ಮುಖ್ಯಾಧಿಕಾರಿ ಎಂ.ಆರ್. ಸ್ವಾಮಿ ಅವರಿಗೆ ಸೂಚಿಸಿದರು. ಅಬಕಾರಿ ಇಲಾಖೆ ವಿಷಯಕ್ಕೆ ಸಂಬಂಧಿಸಿ, ಗ್ರಾಮೀಣ ಭಾಗಗಳಲ್ಲಿ ಅಕ್ರಮ ಮದ್ಯ ಮಾರಾಟ ತಡೆಯಲು ಶಾಸಕರು ಸೂಚಿಸಿದರು.

ಗೋಕರ್ಣದಲ್ಲಿ ಮೊದಲಿದ್ದಂತೆ ಪೂಜೆಗೆ ಅವಕಾಶ ಕೊಡಿ

ಕೆಡಿಪಿ ಸದಸ್ಯ ರಾಜಗೋಪಾಲ ಅಡಿ ಮಾತನಾಡಿ, ಗೋಕರ್ಣ ಶ್ರೀ ಮಹಾಬಲೇಶ್ವರ ದೇವಾಲಯದಲ್ಲಿ ಸಾರ್ವಜನಿಕರ ಅನುಕೂಲತೆ ದೃಷ್ಟಿಯಿಂದ ಮೊದಲಿದ್ದಂತೆ ಬೆಳಗ್ಗೆ 6 ಗಂಟೆಯಿಂದ 12-30 ಹಾಗೂ ಸಂಜೆ 5 ರಿಂದ 8-15 ರವರೆಗೆ ಗಂಟೆಯವರೆಗೆ ಉಪಾಧಿವಂತ ವೈದಿಕರ ಮೂಲಕ ಭಕ್ತಾದಿಗಳಿಗೆ ಪೂಜೆಗೆ ಅವಕಾಶ ನೀಡಬೇಕು ಎಂದರು. ತಹಸೀಲ್ದಾರ್ ಶ್ರೀಕೃಷ್ಣ ಕಾಮಕರ ಪ್ರತಿಕ್ರಿಯಿಸಿ, ಈ ವಿಚಾರ ದೇವಾಲಯದ ಪ್ರಸ್ತುತ ಆಡಳಿತ ಸಮಿತಿಯಿಂದ ಆಗಬೇಕಾಗಿದೆ ಎಂದರು. ಭಕ್ತಾದಿಗಳ ಅನುಕೂಲಕ್ಕಾಗಿ ಆಗಬೇಕಾದ ಕೆಲಸ ಇದು. ನೀವು ಪ್ರಸ್ತಾವನೆ ಕಳುಹಿಸಿ ಎಂದು ತಹಸೀಲ್ದಾರರಿಗೆ ಶಾಸಕ ಶೆಟ್ಟಿ ಸೂಚಿಸಿದರು.

ಹೆಚ್ಚಾಗುವಷ್ಟು ಔಷಧ ಪೂರೈಕೆ ಇಲ್ಲ

ಪಶುವೈದ್ಯಕೀಯ ಇಲಾಖೆ ಸರದಿಯಲ್ಲಿ ಶಾಸಕ ದಿನಕರ ಶೆಟ್ಟಿ ಕಳೆದ ಹಲವಾರು ಸಭೆಗಳಲ್ಲಿ ಹೇಳಿದಂತೆ ಈ ಬಾರಿಯೂ ಇಲಾಖೆಯ ಸಂಗ್ರಹಣೆಯಲ್ಲಿ ಸಿಕ್ಕಾಪಟ್ಟೆ ಔಷಧ ಸಂಗ್ರಹ ಯಾಕೆ? ಅಗತ್ಯವಿರುವಷ್ಟೇ ಔಷಧ ತರಿಸಿ ಎಂದರು. ಪ್ರತಿಕ್ರಿಯಿಸಿದ ಪಶುಸಂಗೋಪನಾಧಿಕಾರಿ ಡಾ.ವಿಶ್ವನಾಥ ಹೆಗಡೆ, ಈ ಹಿಂದಿನ ಹಲವು ಸಭೆಗಳಲ್ಲಿ ಶಾಸಕರು ಹೇಳಿದ್ದಾರೆ ಎಂದು ನಮಗೆ ಔಷಧ ಕೋಟಾ ಕಡಿಮೆ ಮಾಡಿದ್ದಾರೆ. ನೀವು ಹಿಂದೊಮ್ಮೆ ಬಂದು ನೋಡಿದಾಗ ಸ್ಟಾಕ್ ಬಂದಿತ್ತು. ಆದರೆ, ಅದೆಲ್ಲವೂ ನಮ್ಮ ಶಾಖಾ ಕೇಂದ್ರಗಳಿಗೆ ವಿತರಣೆಗೆ ಬಾಕಿ ಇದ್ದಿತ್ತು. ನಮ್ಮಲ್ಲಿ ಹೆಚ್ಚಾಗುವಷ್ಟು ಔಷಧ ಪೂರೈಕೆ ಯಾವತ್ತೂ ಇಲ್ಲ ಎಂದರು.

ಕೆಡಿಪಿ ಸಭೆ