ಮದುವೆ ಚಪ್ಪರದಲ್ಲಿ ನದಿ ತಿರುವು ಖಂಡನಾ ಸಭೆ

ಬೇಡ್ತಿ ನದಿ ತೀರದ ಬಾರೆಯ ಮಹಾಬಲೇಶ್ವರ ಭಟ್ಟ ಅವರ ಪುತ್ರ ಅಭಿಜಿತ್ ಹಾಗೂ ಜೋಗಿನಮನೆಯ ಪರಮೇಶ್ವರ ಅಣ್ಣಪ್ಪ ಹೆಗಡೆ ಅವರ ಪುತ್ರಿ ಮೇಘನಾ ಅವರ ವಿವಾಹ ಮಹೋತ್ಸವವು ಗುರುವಾರ ನೆರವೇರಿತು. ವಿವಾಹದ ನಂತರ ಅದೇ ಮಂಟಪವನ್ನು ವೇದಿಕೆಯಾಗಿಸಿ, ನದಿ ತಿರುವು ಯೋಜನೆಯ ಬಾಧಕಗಳ ಬಗ್ಗೆ ಜನರಲ್ಲಿ ಜಾಗೃತಿ ಮೂಡಿಸಲಾಯಿತು.

ಆಕಾಶವಾಣಿಯ ನಿವೃತ್ತ ಅಧಿಕಾರಿ ದಿವಾಕರ ಹೆಗಡೆ ಕೆರೆಹೊಂಡ ಮಾತನಾಡಿ, ನಮ್ಮ ಜಿಲ್ಲೆಯಲ್ಲಿ ನದಿಗಳು ಮಳೆಗಾಲದಲ್ಲಿ ಮಾತ್ರ ರಭಸವಾಗಿ ಹರಿಯುತ್ತವೆ. ನಂತರ ಹಳ್ಳವಾಗಿ ಪರಿವರ್ತನೆಯಾಗುತ್ತವೆ. ಬೇಡ್ತಿ ನದಿಯನ್ನು ವರದಾ ನದಿಗೆ, ಅಘನಾಶಿನಿಯನ್ನು ವೇದಾವತಿ ನದಿಗೆ ಜೋಡಣೆ ಮಾಡುವುದು ಅವೈಜ್ಞಾನಿಕವಾಗಿದೆ.

ಪ್ರಾಕೃತಿಕ ಹರಿವನ್ನು ತಪ್ಪಿಸಿ ಪಂಪ್ ಮಾಡುವ ಮೂಲಕ ನೀರನ್ನು ಬೇರೆಡೆ ತೆಗೆದುಕೊಂಡು ಹೋಗಬೇಕಾಗುತ್ತದೆ. ಈಗಾಗಲೇ ಜಾರಿಯಾಗಿರುವ ಎತ್ತಿನಹೊಳೆ ಯೋಜನೆ ಯಶಸ್ವಿಯಾಗಿಲ್ಲ. ಈ ನದಿಗಳ ಜೋಡಣೆಯೂ ಅಷ್ಟೇ ಆಗುತ್ತವೆ. ನಮ್ಮ ಊರಿನ ಯುವಕರು ಹಳ್ಳಿಯಲ್ಲೇ ಇದ್ದರೂ ದುಡಿಯಬಹುದು ಎಂಬುದನ್ನು ಕರೋನಾ ಕಲ ಕಲಿಸಿದೆ. ನಮ್ಮ ಹೋರಾಟಕ್ಕೆ ಆಧ್ಯಾತ್ಮ ವಲಯ ಹಾಗೂ ಸಾಮಾಜಿಕ ವಲಯದ ಬೆಂಬಲವಿದೆ. ಊರಿನ ಅಸ್ತಿತ್ವಕ್ಕಾಗಿ ಯುವ ಶಕ್ತಿ ಹೋರಾಟಕ್ಕೆ ಮುಂದಾಗಬೇಕಿದೆ. ಶಾಸಕ ಭೀಮಣ್ಣ ನಾಯ್ಕ ಅವರು ಮೊನ್ನೆ ನಡೆದ ಕೆಡಿಪಿ ಸಭೆಯಲ್ಲಿ ನದಿ ಜೋಡಣೆ ವಿರೋಧಿಸಿ ವಿಷಯ ಮಂಡಿಸಿದ್ದಾರೆ. ಉಸ್ತುವಾರಿ ಸಚಿವ ಮಂಕಾಳ ವೈದ್ಯ ಅವರು ಅನುಮೋದಿಸಿದ್ದಾರೆ. ಸಂಸದ ವಿಶ್ವೇಶ್ವರ ಹೆಗಡೆ ಕಾಗೇರಿ ಅವರು ನಿಯೋಗದೊಂದಿಗೆ ಕೇಂದ್ರಕ್ಕೆ ತೆರಳಿ ಯೋಜನೆಗೆ ಆಕ್ಷೇಪ ಸಲ್ಲಿಸಿದ್ದಾರೆ.

ಇದರ ಜೊತೆಗೆ ಈಗ ನಮ್ಮ ಪಾರಂಪರಿಕ ಅಡಕೆ ಬೆಳೆಗೆ ಎಲೆ ಚುಕ್ಕೆ ರೋಗ ಕಾಣಿಸಿಕೊಂಡಿದೆ. ಪರ್ಯಾಯ ಬೆಳೆಯತ್ತ ರೈತರು ಮುಖ ಮಾಡಬೇಕಿದೆ ಎಂದರು. ನದಿ ತಿರುವು ಯೋಜನೆಯ ವಿರುದ್ಧ ಎಲ್ಲರೂ ಪ್ರಧಾನ ಮಂತ್ರಿಗಳಿಗೆ ಪತ್ರ ಬರೆದು ವಿರೋಧಿಸಬೇಕು ಎಂದರು. ಬೇಡ್ತಿ, ಅಘನಾಶಿನಿ ಕೊಳ್ಳ ಸಂರಕ್ಷಣಾ ಸಮಿತಿಯ ವಿಶ್ವೇಶ್ವರ ಹೆಗಡೆ ಕೋಟೆಮನೆ ವೇದಿಕೆಯಲ್ಲಿದ್ದರು. ವಿಜಯವಾಣಿ ಸಹಾಯಕ ಸಂಪಾದಕ ರಾಜಶೇಖರ ಜೋಗಿನಮನೆ ಕಾರ್ಯಕ್ರಮ ನಿರೂಪಿಸಿದರು.

"