rain : ಕುಮಟಾದಲ್ಲಿ ಮಳೆ- ಸಿಡಿಲಿನ ಅಬ್ಬರ

ಪೋಸ್ಟ ಬೆಟ್ಕುಳಿಯ ಕುರಿಗದ್ದೆ ಎಂಬಲ್ಲಿ ಗೌರಿ ಗಣಪತಿ ಪಟಗಾರ ಅವರ ಮನೆಯ ಮೇಲೆ ತೆಂಗಿನ ಮರ ಮುರಿದು ಬಿದ್ದು ಭಾಗಶಃ ಹಾನಿಯಾಗಿದೆ. ಘಟನೆಯಲ್ಲಿ ಮನೆಯಲ್ಲಿದ್ದ ಯಾರಿಗೂ ಸಮಸ್ಯೆಯಾಗಿಲ್ಲ.

ಪಟ್ಟಣದ ಹೊನ್ಮಾಂವ ವ್ಯಾಪ್ತಿಯ ನಾಗದೇವಿ ರಸ್ತೆ ಸನಿಹದ ಸದಾನಂದ ತಿಮ್ಮಪ್ಪ ಅಗ್ರವಾಡೇಕರ ಅವರ ಮನೆಯ ಮಹಡಿಯ ಮೇಲೆ ತೆಂಗಿನಮರ ಮುರಿದು ಬಿದ್ದು ಭಾಗಶಃ ಹಾನಿಯಾಗಿದ್ದು, ಯಾರಿಗೂ ಅಪಾಯ ಸಂಭವಿಸಿಲ್ಲ. ಬೆಟ್ಕುಳಿ ಸನಿಹದ ಮೊರಬದ ಮಾಲಿಗದ್ದೆ ರಸ್ತೆಯಲ್ಲಿ ಸಿಡಿಲು ಬಡಿದು ಮರವು ವಿದ್ಯುತ್ ಕಂಬದ ಮೇಲೆ ಬಿದ್ದಿದ್ದರಿಂದ ವಿದ್ಯುತ್ ಕಂಬವು ಅಲ್ಲಿನ ಯಾದವ ದಾನು ಹಳ್ಳೇರ ಮನೆ ಮೇಲೆ ಮುರಿದು ಬಿದ್ದು ಭಾಗಶಃ ಹಾನಿಯಾಗಿದೆ. ಇಲ್ಲಿಯೂ ಯಾವುದೇ ಜನ ಅಥವಾ ಜಾನುವಾರುಗಳಿಗೆ ಹಾನಿಯಾಗಿಲ್ಲ. ಕಂದಾಯ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ಹಾನಿ ಪಂಚನಾಮೆ ಮಾಡಿದ್ದಾರೆ.

ಹೆಗಡೆಯ ಮಚಗೋಣದಲ್ಲಿ ತಿಮ್ಮಪ್ಪ ಜಟ್ಟಿ ಪಟಗಾರ ಎಂಬವರ ಮನೆಗೆ ಸಿಡಿಲು ಬಡಿದು ಅಪಾರ ಹಾನಿಯಾಗಿದ್ದು ಅದೃಷ್ಟವಶಾತ್ ಮನೆಯಲ್ಲಿದ್ದವರು ಸುರಕ್ಷಿತವಾಗಿದ್ದಾರೆ. ಸಿಡಿಲು ಬಡಿದ ಹೊಡೆತಕ್ಕೆ ವಿದ್ಯುತ್ ಮೀಟರ್ ಬೋರ್ಡ್ ಸಹಿತ ಬಹುತೇಕ ಎಲ್ಲ ವೈರಿಂಗ್‌ಗಳು ಕೂಡಾ ಸುಟ್ಟು ಹೋಗಿದೆ. ಟಿ.ವಿ ಇನ್ನಿತರ ವಿದ್ಯುತ್ ಸಾಮಗ್ರಿಗಳಿಗೂ ಹಾನಿಯಾಗಿದೆ. ಲಕ್ಷಾಂತರ ರೂ. ಹಾನಿಯಾಗಿದೆ.

ಉಳಿದಂತೆ ಜೋರಾದ ಸಿಡಿಲು-ಗುಡುಗಿನೊಂದಿಗೆ ರಭಸದಿಂದ ತಾಸುಗಟ್ಟಲೆ ಮಳೆ ಸುರಿದಿದರಿಂದ ಗಟಾರಗಳಲ್ಲಿ ಕಟ್ಟಿಕೊಂಡಿದ್ದ ಪ್ಲಾಸ್ಟಿಕ್ ಇನ್ನಿತರ ಕಸತ್ಯಾಜ್ಯಗಳು ರಸ್ತೆಯ ಮೇಲೆ ರಾಶಿ ಬೀಳುವಂತಾಯಿತು. ಮಳೆಗಾಲ ಪೂರ್ವ ಸಿದ್ಧತೆಗಳು ಪುರಸಭೆ ಅಥವಾ ಗ್ರಾಮ ಪಂಚಾಯಿತಿಗಳಿಂದ ಇನ್ನೂ ತನಕ ನಡೆದಿಲ್ಲವಾದ್ದರಿಂದ ಮಳೆಯ ನೀರಿನ ಸರಾಗ ಹರಿವಿಗೆ ಅನಾನುಕೂಲವಾಗಿದೆ.