ತಾಲೂಕಿನಲ್ಲಿ ರಾಷ್ಟ್ರೀಯ ಹೆದ್ದಾರಿ, ರಾಜ್ಯ ಹೆದ್ದಾರಿ ಸೇರಿದಂತೆ ಗ್ರಾಮೀಣ ಭಾಗದ ರಸ್ತೆಗಳ ಪಕ್ಕದಲ್ಲಿಯೂ ಹೊಂಡಗಳನ್ನು ತೆಗೆದು ಕೇಬಲ್ ಅಳವಡಿಸಲಾಗಿತ್ತು. ಬೇಸಿಗೆಯಲ್ಲಿ ಸುಮಾರು 2-3 ತಿಂಗಳು ಕಾಮಗಾರಿ ನಡೆದಿತ್ತು. ಕಾಮಗಾರಿ ಮುಗಿದ ನಂತರ ಗುಂಡಿಗಳನ್ನು ಮುಚ್ಚಿರಲಿಲ್ಲ. ಆಗ ಕೆಲವೆಡೆ ಗ್ರಾಮಸ್ಥರು ವಿರೋಧ ವ್ಯಕ್ತಪಡಿಸಿದ ಹಿನ್ನೆಲೆಯಲ್ಲಿ ಕಾಟಾಚಾರಕ್ಕೆಂಬಂತೆ ಮುಚ್ಚಿ ಹೋಗಿದ್ದರು. ಗುಂಡಿಯ ನೈಜ ಚಿತ್ರಣ ಮಳೆ ಆರಂಭವಾಗುತ್ತಿದ್ದಂತೆ ಬಯಲಾಗುತ್ತಿದೆ. ಯಲ್ಲಾಪುರ-ಶಿರಸಿ ರಸ್ತೆ, ಮಾಗೋಡ ರಸ್ತೆ, ವಜ್ರಳ್ಳಿ ರಸ್ತೆ, ರಾಷ್ಟ್ರೀಯ ಹೆದ್ದಾರಿ ಸೇರಿ ಹಲವೆಡೆ ಈ ರೀತಿಯ ಅರೆಬರೆ ಮುಚ್ಚಿದ ಹೊಂಡಗಳಿವೆ. ಎದುರಿಗೆ ವಾಹನಗಳು ಬಂದಾಗ ವಾಹನ ಸವಾರರು ಸ್ವಲ್ಪ ರಸ್ತೆ ಬಿಟ್ಟು ಕೆಳಗಿಳಿದರೂ ಹೊಂಡದಲ್ಲಿ ಬೀಳುವುದು ಖಚಿತ.
