ಸಾರಾಯಿ ಸಾಗಿಸುತ್ತಿದ್ದ ಪೊಲೀಸ್‌ ಸಿಬ್ಬಂದಿ ಡಿಸ್‌ಮಿಸ್‌

ಕಾರವಾರ: ಪೊಲೀಸ್ ಕರ್ತವ್ಯದಲ್ಲಿದ್ದರೂ ಸಾರಾಯಿ ಸಾಗಣೆಯನ್ನೇ ವೃತ್ತಿ ಮಾಡಿಕೊಂಡಿದ್ದ ಉತ್ತರ ಕನ್ನಡ ಜಿಲ್ಲಾ ಪೊಲೀಸ್ ಸಿವಿಲ್ ಕಾನ್ಸ್ಟೇಬಲ್ ಸಂತೋಷ ಲಮಾಣಿಯನ್ನು ಕೆಲಸದಿಂದ ವಜಾ ಮಾಡಿ ಎಸ್‌ಪಿ ದೀಪನ್ ಎಂ.ಎನ್.ಆದೇಶ ಹೊರಡಿಸಿದ್ದಾರೆ.

ಗೋವಾದಿಂದ ಜಿಲ್ಲೆಯ ವಿವಿಧ ಹೋಟೆಲ್, ರೆಸಾರ್ಟ್ಗಳಿಗೆ ಸಾರಾಯಿ ಸಾಗಣೆ ಮಾಡುವುದನ್ನು ಆತ ವೃತ್ತಿ ಮಾಡಿಕೊಂಡಿದ್ದ. ಕಾರವಾರದ ಚಿತ್ತಾಕುಲಾ, ಕದ್ರಾ ಠಾಣೆಗಳಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದಾಗ ಹಿಡಿದ ಚಾಳಿಯನ್ನು ಆತ ಬಿಡದೇ ಮುಂದುವರಿಸಿದ್ದ. ಗೋಕರ್ಣ ಪೊಲೀಸ್‌ಠಾಣೆಯಲ್ಲಿ ಇದ್ದಾಗ ಗೋವಾ ಸಾರಾಯಿ ಸಾಗಿಸಿ ರೆಡ್‌ಹ್ಯಾಂಡ್ ಆಗಿ ಸಿಕ್ಕಿ ಬಿದ್ದು ಅಮಾನತಾಗಿದ್ದ. ಆ ಪ್ರಕರಣ ಮುಗಿಯುವ ಮೊದಲೇ ಇನ್ನೂ ಎರಡು ಬಾರಿ ಸಾರಾಯಿ ಸಾಗಣೆ ವೇಳೆ ಆತ ಇರುವುದು ಪತ್ತೆಯಾಗಿತ್ತು.

ಈ ಸಂಬಂಧ ಪೊಲೀಸ್ ಇಲಾಖೆಯಿಂದ ಆಂತರಿಕ ತನಿಖೆ ನಡೆಸಲಾಗಿತ್ತು. ವರದಿ ಆಧರಿಸಿ ನೇಮಕಾತಿ ಪ್ರಾಧಿಕಾರಿಯಾದ ಎಸ್.ಪಿ. ದೀಪನ್ ಅವರು ಕ್ರಮ ವಹಿಸಿದ್ದಾರೆ.