ಕರ್ನಾಟಕದ ಶಾಸಕರ ಪುತ್ರಿ ಗೋವಾ ಪ್ರತಿನಿಧಿಸಿ Miss India ಆಗಿದ್ಹೇಗೆ ..? ಇಲ್ಲಿದೆ ಸಾದ್ವಿ ಸೈಲ್‌ ಉತ್ತರ

ಕಾರವಾರ: ಈ ವರ್ಷದ ಫೆಮಿನಾ ಮಿಸ್ ಇಂಡಿಯಾ ( Femina Miss India ) ಆಗಿ ಹೊರ ಹೊಮ್ಮಿದ ನಂತರ ಮೊದಲ ಬಾರಿಗೆ ನಗರಕ್ಕೆ ಆಗಮಿಸಿದ ಶಾಸಕ ಸತೀಶ ಸೈಲ್ ಪುತ್ರಿ ಸಾದ್ವಿ ಸೈಲ್ ಅವರಿಗೆ ಅದ್ದೂರಿ ಸ್ವಾಗತ ನೀಡಲಾಯಿತು.

ನಗರದ ಮಾಲಾದೇವಿ ಮೈದಾನಕ್ಕೆ ಸಾದ್ವಿ ಅವರು ಹೆಲಿಕಾಫ್ಟರ್ ಮೂಲಕ ಬಂದಿಳಿದರು. ಅವರನ್ನು ಹೂ ಮಳೆ ಸುರಿಸಿ ಸ್ವಾಗತಿಸಲಾಯಿತು. ಯುವಕರ ದಂಡು, ನೂರಾರು ಜನ ಸೆಲಿಗಾಗಿ ಮುಗಿಬಿದ್ದರು. ನಂತರ ಮೈದಾನದಲ್ಲಿಯೇ ವಿವಿಧ ಸಂಘಟನೆಗಳಿಂದ ಅಭಿನಂದನಾ ಸಮಾರಂಭ ಆಯೋಜಿಸಲಾಗಿತ್ತು. ಫಾದರ್ ಸ್ಟ್ಯಾನಿ ಪಿಂಟೋ, ಸುಜಾತಾ ಗಾಂವಕರ್, ಶ್ಯಾಮ ಸೈಲ್ ಸೇರಿ ಹಲವು ಗಣ್ಯರು ವೇದಿಕೆಯ ಮೇಲಿದ್ದರು.

ನಂತರ ತೆರೆದ ವಾಹನದಲ್ಲಿ ಸಾದ್ವಿ ಅವರನ್ನು ಕೂರಿಸಿ ನಗರದ ಪ್ರಮುಖ ಬೀದಿಗಳಲ್ಲಿ ಮೆರವಣಿಗೆ ಮಾಡಲಾಯಿತು. ನಗರದ ಮಾರುಕಟ್ಟೆ ಸಿದ್ದಿ ವಿನಾಯಕ ದೇವಸ್ಥಾನದಲ್ಲಿ ಶಾಸಕ ಸತೀಶ ಸೈಲ್, ಪತ್ನಿ ಕಲ್ಪನಾ ಸೈಲ್ ಸೇರಿ ಕುಟುಂಬಸ್ಥರು ವಿಶೇಷ ಪೂಜೆ ಸಲ್ಲಿಸಿದರು.

ಈ ಸಂದರ್ಭದಲ್ಲಿ ಇಂಗ್ಲಿಷ್, ಕೊಂಕಣಿ ಹಾಗೂ ಕನ್ನಡದಲ್ಲಿ ಮಾತನಾಡಿದ Miss India ಸಾದ್ವಿ ಅವರು, ಕಾರವಾರ ಇರಲಿ ಗೋವಾ ಇರಲಿ ನಾವೆಲ್ಲರೂ ಭಾರತದ ಮಕ್ಕಳು. ಬೇಧಭಾವ ಮಾಡಬೇಡಿ ಎಂದು ವಿನಂತಿಸಿದರು. ನಾನು ಹುಟ್ಟಿದ್ದು ಗೋವಾದಲ್ಲಿ. ಪೂರ್ವ ಪ್ರಾಥಮಿಕ ಶಿಕ್ಷಣವನ್ನು ಗೋವಾದಲ್ಲಿಯೇ ಪಡೆದೆ. ನನ್ನ ಹಿರಿಕರು, ಹಲವು ಸಂಬಂಧಿಕರು ಗೋವಾದಲ್ಲಿಯೇ ಇದ್ದಾರೆ. ಇದರಿಂದ ಗೋವಾ ರಾಜ್ಯವನ್ನು ಪ್ರತಿನಿಧಿಸಿದೆ. ಮಾತ್ರವಲ್ಲ ಕರ್ನಾಟಕದಲ್ಲಿ ಸಾಕಷ್ಟು ಸ್ಪರ್ಧೆ ಇತ್ತು. ಗೋವಾದಲ್ಲಿ ನನಗೆ ಸುಲಭದಲ್ಲಿ ಅವಕಾಶ ಸಿಕ್ಕಿತು ಎಂದಿದ್ದಾರೆ.

ಸಂವಹನ ಕೌಶಲ, ಆತ್ಮವಿಶ್ವಾಸ ನಾನು ಫೆಮಿನಾ ಮಿಸ್ ಇಂಡಿಯಾದಲ್ಲಿ ಜಯಗಳಿಸಲು ದೊಡ್ಡ ಸಹಕಾರ ನೀಡಿತು. ನಾನು ಏಳು ಭಾಷೆ ಮಾತನಾಡಬಲ್ಲೆ ಎಂಬುದೂ ಮಹತ್ವದ ವಿಷಯವಾಯಿತು. ಈಗಾಗಲೇ ಉದ್ಯಮ ಕ್ಷೇತ್ರದಲ್ಲಿದ್ದು, ಮಾಡೆಲಿಂಗ್, ಫ್ಯಾಷನ್ ಇಂಡಸ್ಟ್ರಿಯಲ್ಲಿ ಕೆಲಸ ಮಾಡುವ ಉದ್ದೇಶ ಹೊಂದಿದ್ದೇನೆ. ಬಹು ಮುಖ್ಯವಾಗಿ, 2027 ರಲ್ಲಿ ಮಿಸ್ ವರ್ಲ್ಡ್ಗೆ ಸ್ಪರ್ಧೆಗೆ ಭಾರತವನ್ನು ಪ್ರತಿನಿಧಿಸಬೇಕು ಎಂಬ ಇಚ್ಛೆ ಹೊಂದಿದ್ದೇನೆ ಎಂದರು.

ಕನಸನ್ನು ಈಡೇರಿಸಲು ಒಬ್ಬರಿಗೊಬ್ಬರು ಸಹಾಯ ಮಾಡಬೇಕು ಎಂದ ಸಾದ್ವಿ, ನೀವು ನಿಮ್ಮ ಗುರಿ ಮುಟ್ಟಲು ಶತ ಪ್ರಯತ್ನ ಮಾಡಿ. ಆ ಹೆಜ್ಜೆಯಲ್ಲಿ ನಿಮ್ಮ ಸುತ್ತಲಿರುವವರ ಬಗ್ಗೆ ಕಾಳಜಿ, ಮಾನವೀಯತೆ ಇರಲಿ ಎಂದು ಕಿವಿಮಾತು ಹೇಳಿದರು. ಈ ಜಯ ನನ್ನೊಬ್ಬಳ ಜಯವಲ್ಲ. ನನ್ನ ಕತೆ ಕಾರವಾರದ ಜೊತೆ ಸೇರಿಕೊಂಡಿದೆ. ನಾನು ಕಾರವಾರದ ಎಲ್ಲರನ್ನೂ ಪ್ರತಿನಿಽಸುತ್ತಿದ್ದೇನೆ ಎಂದರು.