8 ವರ್ಷವಾದರೂ ಸರಿದಾರಿಗೆ ಬಾರದ ಮೆರಿಟೈಮ್‌ ಬೋರ್ಡ್‌

ಭಾಸ ಧೂಪದಹೊಂಡ ಕಾರವಾರ

ಪ್ರಾರಂಭವಾಗಿ ಎಂಟು ವರ್ಷವಾಗುತ್ತ ಬಂದರೂ ಕರ್ನಾಟಕ ಜಲಸಾರಿಗೆ ಮಂಡಳಿ ಸಾಕಷ್ಟು ನ್ಯೂನತೆಗಳಿಂದ ಬಳಲುತ್ತಿದೆ. ಆದಾಯದ ಮೂಲಗಳಿದ್ದರೂ ಅದನ್ನು ಬಳಸಿಕೊಳ್ಳಲು ಸಾಧ್ಯವಾಗದೇ ಒದ್ದಾಡುತ್ತಿದೆ. ಆಡಳಿತ ವ್ಯವಸ್ಥೆ ಹಳ್ಳ ಹಿಡಿದಿದೆ.

ಬಂದರು ಅಭಿವೃದ್ಧಿ ಚಟುವಟಿಕೆಗಳಲ್ಲಿ ಶೀಘ್ರ ನಿರ್ಣಯ ಕೈಗೊಳ್ಳಲು ಅನುಕೂಲವಾಗಲಿದೆ ಎಂದು ಸರ್ಕಾರದ ಅಧೀನದಲ್ಲಿ ಮಂಡಳಿ ರಚಿಸಲಾಯಿತು. ಆದರೆ, ನಿರ್ಧಾರಗಳು ಶೀಘ್ರವಾಗುವ ಬದಲು ಮತ್ತಷ್ಟು ವಿಳಂಬವಾಗುತ್ತಿವೆ. ಕಡತಗಳು ಕಾರವಾರ ಬೆಂಗಳೂರಿನ ನಡುವೆ ಓಡಾಡುವುದರಲ್ಲೇ ಕಾಲಹರಣವಾಗುತ್ತಿದೆ.

ಬಂದರು ಮತ್ತು ಒಳನಾಡು ಜಲಸಾರಿಗೆ ಇಲಾಖೆಯ ಸಿಬ್ಬಂದಿಯನ್ನೇ ಈ ಮಂಡಳಿಗೆ ಪ್ರಭಾರವಾಗಿ ಪಡೆದು ಕಾರ್ಯ ನಿರ್ವಹಣೆ ಪ್ರಾರಂಭಿಸಲಾಯಿತು. ಆದರೆ, ಇದುವರೆಗೂ ಮಂಡಳಿಯ ಒಬ್ಬರೇ ಒಬ್ಬ ಅಧಿಕಾರಿ ಅಥವಾ ಸಿಬ್ಬಂದಿಯನ್ನೂ ನೇಮಿಸಿಕೊಂಡಿಲ್ಲ. ಮಂಡಳಿಯ ಕಾರ್ಯ ನಿರ್ವಗಣೆಯ ಕಾಯ್ದೆ ಸಮಗ್ರವಾಗಿ ಇನ್ನೂ ರೂಪುಗೊಂಡಿಲ್ಲ. ನೇಮಕಾತಿ ನೀತಿ ರಚನೆಯಾಗಿಲ್ಲ. ಹಾಗಾಗಿ ಮಂಡಳಿಗೆ ಕಾರ್ಯ ನಿರ್ವಹಣೆಗೆ ಹಿನ್ನಡೆಯಾಗಿದೆ.

ಮಂಡಳಿಗೆ ಒಬ್ಬ ಕಾಯಂ ನಿರ್ದೇಶಕರಿಲ್ಲದೇ ಹಲವು ತಿಂಗಳು ಕಳೆದಿವೆ. ಮುಖ್ಯವಾಗಿ ಬಂದರು, ಹಾಗೂ ಮೆರಿಟೈಮ್ ಆಧಾರಿತ ವಿಷಯಗಳಲ್ಲಿ ತಾಂತ್ರಿಕ ಜ್ಞಾನ ಹೊಂದಿರುವ ತಾಂತ್ರಿಕ ಅಽಕಾರಿಗಳೇ ಇಲ್ಲ. ಕ್ಲರಿಕಲ್ ಸೇರಿ ಎಲ್ಲ ವಿಭಾಗಗಳಲ್ಲಿ ಸಾಕಷ್ಟು ಸಿಬ್ಬಂದಿ ಕೊರತೆ ಇದೆ. ಬೇರೆ ಇಲಾಖೆ ಅಽಕಾರಿಗಳನ್ನು ತುರ್ತು ಪ್ರಭಾರವಾಗಿ ನೇಮಿಸಿಕೊಳ್ಳಲಾಗುತ್ತಿದೆ. ತಾಂತ್ರಿಕ ಸಿಬ್ಬಂದಿಯನ್ನು ಹೊರ ಗುತ್ತಿಗೆಯ ಮೇಲೆ ನೇಮಿಸಿಕೊಳ್ಳಲಾಗುತ್ತಿದೆ. ಇದರಿಂದ ಯೋಜನೆಗಳು ಹಾಗೂ ಕಾರ್ಯ ನಿರ್ವಹಣೆಗೆ ಹಿನ್ನಡೆ ಉಂಟಾಗುತ್ತಿದೆ.

ಖಾಸಗಿ ಸಹಭಾಗಿತ್ವದಲ್ಲಿ ಬಂದರುಗಳ ಅಭಿವೃದ್ಧಿ. ಒಳನಾಡು ಜಲಸಾರಿಗೆ ಅಭಿವೃದ್ಧಿ, ಜಲ, ದ್ವೀಪ ಆಧಾರಿತ ಪರಿಸರ ಪ್ರವಾಸೋದ್ಯಮ ಅಭಿವೃದ್ಧಿಯ ಸಮಗ್ರ ಯೋಜನೆಗಳನ್ನು ಜಲಸಾರಿಗೆ ಮಂಡಳಿ ರಚಿಸಿದೆ. ಕರ್ನಾಟಕ ಜಲಸಾರಿಗೆ ನೀತಿ-2024 ನ್ನು ರೂಪಿಸಲಾಗಿದೆ. ಆದರೆ, ಅವುಗಳ ಶೀಘ್ರ ಜಾರಿಗೆ ಸಿಆರ್‌ಜಡ್ ಹಾಗೂ ಇತರ ಕಾಯ್ದೆಗಳ ತೊಡಕು ಉಂಟಾಗುತ್ತಿದೆ. ಬಂದರುಗಳ ಅಭಿವೃದ್ಧಿಗೆ ಸ್ಥಳೀಯರ ವಿರೋಧ ಕೇಳಿ ಬರುತ್ತಿದೆ. ಇವನ್ನೆಲ್ಲ ನಿಭಾಯಿಸಿ ಯೋಜನೆಯ ಜಾರಿ ಕೆಎಂಬಿಗೆ ಸವಾಲಾಗಿದೆ.

"