ಕಲೆ ಪ್ರೀತಿಸುವ ಸಮಾಜ ನಿರ್ಮಾಣವಾಗಲಿ

ಕಡತೋಕದ ಜನತಾ ವಿದ್ಯಾಲಯದ ಆವರಣದಲ್ಲಿ ಯಕ್ಷರಂಗದ ಸಂಯೋಜನೆಯಲ್ಲಿ ಶನಿವಾರ ಆಯೋಜಿಸಿದ್ದ ಯಕ್ಷಗಾನ ಭಾಗವತರಾಗಿದ್ದ ದಿ. ಕಡತೋಕ ಮಂಜುನಾಥ ಭಾಗವತ ಅವರ ನೆನಪಿನ ‘ಕಡತೋಕ ಕೃತಿ-ಸ್ಮತಿ ವಿಂಶತಿ ಯಕ್ಷರಂಗೋತ್ಸವ’ ಕಾರ್ಯಕ್ರಮದ ಸಾನ್ನಿಧ್ಯವಹಿಸಿ ಅವರು ಆಶೀರ್ವಚನ ನೀಡಿದರು.

ಯಕ್ಷಗಾನ ಕೇವಲ ಕಲೆಯಾಗಿ ಉಳಿದಿಲ್ಲ, ಅದೊಂದು ಸಂಸ್ಕಾರ. ಇವತ್ತಿನ ಮಕ್ಕಳಿಗೆ ಯಕ್ಷಗಾನದ ಅರಿವು ಆಗಬೇಕು. ಆಗ ಅದು ಹೆಚ್ಚು ಔಚಿತ್ಯಪೂರ್ಣವಾಗುವುದು. ಸಂಸ್ಕಾರ ಸಿಗದೇ ಇರುವ ಕಾರಣ ಇಂದು ಜೀವನದಲ್ಲಿ ನೆಮ್ಮದಿಯು ಕಡಿಮೆಯಾಗಿದೆ. ಕಡತೋಕ ಮಂಜುನಾಥ ಭಾಗವತರು ಅವರದ್ದೇ ಆದ ಶೈಲಿಯನ್ನು ಬಿಟ್ಟು ಹೋಗಿದ್ದಾರೆ. ಅವರ ನೆನಪು ಇವತ್ತಿನ ಕಲಾವಿದರಿಗೆ, ಕಲಾಸಕ್ತರಿಗೆ ಆದರ್ಶವಾಗಬೇಕು ಎಂದರು.

ಯಕ್ಷಗಾನ ವಿದ್ವಾಂಸರಾದ ಡಾ. ಎಂ. ಪ್ರಭಾಕರ ಜೋಶಿ, ವಿದ್ವಾನ್ ಉಮಾಕಾಂತ ಭಟ್ಟ ಅವರನ್ನು ಸನ್ಮಾನಿಸಲಾಯಿತು. ಪ್ರಶಸ್ತಿ ಸ್ವೀಕರಿಸಿದ ಡಾ. ಎಂ. ಪ್ರಭಾಕರ ಜೋಶಿ ಮಾತನಾಡಿ, ಕಡತೋಕ ಮಂಜುನಾಥ ಭಾಗವತರು ಅಸಾಧಾರಣ ಸೃಜನಶೀಲತೆಯನ್ನು ಕೊಟ್ಟಿದ್ದಾರೆ. ಅವರು ಯಕ್ಷಗಾನದ ಮೇಲೆ ದಟ್ಟವಾದ ಪ್ರಭಾವ ಬೀರಿದ್ದರು. ಒಂದು ಕಾಲದಲ್ಲಿ ಬಹುತೇಕ ಭಾಗವತರು ಕಡತೋಕ ಭಾಗವತರ ಜಂಜಾವಾತದ ಪ್ರಭಾವಕ್ಕೆ ಒಳಗಾಗಿದ್ದರು. ರಂಗಸ್ಥಳದಲ್ಲಿ ಕಲಾವಿದರ ಸಾಮರ್ಥ್ಯವನ್ನು ನೋಡಿ ಕುಣಿಸುತ್ತಿದ್ದರು. ರಂಗಕಲೆಯ ಸಂರಕ್ಷಣೆ, ಸಂವರ್ಧನೆ, ವಿಸ್ತರಣೆಗೆ ಮಾದರಿಯಾದ ಸಂಪನ್ಮೂಲ ವ್ಯಕ್ತಿಯಾಗಿದ್ದರು. ನಾನು ಉತ್ತರ ಕನ್ನಡ ಜಿಲ್ಲೆಯಲ್ಲಿ ಪರಿಚಿತನಾಗಲು ಕಡತೋಕ ಮಂಜುನಾಥ ಭಾಗವತರು ಕಾರಣರು. ಪ್ರಶಸ್ತಿಯಿಂದ ಅತೀವ ಸಂತೋಷವಾಗಿದೆ. ಇದನ್ನು ಇಡೀ ಯಕ್ಷಗಾನ ಸಮುದಾಯಕ್ಕೆ ಸಲ್ಲಿಸುತ್ತೇನೆ ಎಂದರು.

ವಿದ್ವಾನ ಉಮಾಕಾಂತ ಭಟ್ ಮಾತನಾಡಿ, ನಮ್ಮೊಳಗಿನ ಸತ್ವವನ್ನು ಅಳೆದು ಕೊಡುವುದು ಸನ್ಮಾನ. ಮಂಜುನಾಥ ಭಾಗವತರು ನನ್ನಲ್ಲಿರುವ ಪ್ರತಿಭೆಯನ್ನು ಅರಳಿಸಿದವರು. ಸಮರ್ಥ ನಿರ್ದೇಶನ ಸೂತ್ರವಾಗಿದ್ದರು ಎಂದರು.

ಕಾಂಗ್ರೆಸ್‌ನ ಸುಷ್ಮಾ ರೆಡ್ಡಿ ಮಾತನಾಡಿದರು. ಅರ್ಥಧಾರಿ ಮೋಹನ ಹೆಗಡೆ ಹೆರವಟ್ಟಾ ಮಾತನಾಡಿ, ನಮಗೆ ಮತ್ತು ನಮ್ಮಿಂದ ಮತ್ತೊಬ್ಬರಿಗೆ ಆನಂದ ನೀಡುವುದು ಕಲೆಯ ಗುರಿಯಾಗಿದೆ. ಮಂಜುನಾಥ ಭಾಗವತರು ಯಕ್ಷಗಾನದಲ್ಲಿ ಚಮತ್ಕಾರ ಮಾಡಿದ್ದಾರೆ ಎಂದರು.

ಪತ್ರಕರ್ತ ಶಶಿಧರ ಹೆಗಡೆ ನಂದಿಕಲ್ಲು ಅಭಿನಂದನಾ ಮಾತನಾಡಿದರು. ಯಕ್ಷರಂಗೋತ್ಸವದ ಸಂಘಟನಾ ಸಮಿತಿ ಅಧ್ಯಕ್ಷ ಶಿವಾನಂದ ಹೆಗಡೆ ಕಡತೋಕ ಇದ್ದರು.

ವಕೀಲ ಸತೀಶ ಭಟ್ಟ ಉಳಗೆರೆ, ಸಂಘಟಕ ಗೋಪಾಲಕೃಷ್ಣ ಭಾಗವತ ಹಾಗೂ ನಾಗರಾಜ ಹೆಗಡೆ ಖಾಸ್ಕಂಡ ಕಾರ್ಯಕ್ರಮ ನಿರ್ವಹಿಸಿದರು. ಬಳಿಕ ಬ್ರಹ್ಮ ಕಪಾಲ’ ಯಕ್ಷಗಾನ ಪ್ರದರ್ಶನ ನಡೆಯಿತು.