ಪಾರದರ್ಶಕತೆಯಿಂದ ಸಹಕಾರಿ ತತ್ವ (Cooperative principle) ಪಾಲನೆಯಾಗಲಿ

ಸಿದ್ದಾಪುರ: ಸಹಕಾರಿ ಕ್ಷೇತ್ರ ಪ್ರಜಾಪ್ರಭುತ್ವ ಮಾದರಿಯನ್ನು ಅಳವಡಿಸಿಕೊಂಡಿದ್ದು, ಇದು ರೈತರ ಹೃದಯದಂತಿದೆ. ಸರ್ಕಾರದ ಬಜೆಟ್‌ಗಿಂತ ಸಹಕಾರಿ ರಂಗದ ಬಜೆಟ್‌ನ ಮೊತ್ತ ಅತ್ಯಧಿಕವಾಗಿದೆ. ಪರಸ್ಪರ ಕೂಡುವಿಕೆ, ಪ್ರಾಮಾಣಿಕತೆ, ಪಾರದರ್ಶಕತೆಯಿಂದ ಸಹಕಾರಿ ತತ್ವ(Cooperative principle) ಗಳನ್ನು ಪಾಲಿಸಿಕೊಂಡು ಬರಬೇಕಾಗಿದೆ ಎಂದು ಟಿಎಂಎಸ್ ಅಧ್ಯಕ್ಷ ಆರ್.ಎಂ. ಹೆಗಡೆ ಬಾಳೇಸರ ಹೇಳಿದರು.

ಪಟ್ಟಣದ ಟಿಎಂಎಎಸ್ ಸಭಾಂಗಣದಲ್ಲಿ ಆಯೋಜಿಸಿದ್ದ ಅಖಿಲ ಭಾರತ ಸಹಕಾರ ಸಪ್ತಾಹದ ಅಧ್ಯಕ್ಷತೆವಹಿಸಿ ಅವರು ಮಾತನಾಡಿದರು.

ಬಿಳಗಿ ಸೇವಾ ಸಹಕಾರಿ ಸಂಘದ ಅಧ್ಯಕ್ಷೆ ಸುಲೋಚನಾ ಪ್ರಭಾಕರ ಶಾಸ್ತ್ರಿ ಕೋಟೆಗದ್ದೆ ಕಾರ್ಯಕ್ರಮ ಉದ್ಘಾಟಿಸಿದರು.

ಟಿಎಸ್‌ಎಸ್ ನಿರ್ದೇಶಕ ರವೀಂದ್ರ ಹೆಗಡೆ ಹಿರೇಕೈ ಮಾತನಾಡಿ, ನಮ್ಮ ಬದುಕು ರೂಪಿಸಿದ್ದ ಸಹಕಾರಿ ಕ್ಷೇತ್ರ ಇಂದು ಹಾದಿ ತಪ್ಪಿ ಕಲುಷಿತಗೊಂಡಿದೆ. ಇದರಿಂದ ಜನರ ಜೀವನ ಅಲ್ಲೋಲ ಕಲ್ಲೋಲವಾಗಿದೆ. ಸಹಕಾರಿ ಕಾನೂನಿನಲ್ಲಿ ಕಟ್ಟುನಿಟ್ಟಾದ ಕ್ರಮಕ್ಕೆ ನೇರ ಅವಕಾಶ ಇಲ್ಲದಿರುವುದು ಹಾಗೂ ಈಗಿನ ಕಾನೂನಿನಡಿ ಕ್ರಮಕ್ಕೆ ಹೋದರೆ ಸಾಕಷ್ಟು ವಿಳಂಭವಿರುವುದು ಸಹಕಾರಿ ಕ್ಷೇತ್ರದಲ್ಲಿನ ಹಣಕಾಸಿನ ಅವ್ಯವಹಾರಕ್ಕೆ ಕಾರಣವಾಗಿದೆ.

ಸಹಕಾರ ಕ್ಷೇತ್ರದಲ್ಲಿನ ಲೋಪದೋಷವನ್ನು ಸರಿಪಡಿಸುವ ಕಾರ್ಯದ ಬಗ್ಗೆ ಆಲೋಚಿಸಬೇಕು. ಕೇವಲ ಆಡಳಿತ ಮಂಡಳಿಯನ್ನು ಆರಿಸಿ ಅವರ ಕೈಗೆ ಸಂಘವನ್ನು ನೀಡಿದರೆ ಮಾತ್ರ ಸಾಲದು. ಸಂಘದ ಪ್ರತಿ ಕಾರ್ಯದಲ್ಲೂ ಸದಸ್ಯರ ಭಾಗವಹಿಸುವಿಕೆ ಮುಖ್ಯ. ನಾವು ಶ್ರಮ ಪಟ್ಟು ಬೆಳೆಸಿದ ಸಂಘದಲ್ಲಿ ಸರ್ಕಾರದ ನೇರ ಹಸ್ತಕ್ಷೇಪ ಸರಿಯಲ್ಲ ಎಂದರು.

ಧಾರವಾಡ ಹಾಲು ಒಕ್ಕೂಟದ ನಿರ್ದೇಶಕ ಪಿ.ವಿ. ನಾಯ್ಕ ಬೇಡ್ಕಣಿ, ಟಿಎಂಎಸ್‌ನ ಪ್ರಧಾನ ವ್ಯವಸ್ಥಾಪಕ ಸತೀಶ ಹೆಗಡೆ ಹೆಗ್ಗಾರಕೈ ಉಪಸ್ಥಿತರಿದ್ದರು.

ಸಹಕಾರಿ ಅಭಿವೃದ್ಧಿ ಅಧಿಕಾರಿ ರಾಘವೇಂದ್ರ ಗುಡಿಕೇರಿ ರಾಷ್ಟ್ರೀಯ ಸಹಕಾರ ನೀತಿಯ ಪರಿಸರ ವ್ಯವಸ್ಥೆ ಭಾರತದ ಸಹಕಾರ ಸಂಸ್ಥೆಗಳಿಗೆ ರಚನಾತ್ಮಕ ಮಾರ್ಗಸೂಚಿ ವಿಷಯ ಕುರಿತು ಉಪನ್ಯಾಸ ನೀಡಿದರು.

ಉತ್ತಮ ಸಹಕಾರಿ ಸಂಘವೆಂದು ಟಿಎಂಎಸ್ ಸಿದ್ದಾಪುರ, ಉತ್ತಮ ಹಾಲು ಉತ್ಪಾದಕರ ಸಂಘವೆಂದು ಬೇಡ್ಕಣಿ ಹಾಲು ಉತ್ಪಾದಕರ ಸಂಘ, ಉತ್ತಮ ಸಹಕಾರಿ ಎಂದು ಲಂಬಾಪುರ ಸೇವಾ ಸಹಕಾರಿ ಸಂಘದ ಅಧ್ಯಕ್ಷ ಎಂ.ಐ. ನಾಯ್ಕ ಕೆಳಗಿನಸಸಿ, ಉತ್ತಮ ಸಹಕಾರಿ ನೌಕರ ಎಂದು ಬಾಳೇಸರ ಸೇವಾ ಸಹಕಾರಿ ಸಂಘದ ಕಾರ್ಯನಿರ್ವಾಹಕ ಗಣಪತಿ ಗಜಾನನ ಹೆಗಡೆ ಅವರನ್ನು ಗೌರವಿಸಲಾಯಿತು.

ಜಿಲ್ಲಾ ಸಹಕಾರ ಯೂನಿಯನ್‌ನ ನಿರ್ದೇಶಕ ಎಂ.ವಿ. ಹೆಗಡೆ ಕಂಚಿಕೈ ಪ್ರಾಸ್ತಾವಿಕವಾಗಿ ಮಾತನಾಡಿದರು. ವ್ಯವಸ್ಥಾಪಕ ದರ್ಶನ ಗಾಂವಕರ ನಿರ್ವಹಿಸಿದರು.