ಜೈ ದುರ್ಗಾಮಾತಾ ಕ್ರೆಡಿಟ್ ಸೌಹಾರ್ದ ಸಹಕಾರಿಗೆ ಕೆಪಿಐಡಿ ಕಾಯ್ದೆ ಜಾರಿ

ಜಿಲ್ಲಾಧಿಕಾರಿ ಅವರು ಕಳಿಸಿದ ಪ್ರಸ್ತಾವನೆಯಂತೆ ಕಂದಾಯ ಇಲಾಖೆಯ ಡೆಪ್ಯುಟಿ ಸೆಕ್ರೇಟರಿ ಅನ್ವರ್ ಭಾಷಾ ಅವರು ಫೆ.10 ರಂದು ಈ ಸಂಬಂಧ ಆದೇಶ ಹೊರಡಿಸಿದ್ದು, ಕಾಯ್ದೆ ಜಾರಿಗೆ ಕಾರವಾರ ಉಪವಿಭಾಗಾಧಿಕಾರಿಯನ್ನು ಸಕ್ಷಮ ಪ್ರಾಧಿಕಾರಿ ಎಂದು ನೇಮಿಸಿ ಆದೇಶ ಹೊರಡಿಸಿದ್ದಾರೆ.

ಅಕ್ರಮ ನಡೆಸಿರುವವರ ಆಸ್ತಿಗಳನ್ನು ಮುಟ್ಟುಗೋಲು ಹಾಕಿಕೊಂಡು ಗ್ರಾಹಕರಿಗೆ ಠೇವಣಿ ಹಣ ಮರಳಿಸುವಲ್ಲಿ ಇದು ಮಹತ್ವದ ಹೆಜ್ಜೆಯಾಗಿದೆ. ಶೀಘ್ರ ಕ್ರಮ ವಹಿಸುವಂತೆ ಕಾರವಾರ ಎಸಿ ಅವರಿಗೆ ಮನವಿ ಮಾಡಿದ್ದೇವೆ ಎಂದು ವಂಚಿತ ಗ್ರಾಹಕರ ಸಂಘದ ಕಾರ್ಯದರ್ಶಿ ಗಜೇಂದ್ರ ನಾಯ್ಕ ತಿಳಿಸಿದರು. ಸಂಘದ ಅಧ್ಯಕ್ಷ ಹೂವಪ್ಪ ಎಚ್ ದೊಡ್ಡಣ್ಣವರ್, ಸಹ ಕಾರ್ಯದರ್ಶಿ ಕೃಷ್ಣಾನಂದ ವಿ.ನಾಯ್ಕ, ಖಜಾಂಚಿ ಸಾಯಿನಾಥ ಎಲ್.ಮೇತ್ರಿ, ಸದಸ್ಯರಾದ ಆರ್.ಎಂ.ನಾಯ್ಕ, ಗಜಾನನ ನಾಯಕ, ಸಾಯಿನಾಥ ಮೇತ್ರಿ ಸುದ್ದಿಗೋಷ್ಠಿಯಲ್ಲಿದ್ದರು.

ಸದಾಶಿವಗಡದಲ್ಲಿ ಮುಖ್ಯ ಕಚೇರಿ ಹೊಂದಿದ್ದು ಜಿಲ್ಲೆಯ ವಿವಿಧೆಡೆ 13 ಶಾಖೆಯನ್ನು ಹೊಂದಿದ್ದ ಜೈ ದುರ್ಗಾ ಮಾತಾ ಸೌಹಾರ್ದ ಸಹಕಾರಿಯಲ್ಲಿ ಸುಮಾರು 6 ಸಾವಿರ ಠೇವಣಿದಾರರು 56 ಕೋಟಿ ರೂ. ಠೇವಣಿ ಇಟ್ಟಿದ್ದರು. ಆದರೆ, ಸಹಕಾರಿಯ ಕಾರ್ಯನಿರ್ವಾಹಕ ನಿರ್ದೇಶಕ ಲಿಂಗರಾಜ ಕಲ್ಗುಟಕರ್ ಇತರ ನಿರ್ದೇಶಕರು, ಸೇರಿ ಅವ್ಯವಹಾರ ನಡೆಸಿದ್ದರು. ನಕಲಿ ದಾಖಲೆ ಸೃಷ್ಟಿಸಿ ಅವರದ್ದೇ ಕುಟುಂಬದ ಹೆಸರಿನಲ್ಲಿ ಸುಮಾರು 40.70 ಕೋಟಿ ರೂ. ಸಾಲ ತೆಗೆದು ಸಂಘವನ್ನು ಆರ್ಥಿಕ ನಷ್ಟಕ್ಕೆ ಕೊಂಡೊಯ್ದಿದ್ದರು. ಠೇವಣಿದಾರರಿಗೆ ಹಣ ಮರಳಿಸದೇ ಮೋಸ ಮಾಡಿದ ಬಗ್ಗೆ ಆಕ್ಷೇಪ ಕೇಳಿ ಬಂದಿತ್ತು. ಸೌಹಾರ್ದ ಸಹಕಾರಿ ಅಭಿವೃದ್ಧಿ ಅಧಿಕಾರಿ ಸಂತೋಷ ಅವರು ಪ್ರಾಥಮಿಕ ತನಿಖೆ ನಡೆಸಿ ಚಿತ್ತಾಕುಲಾ ಠಾಣೆಗೆ ಈ ಸಂಬಂಧ ದೂರು ನೀಡಿದ್ದರು. ಪ್ರಕರಣದ ಜವಾಬ್ದಾರಿ ವಹಿಸಿಕೊಂಡ ಸಿಐಡಿ ಲಿಂಗರಾಜ ಕಲ್ಗುಟಕರ್ ಸೇರಿ ಮೂವರನ್ನು ಬಂಧಿಸಿ ತನಿಖೆ ನಡೆಸಿದ್ದ ಚಾರ್ಜ್ ಶೀಟ್ ದಾಖಲಿಸಿದೆ.

ಸಂಘದ ಜವಾಬ್ದಾರಿ ವಹಿಸಿಕೊಂಡ ಸೌಹಾರ್ದ ಸಹಕಾರಿ ಅಽಕಾರಿ ಸಂತೋಷ ಅವರು ವರದಿ ನೀಡಿದ್ದು, ಈ ಪ್ರಕರಣದಲ್ಲಿ ಠೇವಣಿದಾರರ ಹಣ ವಸೂಲಾಗಬೇಕಾದರೆ ಕೆಪಿಐಡಿ ಕಾಯ್ದೆ ಜಾರಿ ಮಾಡಬೇಕು ಎಂದು ಜಿಲ್ಲಾಧಿಕಾರಿ ಅವರ ಮೂಲಕ ಪ್ರಸ್ತಾವನೆ ಕಳಿಸಿದ್ದರು. ಅದರಂತೆ ಕ್ರಮವಾಗಿದೆ.

ಶೇ.12.5 ರಷ್ಟು ಬಡ್ಡಿ ನೀಡುವುದಾಗಿ ಲಿಂಗರಾಜ ಕಲ್ಗುಟಕರ್ ನಂಬಿಸಿದ್ದ. ಇದರಿಂದ ನಿವೃತ್ತರು. ಕೂಲಿ ಕಾರ್ಮಿಕರು ಹೆಚ್ಚಿನ ಸಂಖ್ಯೆಯಲ್ಲಿ ಹಣ ಹೂಡಿಕೆ ಮಾಡಿದ್ದರು. ಆದರೆ, ಈಗ ಅವರೆಲ್ಲ ದಿಕ್ಕು ತೋಚದಂತಾಗಿದ್ದಾರೆ. ಈ ಸೊಸೈಟಿಗಾಗಿ ಪಿಗ್ಮಿ ಸಂಗ್ರಹಿಸುತ್ತಿದ್ದವರ ಮನೆಗೆ ಠೇವಣಿದಾರರು ನುಗ್ಗುತ್ತಿದ್ದಾರೆ. ಈ ಗಲಾಟೆಯಲ್ಲಿ ಇಬ್ಬರು ಪಿಗ್ಮಿ ಸಂಗ್ರಾಹಕರು ಹೃದಯಾಘಾತದಿಂದ ಮೃತಪಟ್ಟರು. ಇದರಿಂದ ಜನರ ಹಣ ತಿಂದವರಿಂದ ಹಣ ವಸೂಲಿ ಮಾಡುವ ಜೊತೆಗೆ ಅವರಿಗೆ ಕಠಿಣ ಶಿಕ್ಷೆಯಾಗಬೇಕು. ಕೇವಲ ಎಂಡಿ ಬಂಧನವಾದರೆ ಸಾಲದು 17 ಜನ ನಿರ್ದೇಶಕರು ಹಾಗೂ ಎಲ್ಲ ಶಾಖಾ ವ್ಯವಸ್ಥಾಪಕರು ಸೇರಿ ನಾವು 31 ಜನರ ವಿರುದ್ಧ ದೂರು ಕೊಟ್ಟಿದ್ದು ಎಲ್ಲರನ್ನೂ ಬಂಽಸಬೇಕು ಎಂದು ವಂಚಿತ ಗ್ರಾಹಕರ ಸಂಘದ ಕಾರ್ಯದರ್ಶಿ ಡಾ.ಗಜೇಂದ್ರ ನಾಯ್ಕ ಒತ್ತಾಯಿಸಿದರು.