ಉತ್ತರ ಕನ್ನಡ, ಶಿವಮೊಗ್ಗ ಸೇರಿದಂತೆ ರಾಜ್ಯದ ಅಡಿಕೆ ಬೆಳೆಯನ್ನು ಮಹಾರಾಷ್ಟ್ರ ಮೂಲಕ ಉತ್ತರ ಪ್ರದೇಶ, ಗುಜರಾತ್, ಮಧ್ಯ ಪ್ರದೇಶ ರಾಜಸ್ತಾನ ಇನ್ನಿತರ ರಾಷ್ಟ್ರಗಳಿಗೆ ಕಳಿಸಿಕೊಡಲಾಗುತ್ತಿದೆ. ಆದರೆ, ಕಳೆದ 10 ದಿನಗಳ ಹಿಂದೆ ಮಹಾರಾಷ್ಟ್ರದ ಗಡಿಗಳಲ್ಲಿಯೇ ಈ ಲಾರಿಗಳ ಸಾಗಾಟಕ್ಕೆ ಅಲ್ಲಿಯ ಅಧಿಕಾರಿಗಳು ತಡೆ ಒಡ್ಡಿ ಅಡಿಕೆಗಳ ಸುರತೆಯ ಬಗ್ಗೆ ಪ್ರಯೋಗಾಲಯದಲ್ಲಿ ತಪಾಸಣೆ ನಡೆಸುವ ಬಗ್ಗೆ ಕಾರಣ ನೀಡಿದ್ದರು. ಹೀಗಾಗಿ, ರಾಜ್ಯದ 60ಕ್ಕೂ ಅಧಿಕ ಲಾರಿಗಳು ಮಹಾರಾಷ್ಟ್ರದ ವಿವಿಧ ತನಿಖಾ ಠಾಣೆಗಳಲ್ಲಿ ನಿಲ್ಲುವಂತಾಗಿತ್ತು. ಬಳಿಕ ರಾಜ್ಯದಿಂದ ಅಡಿಕೆ ಲಾರಿಗಳ ಸಾಗಾಟವೇ ಸ್ಥಗಿತಗೊಂಡಿದೆ. ಇದರ ಪರಿಣಾಮ ರಾಜ್ಯದ ಅಡಿಕೆ ಮಾರುಕಟ್ಟೆಯ ಮೇಲಾಗಿದ್ದು, ರಾಶಿ ಅಡಿಕೆ, ಚಾಲಿ ಅಡಿಕೆ ಸೇರಿದಂತೆ ದರ ಪ್ರತಿ ಕ್ವಿಂಟಾಲ್ಗೆ ಎರಡರಿಂದ ಮೂರು ಸಾವಿರ ರೂ.ವರೆಗೂ ಇಳಿಕೆಯಾಗಿದೆ. ವ್ಯಾಪಾರಸ್ಥರೂ ಸಹ ಅಡಿಕೆ ಖರೀದಿಗೆ ಹಿಂದೇಟು ಹಾಕುತ್ತಿದ್ದುದು ಒಂದೆಡೆಯಾದರೆ, ರೈತರೂ ಸಹ ಸಿದ್ಧಗೊಂಡ ಅಡಿಕೆಯನ್ನು ಮಾರುಕಟ್ಟೆಗೆ ತರಬೇಕೇ ಬೇಡವೇ ಎಂಬ ಗೊಂದಲದಲ್ಲಿದ್ದರು.
