ನದಿ ವಿರುದ್ಧದ ಕ್ರಿಯೆಯಿಂದ ಮನುಕುಲಕ್ಕೆ ಕೇಡು

ಸ್ವರ್ಣವಲ್ಲಿ ಶ್ರೀ ಗಂಗಾಧರೇಂದ್ರ ಸರಸ್ವತೀ ಮಹಾಸ್ವಾಮಿಗಳ ಆದೇಶ ಹಾಗೂ ಬೇಡ್ತಿ-ಅಘನಾಶಿನಿ ಕೊಳ್ಳ ಸಂರಕ್ಷಣಾ ಸಮಿತಿಯ ಮಾರ್ಗದರ್ಶನದಂತೆ ಈ ವಿಶಿಷ್ಟ ಕಾರ್ಯಕ್ರಮ ಆಯೋಜಿಸಲಾಗಿತ್ತು.

ವೇ. ವಿನಾಯಕ ಭಟ್ ಮತ್ತೀಹಳ್ಳಿ ಕಾರ್ಯಕ್ರಮದ ಉಪಸ್ಥಿತಿ ವಹಿಸಿ ಪೂಜಾ ವಿಧಿವಿಧಾನಗಳನ್ನು ನೆರವೇರಿಸಿ ಮಾತನಾಡಿದ ಅವರು, ಪರಿಸರವನ್ನು ಪೂಜಿಸುವುದರಿಂದ ನಮಗೆ ಸದಾ ಒಳಿತಾಗುತ್ತದೆ. ನದಿಯ ವಿರುದ್ಧದ ಯಾವುದೇ ಕ್ರಿಯೆಯು ಮನುಕುಲಕ್ಕೆ ಕೆಡುಕನ್ನು ತರುತ್ತದೆ. ಪರಿಸರ ವಿರೋಧಿ ಮನಸ್ಥಿತಿಯುಳ್ಳವರ ಮನವೊಲಿಸಿ ಅವರನ್ನು ಪ್ರಕೃತಿ ಪ್ರೇಮಿಗಳನ್ನಾಗಿ ಮಾಡುವುದು ನಮ್ಮ ಕರ್ತವ್ಯ ಎಂದರು.

ಅನಂತಮೂರ್ತಿ ಹೆಗಡೆ ಶಿರಸಿ ಮಾತನಾಡಿ, ಅಘನಾಶಿನಿ ನದಿಯನ್ನು ಯಥಾಸ್ಥಿತಿಯಲ್ಲಿ ಕಾಪಾಡುವುದು ಪ್ರತಿಯೊಬ್ಬ ನಾಗರಿಕನ ಜವಾಬ್ದಾರಿಯಾಗಿದೆ ಎಂದರು.

ಅಘನಾಶಿನಿ ಕೊಳ್ಳ ಸಂರಕ್ಷಣಾ ಸಮಿತಿಯ ಗೋಪಾಲಕೃಷ್ಣ ಹೆಗಡೆ ತಂಗಾರಮನೆ ಮಾತನಾಡಿ, ಹಂಗಾರಖಂಡದಂತಹ ಪುಟ್ಟ ಗ್ರಾಮದಲ್ಲಿ ದೊಡ್ಡ ಮಟ್ಟದ ಸಂಘಟನೆ ನಡೆದಿರುವುದು ಶ್ಲಾಘನೀಯ. ಇಂತಹ ಕಾರ್ಯಕ್ರಮಗಳು ಪ್ರತಿ ಹಳ್ಳಿಯಲ್ಲೂ ನಡೆಯಬೇಕು ಎಂದು ಕರೆ ನೀಡಿದರು.

ಸ್ವರ್ಣವಲ್ಲೀ ಮಠದ ಆಡಳಿತ ಮಂಡಳಿ ಸದಸ್ಯ ಎಂ.ಆರ್. ಹೆಗಡೆ ಬಾಳೇಜಡ್ಡಿ ಮಾತನಾಡಿ, ನಮ್ಮ ನದಿ ಮತ್ತು ನೀರನ್ನು ರಕ್ಷಿಸಲು ನಾವೇ ಶ್ರಮಿಸಬೇಕು ಎಂದರು.

ಆಯೋಜಕರಾದ ಮಂಜುನಾಥ ಎಂ. ಹೆಗಡೆ ದಂಪತಿ ಪೂಜೆ ನೆರವೇರಿಸಿದರು. ಮತ್ತೀಹಳ್ಳಿ, ಕಲ್ಗದ್ದೆ, ತ್ಯಾಗಲಿ ಮತ್ತು ಹಂಗಾರಖಂಡದ ನಾಗಚೌಡೇಶ್ವರಿ ಭಜನಾ ಮಂಡಳಿಯ ಸದಸ್ಯರು ನಡೆಸಿಕೊಟ್ಟ ಭಜನೆ ನೆರೆದಿದ್ದ ಭಕ್ತರ ಮನಸೂರೆಗೊಂಡಿತು. ಪ್ರಸಿದ್ಧ ಭಾಗವತರಾದ ಶ್ರೀನಿವಾಸ ಭಾಗವತ್, ಮದ್ದಲೆಯಲ್ಲಿ ಕುಮಾರ ಮಾಗೋಡುಜಡ್ಡಿ ಹಾಗೂ ಚಂಡೆಯಲ್ಲಿ ವಿಘ್ನೇಶ್ವರ ಗೌಡ ಕೆಸರಕೊಪ್ಪ ಅವರ ನೇತೃತ್ವದಲ್ಲಿ ನಡೆದ ಅಘನಾಶಿನಿ ಆರತಿ ಬೆಳಗಿರೆ... ಎಂಬ ಯಕ್ಷ-ಪದ್ಯ ಕಾರ್ಯಕ್ರಮದ ಪ್ರಮುಖ ಆಕರ್ಷಣೆಯಾಗಿತ್ತು.

ಯಮುನಾ ಹೆಗಡೆ ಮತ್ತು ಸುಜಾತಾ ನಾಯ್ಕ ಪ್ರಾರ್ಥಿಸಿದರು. ರಮೇಶ ಟಿ. ನಾಯ್ಕ ಕಾರ್ಯಕ್ರಮ ನಿರೂಪಿಸಿ, ನದಿಗಳು ಉಳಿದರೆ ನಾಡು ಉಳಿಯುತ್ತದೆ ಎಂಬ ಘೋಷವಾಕ್ಯದೊಂದಿಗೆ ನದಿ ರಕ್ಷಣೆಯ ಸಂಕಲ್ಪ ಬೋಧಿಸಿದರು.

ವಾಸುದೇವ ನಾಯ್ಕ ವಂದಿಸಿದರು. ನಟರಾಜ ಎಂ. ಹೆಗಡೆ, ಶಶಿಧರ ಹೆಗಡೆ, ಪ್ರಕಾಶ ಹೆಗಡೆ, ಗಣಪತಿ ಹೆಗಡೆ ಮತ್ತಿತರರು ಸಹಕರಿಸಿದರು.