ನಿವೃತ್ತ ಕಾರ್ಮಿಕರಿಗೆ ವೇತನ ಹಿಂಬಾಕಿಗೆ ಸತಾಯಿಸುತ್ತಿರುವ ಗ್ರಾಸಿಂ

ಸೋಮವಾರ ಪತ್ರಿಕಾಗೋಷ್ಠಿಯಲ್ಲಿ 40 ಕ್ಕೂ ನಿವೃತ್ತ ನೌಕರರ ಪರವಾಗಿ ಮಾತನಾಡಿದ ಯುಗಂದ್ರ ಆಲೂರಿ, ನೌಕರರ ನಿವೃತ್ತಿಯ ವಯಸ್ಸನ್ನು ಬೆಳಗಾವಿಯ ಉಪ ಕಾರ್ಮಿಕ ಆಯುಕ್ತರು ಪರಿಷ್ಕರಿಸಿ 58 ರಿಂದ 60 ಕ್ಕೆ ಏರಿಸಿ 2018 ರಲ್ಲಿ ಆದೇಶ ಹೊರಡಿಸಿದ್ದರು. ಆದರೆ, ಗ್ರಾಸಿಂ ಆಡಳಿತ ಮಂಡಳಿ ಅದನ್ನು ಕಾರ್ಮಿಕ ಆಯುಕ್ತರ ನ್ಯಾಯಾಲಯದಲ್ಲಿ ಪ್ರಶ್ನಿಸಿತ್ತು. ಅಲ್ಲಿಯೂ ಕಾರ್ಮಿಕರ ಪರವಾಗೇ ಆಗಿತ್ತು. ನಂತರ 2019 ರಲ್ಲಿ ಹೈಕೋರ್ಟ್ ಮೆಟ್ಟಿಲೇರಿತ್ತು. 

ವಿಚಾರಣೆ ನಡೆಸಿದ ಹೈಕೋರ್ಟ್, 2018 ರಿಂದ 2023 ರ ನ್ಯಾಯಾಲಯದ ಆದೇಶದವರೆಗೆ 58 ವರ್ಷದಲ್ಲಿ ನಿವೃತ್ತಿಯಾದವರಿಗೆ ಹೆಚ್ಚುವರಿ 2 ವರ್ಷಗಳ ವೇತನ ಹಾಗೂ ನೌಕರರಿಗೆ ನೀಡುವ ಎಲ್ಲ ಸೌಲಭ್ಯಗಳನ್ನು ಅರ್ಧ ಪ್ರಮಾಣದಲ್ಲಿ ನೀಡಬೇಕು ಎಂದು ಆದೇಶಿಸಿದೆ. ಹೈಕೋರ್ಟ್ ಡಿವಿಜನಲ್ ಬೆಂಚ್ ಕೂಡ ಆದೇಶವನ್ನು ಎತ್ತಿ ಹಿಡಿದಿದೆ. ಆದರೆ, ಆಡಳಿತ ಮಂಡಳಿ ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿತ್ತು. ಸುಪ್ರೀಂ ಕೋರ್ಟ್ ಗ್ರಾಸಿಂ ಆಡಳಿತ ಮಂಡಳಿಯ ಅರ್ಜಿಯನ್ನು ಇದೇ ವರ್ಷ ಮೇ ತಿಂಗಳಲ್ಲಿ ವಜಾ ಮಾಡಿದೆ. 

ಆದರೆ, ಆಡಳಿತ ಮಂಡಳಿ ನ್ಯಾಯಾಲಯದ ಆದೇಶದಂತೆ ವೇತನ ಹಿಂಬಾಕಿ ಹಾಗೂ ಎಲ್ಲ ಸೌಲಭ್ಯಗಳನ್ನು 5 ತಿಂಗಳು ಕಳೆದರೂ ನೀಡಿಲ್ಲ. ಕೆಲವಷ್ಟೇ ಸೌಲಭ್ಯಗಳನ್ನು ನೀಡುತ್ತೇವೆ. ಆದರೆ, ಅದಕ್ಕೆ ಮುಚ್ಚಳಿಕೆ ಬರೆದುಕೊಡಬೇಕು ಎಂದು ಹೇಳುತ್ತಿದೆ. 61 ರಲ್ಲಿ 10 ನೌಕರರು ಮಾತ್ರ ಅವರ ಷರತ್ತುಗಳಿಗೆ ಒಪ್ಪಿ ಚೆಕ್ ಪಡೆದಿದ್ದಾರೆ. ಉಳಿದವರು ಪಡೆದುಕೊಂಡಿಲ್ಲ. 

ಕಾರ್ಮಿಕ ಉಪ ಆಯುಕ್ತರಿಗೂ ನಾವು ಸಮಸ್ಯೆ ವಿವರಿಸಿದ್ದೇವೆ. ನ್ಯಾಯಾಲಯದ ಆದೇಶದಂತೆ ನಮಗೆ ವೇತನ ಹಿಂಬಾಕಿಯನ್ನು ಕಂಪನಿ ನೀಡಬೇಕು ಎಂಬುದು ನಮ್ಮ ಒತ್ತಾಯವಾಗಿದೆ ಎಂದರು. ವನದೇವ ಹರಿಕಂತ್ರ, ಗೋಪಾಲಕೃಷ್ಣ ನಾಯಕ, ಲಕ್ಷ್ಮೀಕಾಂತ  ಬಿಣಗೇಕರ್, ಕಿರಣ ಗಾಂವಕರ್, ಸುದೇಶ ಕುಲಕರ್ಣಿ, ರಾಮಕೃಷ್ಣ ಡಿ.ನಾಯಕ, ಮನ್ಸೂರ್ ಮಾಂಡ್ಲಿಕ್, ದೀಪಕ್ ಶಿರೋಡಕರ್ ಇದ್ದರು.