ವಾಹನದಲ್ಲಿ ಸಾಗಿಸುತ್ತಿದ್ದ ಹುಲ್ಲಿಗೆ ಬೆಂಕಿ

ಸೊರಬ ತಾಲೂಕಿನ ಎಣ್ಣೆಕೊಪ್ಪದಿಂದ ಟಾಟಾಏಸ್ ವಾಹನದಲ್ಲಿ ಹುಲ್ಲು ತುಂಬಿಕೊಂಡು ಬಂದು ಗಾಣಗೇರಿ ರಸ್ತೆ ಮೂಲಕ ವ್ಯಾಪಾರಕ್ಕೆ ಹೋಗುತ್ತಿದ್ದಾಗ ಬೆಂಕಿ ತಗುಲಿರುವುದು ಗಮನಕ್ಕೆ ಬಾರದೆ ವಾಹನ ಚಲಾಯಿಸಿ ಕೊಂಡು ಹೋಗುತ್ತಿದ್ದರು. ಸ್ಥಳೀಯರು ಹುಲ್ಲಿಗೆ ಬೆಂಕಿ ತಗುಲಿದ್ದು ನೋಡಿ ಕೂಗಿದಾಗ ಹುಲ್ಲಿನ ಗಾಡಿಯವರ ಗಮನಕ್ಕೆ ಬಂದಿದೆ. ಘಟನೆ ನಡೆದ ಸ್ವಲ್ಪ ದೂರದಲ್ಲಿ ಇರುವ ಮನೆಯ ಸಮೀಪ ವಾಹನ ನಿಲ್ಲಿಸಿ, ಸ್ಥಳೀಯರ ಸಹಕಾರದಿಂದ ಬೆಂಕಿ ಹೊತ್ತಿರುವ ಹುಲ್ಲನ್ನು ಕೆಳಗೆ ಹಾಕಿ, ಹತ್ತಿರದ ಮನೆಯಿಂದ ನೀರು ತಂದು ವಾಹನಕ್ಕೆ ಬೆಂಕಿ ಹಬ್ಬದಂತೆ ತಡೆದಿದ್ದಾರೆ.

ವಾಹನಕ್ಕೆ ಬೆಂಕಿ ಬಿದ್ದಿದ್ದು ಗಮನಕ್ಕೆ ಬಂದ ತಕ್ಷಣ ಅಗ್ನಿಶಾಮಕ ಠಾಣೆಗೂ ಮಾಹಿತಿ ನೀಡಲಾಗಿತ್ತು. ಸ್ಥಳಕ್ಕೆ ಆಗಮಿಸಿದ ಅಗ್ನಿಶಾಮಕ ಸಿಬ್ಬಂದಿ ಕೆಳಗೆ ರಾಶಿ ಬಿದ್ದಿರುವ ಹುಲ್ಲಿಗೆ ತಗುಲಿದ ಬೆಂಕಿಯನ್ನು ಆರಿಸಿದ್ದಾರೆ.