ಕಾರವಾರದ ಹೋಟೆಲ್‌ಗಳಿಗೂ ತಟ್ಟಿದ ಕಮರ್ಷಿಯಲ್‌ ಗ್ಯಾಸ್‌ ಸಿಲಿಂಡರ್‌ ಅಭಾವದ ಬಿಸಿ

ಶಿರಸಿ, ಭಟ್ಕಳ, ಕುಮಟಾ ಹಾಗೂ ಹಳಿಯಾಳದಲ್ಲಿ ಸದ್ಯ ಇಂದಿಗೆ ಸಮಸ್ಯೆ ಉಂಟಾಗಿಲ್ಲ. ಇನ್ನೊಂದು ದಿನ ವಾಣಿಜ್ಯ ಸಿಲಿಂಡರ್ ಪೂರೈಕೆ ಸ್ಥಗಿತವಾದಲ್ಲಿ ಅದು ಊಟದ ಮೆನುವಿನಲ್ಲಿ ಪರಿಣಾಮ ಬೀರುವ ಸಾಧ್ಯತೆ ಇದೆ. ಮತ್ತೆ ವಾಣಿಜ್ಯ ಸಿಲಿಂಡರ್ ಪೂರೈಕೆಯಾಗದೇ ಇದ್ದರೆ ಊಟ, ತಿಂಡಿಯ ಮೆನುವಿನಲ್ಲಿ ಕೆಲವು ಉತ್ಪನ್ನ ಕಡಿಮೆ ಮಾಡುವುದು ಅನಿವಾರ್ಯ ಎನ್ನುತ್ತಾರೆ ಕುಮಟಾ ಪಾಂಡುರಂಗ ಹೋಟೆಲ್‌ನ ಮಾಲೀಕ ಆನಂದ ಪೈ.

ವಾಣಿಜ್ಯ ಸಿಲಿಂಡರ್ ಪೂರೈಕೆಯನ್ನು ನಮಗೆ ಸ್ಥಗಿತ ಮಾಡಲಾಇದೆ. ಸದ್ಯ ನಮ್ಮಲ್ಲಿ ಸಂಗ್ರಹ ಇರುವ ಸಿಲಿಂಡರ್‌ಗಳಿAದ ವಿತರಕರಿಗೆ ಮಿತಿಯಲ್ಲಿ ಪೂರೈಕೆ ಮಾಡುತ್ತಿದ್ದೇವೆ. ಇನ್ನೂ ಪರಿಸ್ಥಿತಿ ಹೀಗೇ ಮುಂದುವರಿದರೆ ಸಮಸ್ಯೆ ಉಂಟಾಗಬಹುದು ಎನ್ನುತ್ತಾರೆ. ಕಾರವಾರದ ಸೋನಿ ವಿತರಣಾ ಏಜೆನ್ಸಿ ಮಾಲೀಕ ಸುನೀಲ ಸೋನಿ.

ನಮಗೆ ವಾಣಿಜ್ಯ ಸಿಲಿಂಡರ್ ಪೂರೈಕೆ ಸ್ಥಗಿತವಾಗಿ ಮೂರು ದಿನವಾಗಿದೆ. ಇದರಿಂದ ನಾವು ಹೋಟೆಲ್‌ಗಳಿಗೂ ಪೂರೈಕೆ ಸ್ಥಗಿತ ಮಾಡುವುದು ಅನಿವಾರ್ಯ. ಆದರೆ, ಗೃಹ ಬಳಕೆ ಸಿಲಿಂಡರ್ ಪೂರೈಕೆಯಾಗಲಿದ್ದು, ಜನ ಆತಂಕಪಡುವ ಅವಶ್ಯಕತೆ ಇಲ್ಲ ಎಂದು ಭಟ್ಕಳದ ರಂಜನ್ ಇಂಡೇನ್ ಗ್ಯಾಸ್ ಏಜೆನ್ಸಿ ಮಾಲಕಿ ಶಿವಾನಿ ಶಾಂತಾರಾಮ ತಿಳಿಸಿದ್ದಾರೆ.

ಗೃಹ ಬಳಕೆ ಸಿಲಿಂಡರ್ ಬುಕ್ಕಿಂಗ್‌ಗೆ ಮಿತಿ ಹೇರಲಾಗಿದ್ದು, ಒಮ್ಮೆ ಬುಕ್ ಆದ ನಂತರ 25 ದಿನಗಳ ನಂತರವೇ ಮತ್ತೊಂದು ಸಿಲಿಂಡರ್ ಬುಕ್ ಮಾಡುವಂಥ ವ್ಯವಸ್ಥೆ ಜಾರಿ ಮಾಡಲಾಗಿದೆ. ಒಟಿಪಿ ಇಲ್ಲದೇ ಯಾರಿಗೂ ಸಿಲಿಂಡರ್ ಪೂರೈಸದಂತೆ ಆದೇಶ ಬಂದಿದೆ ಎನ್ನುತ್ತಾರೆ ವೆಂಕಟೇಶ್ವರ ಗ್ಯಾಸ್ ಏಜೆನ್ಸಿ ಮಾಲೀಕ ವಿಜಯ ಕುಮಾರ ನಾಯ್ಕ.