ಅವಿನಾಶಿಯಾಗಲಿ ಅಘನಾಶಿನಿ ಅಪ್ಪೆಮಿಡಿ

ಹೌದು, ಅಘನಾಶಿನಿ ನದಿ ತಟದಲ್ಲಿ ಬೆಳೆಯುವ ವಿಶೇಷ ತಳಿಯ ಮಾವಿನ ಮಿಡಿಗಳ ದಾಖಲೀಕರಣ ಕಾರ್ಯವನ್ನು ಇಲ್ಲಿಯ ವೃಕ್ಷ ಲಕ್ಷ ಆಂದೋಲನದ ಸದಸ್ಯರು, ಪರಿಸರ ತಜ್ಞರು ಹಾಗೂ ವಿಶೇಷವಾಗಿ ಮಾವಿನ ತಳಿಗಳ ರಕ್ಷಣೆಯಲ್ಲಿ ಆಸಕ್ತಿ ಬೆಳೆಸಿಕೊಂಡಿರುವ ಕೃಷಿಕರು ಈಗ ನಡೆಸಿದ್ದಾರೆ. ಅಘನಾಶಿನಿ ಅಪ್ಪೆಮಿಡಿ ಅವಿನಾಶಿಯಾಗಬೇಕು ಎಂಬುದು ಈ ತಂಡದ ಸದುದ್ದೇಶ. ನದಿ ಹರಿಯುವ ಪ್ರದೇಶದಾದ್ಯಂತ ಮೂರು ದಿನ ಪಾದಯಾತ್ರೆ ನಡೆಸಿ, ಇಲ್ಲಿಯ ಅಪ್ಪೆಮಿಡಿಗಳ ವಿಶೇಷತೆಗಳನ್ನು ದಾಖಲಿಸುವ ಕಾರ್ಯವನ್ನು ಸೋಮವಾರ ಆರಂಭಿಸಿದೆ.

ಅಘನಾಶಿನಿ ನದಿ ತಟ ಅಪ್ಪೆಮಿಡಿಗಳ ಆಗರ. ಆದರೆ, ಎಷ್ಟು ಮರಗಳಿವೆ? ಎಷ್ಟು ವಿಧಗಳಿವೆ ಎಂಬ ಸ್ಪಷ್ಟತೆ ಇರಲಿಲ್ಲ. ಪ್ರತಿ ವರ್ಷ ತಮಗಾಗಿ, ನೆಂಟರಿಷ್ಟರಿಗಾಗಿ ಮಾವಿನ ಮಿಡಿಗಳ ಕಟಾವು ಮಾಡುವವರು, ಮಾರಾಟಕ್ಕೆಂದು ಮಿಡಿ ಕೊಯ್ಯುವವರು ಮಾತ್ರ ತಮ್ಮ ವ್ಯಾಪ್ತಿಯಲ್ಲಿ ಸಂಗ್ರಹಿಸುತ್ತಿದ್ದರು. ಕೆಲ ತಿಂಗಳುಗಳಿಂದ ಅಘನಾಶಿನಿಯನ್ನು ವೇದಾವತಿ ನದಿಗೆ ಜೋಡಿಸುವ ಪ್ರಸ್ತಾಪ ಕೇಳಿಬರುತ್ತಿವೆ. ಅಘನಾಶಿನಿ ನದಿಗೆ ಡ್ಯಾಂ ನಿರ್ಮಿಸುತ್ತಾರೆಂಬ ಆತಂಕ ಸ್ಥಳೀಯರನ್ನು ಕಾಡಿದೆ. ಪರಿಸರಕ್ಕೆ ಹಾನಿಯಾಗುವ ವಿಷಯ ಮಾತ್ರ ಇದುವರೆಗೆ ಚರ್ಚೆಯಾಗುತ್ತಿತ್ತೇ ಹೊರತು ಇಲ್ಲಿಯ ಅಪರೂಪದ ಸಸ್ಯ ಪ್ರಭೇದಗಳು, ವಿಶೇಷವಾಗಿ ಅಪ್ಪೆ ಮಿಡಿಗಳ ವೈವಿಧ್ಯತೆ, ಮರಗಳ ಬಗ್ಗೆ ಯಾವುದೇ ಪ್ರಸ್ತಾಪವಾಗುತ್ತಿರಲಿಲ್ಲ. ಈ ಹಿನ್ನೆಲೆಯಲ್ಲಿ ಅಘನಾಶಿನಿ ನದಿಯ ಅಪ್ಪೆಮಿಡಿಗಳ ಸಂರಕ್ಷಣೆಗೆ ಜೀವ ವೈವಿಧ್ಯತಾ ತಾಣ ಎಂದು ಘೋಷಣೆ ಮಾಡಲು ಪ್ರಸ್ತಾವನೆ ಸಲ್ಲಿಸಲಾಗಿತ್ತು. ಪ್ರಸ್ತಾವನೆಗೆ ಅಗತ್ಯ ದಾಖಲೀಕರಣಕ್ಕಾಗಿ ಪಾದಯಾತ್ರೆ ಮೂಲಕ ಮಾಹಿತಿ ಕಲೆ ಹಾಕಲಾಗುತ್ತಿದೆ.

ಅಘನಾಶಿನಿ ನದಿಯ ಅಪ್ಪೆ ಮಿಡಿಗಳ ಅಧ್ಯಯನ, ದಾಖಲೀಕರಣಕ್ಕೆ ಹೆಚ್ಚಿನ ಸಮಯಬೇಕು. ಈ ಹಿನ್ನೆಲೆಯಲ್ಲಿ ಅಧ್ಯಯನ ತಂಡವನ್ನು ವಿಶೇಷವಾಗಿ ತರಬೇತುಗೊಳಿಸಲಾಗಿದೆ. ನದಿಯ ಎರಡೂ ಕಡೆಗಳಲ್ಲಿ ಪ್ರತ್ಯೇಕ ತಂಡ ಪಾದಯಾತ್ರೆ ನಡೆಸಿ, ಕಂಡುಬಂದ ಮಾವು, ಅಪ್ಪೆ ಮರಗಳ ದಾಖಲೀಕರಣ ಮಾಡುತ್ತಿವೆ. ಪ್ರತಿ ಮರದ ಸುತ್ತಳತೆ ಎಷ್ಟಿದೆ, ಮರದ ಆಯಸ್ಸು ಎಷ್ಟಿರಬಹುದು, ಯಾವ ತಳಿಯ ಅಪ್ಪೆಮರ ಎಂಬುದನ್ನು ದಾಖಲಿಸಿಕೊಳ್ಳಲಾಗುತ್ತಿದೆ. ಅಧ್ಯಯನ ತಂಡದಲ್ಲಿ ಅನುಭವಿ ಕೃಷಿಕರು, ಪರಿಸರ ತಜ್ಞರು, ಶಿಕ್ಷಕರು, ಮಹಿಳೆಯರು, ಸ್ಥಳೀಯ ಅನುಭವಿಗಳೂ ಸೇರಿದಂತೆ 40ಕ್ಕೂ ಅಧಿಕ ಜನರಿದ್ದಾರೆ.

ಮೊದಲ ದಿನವಾದ ಸೋಮವಾರ ಶಿರಸಿ, ಸಿದ್ದಾಪುರ ಗಡಿ ಪ್ರದೇಶವಾದ ಸರಕುಳಿಯಲ್ಲಿ ಮಹಿಷಾಸುರ ಮರ್ದಿನಿ ದೇವಿಗೆ ಪೂಜೆ ಸಲ್ಲಿಸಿ ಪಾದಯಾತ್ರೆ ಆರಂಭಿಸಿದ್ದು, ಸಬಕಾರು, ಮುಚ್ಗುಳಿ, ನಾಡಗುಳಿ, ಬಾಳಗಾರ, ಮಾರಿಗದ್ದೆ ಮುತ್ಮುರ್ಡುವರೆಗೆ ಒಟ್ಟೂ 12 ಕಿ.ಮೀ. ಸಂಚರಿಸಿ ಅಧ್ಯಯನ ನಡೆಸಿದೆ. ಮಂಗಳವಾರ ಮಕರಕಟ್ಟು, ನೇರ್ಲಮನೆ, ಮಾಣಿ ಸೇತುವೆ, ಹೆಗ್ಗಾರ, ಗೇಜಕಟ್ಟಿನವರೆಗೆ ಒಟ್ಟೂ 11 ಕಿ.ಮೀ. ಪಾದಯಾತ್ರೆ ಅಧ್ಯಯನ ಹಾಗೂ ದಾಖಲೀಕರಣ ನಡೆದಿದೆ. ಬುಧವಾರ ಕರ್ಜಗಿ, ತಂಗಾರಮನೆ, ನಾಗರಕೋಡಿಯವರೆಗೆ ಒಟ್ಟೂ 8 ಕಿ.ಮೀ. ಪಾದಯಾತ್ರೆ ನಡೆಯಲಿದೆ.

----------

"