ಹೊಂಡ ತಪ್ಪಿಸಲು ರಥಕ್ಕೆ ಸ್ಟೇರಿಂಗ್ ಜೋಡಿಸಿ

ಗೋಕರ್ಣ: ರಸ್ತೆಯನ್ನು ತುಂಬಿಕೊಂಡಿರುವ ಹೊಂಡ ಗುಂಡಿಗಳನ್ನು ಸ್ಟೇರಿಂಗ್‌ನಿಂದ  ತಪ್ಪಿಸಿಕೊಂಡು ವಾಹನಗಳು ಪಾರಾಗುತ್ತಿರುವ ಸರ್ಕಸ್ ಜಿಲ್ಲೆಯ ಹೆಚ್ಚಿನ ಕಡೆಗಳಲ್ಲಿ ಕಾಣ ಸಿಗುತ್ತಿದೆ. 

ವಾಹನಗಳಿಗೆ ಸ್ಟೇರಿಂಗ್ ಇವೆ ಸರಿ.

ಆದರೆ ಜಿಲ್ಲೆಯ ವಿವಿಧೆಡೆಯ ಮಂದಿರಗಳಲ್ಲಿ ಇಂತಹದ್ದೇ ಹದ ಮೀರಿದ ಹೊಂಡ ಮಯ ರಸ್ತೆಗಳಲ್ಲಿ ವಿವಿಧ ಆಕಾರ ಮತ್ತು ಬೃಹತ್ ಗಾತ್ರದ ರಥಗಳನ್ನು ಎಳೆಯುವ ಅನಿವಾರ್ಯ ಅಸಾಹಯಕತೆ ಎದುರಾದರೆ ಪರಿಹಾರವೇನು? 

ಪ್ರತಿ ಮಾಸದ ಅಮಾವಾಸ್ಯೆ ಮತ್ತು ವಿವಿಧ ವಿಶೇಷ ದಿನಗಳಲ್ಲಿ ಶ್ರೀಮಹಾಬಲೇಶ್ವರ ರಥೋತ್ಸವ ನಡೆಯುವುದರಿಂದ ಇಲ್ಲಿನ ಮಂದಿರ ಸಮೀಪದ ಮುಖ್ಯ ರಸ್ತೆಗೆ ರಥ ಬೀದಿ ಎಂಬ ಅಭಿನಾಮವಿದೆ. 

ಶ್ರೀದೇವರ ಆಗಮೋಕ್ತ ಆಚರಣೆಗಳ ಪ್ರಧಾನ ರಸ್ತೆಯಾದ ಈ ಬೀದಿ ರಥ ಎಳೆಯಲು ಸಾಧ್ಯವಿಲ್ಲದಷ್ಟು ಹೊಂಡ ಗರ್ಭಿತವಾದ ದುರ್ಗತಿಯಲ್ಲಿದೆ. 

ನ.5 ಬುಧವಾರ ರಾತ್ರಿ ಮಳೆಗಾಲದ ತರುವಾಯದ ಮೊದಲ ರಥೋತ್ಸವ ನಡೆಯಲಿದೆ.

ಆದರೆ ಉದ್ದಕ್ಕೂ ಸಾಲಾಗಿರುವ ಹೊಂಡಗಳಿಂದ ರಥವನ್ನು ತಪ್ಪಿಸುವುದು ಹೇಗೆ ಎನ್ನುವ ಸಮಸ್ಯೆ ಎದುರಾಗಿ ಸಂಬಂಧಿಸಿದ ಲೋಕೋಪಯೋಗಿ ಇಲಾಖೆಯನ್ನು ಸ್ಥಳೀಯ ಕೆಲವರು ಸಂರ್ಕಿಸಿದರು. 

ಆದರೆ ಸೋಮವಾರ ರಾತ್ರಿ ವರೆಗೂ ಮಳೆಯಿದ್ದ ಹಿನ್ನೆಲೆಯಲ್ಲಿ ಅವರಿಂದ ಸಮಂಜಸ ಪರಿಹಾರದ ಭರವಸೆ ದೊರೆಯಲಿಲ್ಲ.

ಹೀಗಾಗಿ ತುರ್ತಾಗಿ ರಸ್ತೆ ದುರಸ್ತಿಗೆ ಮುಂದಾದ ಸ್ಥಳೀಯರಾದ ತಾಪಂ ಮಾಜಿ ಸದಸ್ಯ ಮಹೇಶ ಶೆಟ್ಟಿ,ಗ್ರಾಪಂ ಸದಸ್ಯ ಪ್ರಭಾಕರ ಪ್ರಸಾದ ಕೆಲವು ಅಗತ್ಯ ಸಲಕರಣೆ ಒದಗಿಸಿ ಗುತ್ತಿಗೆದಾರ ಹರೀಶ ನಾಯಕ ಅವರ ಕಾರ್ಮಿಕರು ಹಾಗೂ ಜಲ್ಲಿ ಸಹಕಾರದೊಂದಿಗೆ ಮಂಗಳವಾರ ಮಧ್ಯಾಹ್ನ ಕಾಂಕ್ರೀಟ್ ಹಾಕಿ  ರಥ ಬೀದಿಯನ್ನು ಸರಿಪಡಿಸಲು ಮುಂದಾದರು.

ಇವರ ಪ್ರಯತ್ನದಿಂದಾಗಿ ದೇವರ ರಥೋತ್ಸವಕ್ಕೆ ಎದುರಾಗಿದ್ದ ಅಪಾಯ ಸದ್ಯಕ್ಕೆ ದೂರಾಗಿದೆ. 

ಆದರೆ ಮುಂದೆ ನಡೆಯುವ ರಥೋತ್ಸವಗಳ ಭದ್ರತೆ ಹೇಗೆ ಎನ್ನುವ ಆತಂಕ ಸ್ಥಳೀಯರನ್ನು ಕಾಡಿದೆ.