ಯಲ್ಲಾಪುರ: ಏಳು ವರ್ಷಗಳ ಹಿಂದೆ ದಾಂಡೇಲಿಯಲ್ಲಿ ವಕೀಲ, ದಾಂಡೇಲಿ ತಾಲೂಕು ಹೋರಾಟ ಸಮಿತಿ ಅಧ್ಯಕ್ಷ, ನಗರಸಭೆ ಸದಸ್ಯ, ಕಾಂಗ್ರೆಸ್ ಮುಖಂಡ ಅಜಿತ್ ನಾಯಕ ಅವರನ್ನು ಹತ್ಯೆ ಮಾಡಿದ್ದ ದಾಂಡೇಲಿಯ ಪಾಂಡುರoಗ ಕಾಂಬಳೆ ಎಂಬಾತನನ್ನು ಅಪರಾಧಿ ಎಂದು ನ್ಯಾಯಾಲಯ ತೀರ್ಪು ನೀಡಿದೆ.
ಶಿರಸಿಯ 1ನೇ ಹೆಚ್ಚುವರಿ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯದ ನ್ಯಾಯಾಧೀಶ ಕಿರಣ ಕಿಣಿ ಅವರು ಯಲ್ಲಾಪುರ ಪೀಠದಿಂದ ಶುಕ್ರವಾರ ಈ ತೀರ್ಪು ನೀಡಿದ್ದು, ಜ.13 ರಂದು ಶಿಕ್ಷೆಯ ಪ್ರಮಾಣ ಪ್ರಕಟಿಸಲಿದ್ದಾರೆ.
2018ರ ಜುಲೈ 27 ರಂದು ದಾಂಡೇಲಿಯ ಬೇಕರಿಯೊಂದರ ಎದುರು ಅಜಿತ್ ನಾಯಕ ಅವರ ಬರ್ಬರ ಹತ್ಯೆಯಾಗಿತ್ತು. ರಾಜ್ಯದಲ್ಲಿ ಇತ್ತೀಚಿನ ವರ್ಷಗಳಲ್ಲಿ ನಡೆದ ವಕೀಲರೊಬ್ಬರ ಹತ್ಯೆ ಪ್ರಕರಣ ಇದಾಗಿತ್ತು. ರಾಜ್ಯಾದ್ಯಂತ ವಕೀಲರು ಕಲಾಪದಿಂದ ದೂರ ಉಳಿದು ಪ್ರತಿಭಟನೆ ನಡೆಸಿದ್ದರು. ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸಿದ ದಾಂಡೇಲಿ ನಗರ ಠಾಣೆ ಪೊಲೀಸರು ಪಾಂಡುರಂಗ ಕಾಂಬಳೆ ಹಾಗೂ ಇನ್ನೂ ನಾಲ್ವರನ್ನು ಬಂಧಿಸಿದ್ದರು. ಅಜಿತ್ ಅವರು ವಕಾಲತ್ತು ವಹಿಸಿದ್ದ ಭೂ ವಿವಾದದ ಪ್ರಕರಣವೊಂದರ ದ್ವೇಷದಲ್ಲಿ ಈ ಕೊಲೆ ನಡೆದಿರುವುದು ಕಂಡುಬಂದಿತ್ತು. ಪಾಂಡುರoಗ ಕಾಂಬಳೆ ಜರ್ಕೀನ್ ಧರಿಸಿ ಅದರೊಳಗೆ ಕತ್ತಿಯನ್ನು ಅಡಗಿಸಿಟ್ಟುಕೊಂಡು, ಅಜಿತ ನಾಯ್ಕ ಅವರು ತಮ್ಮ ಕಚೇರಿಯಿಂದ ಹೊರ ಬರುತ್ತಿರುವಾಗಲೇ ಅವರ ಮೇಲೆ ದಾಳಿ ನಡೆಸಿದ್ದ ಎಂಬುದು ಗೊತ್ತಾಗಿತ್ತು. ಆಗಿನ ಪಿಐ ಎ.ಎ. ಮುಜಾವರ್, ಪಿ ಸಿ ಮಂಜುನಾಥ ಎಚ್ ಶೆಟ್ಟಿ ತನಿಖೆ ನಡೆಸಿ, ನ್ಯಾಯಾಲಯಕ್ಕೆ ದೋಷಾರೋಪಣ ಪಟ್ಟಿ ಸಲ್ಲಿಸಿದ್ದರು.
