ಮಾರಿಕಾಂಬೆ ದರ್ಶನ ಪಡೆದ ಭಕ್ತಸಾಗರ

ವಾರದ ಕೊನೇ ದಿನವಾದ ಶನಿವಾರ ರಾಜ್ಯದ ವಿವಿಧೆಡೆ ಹಾಗೂ ಕರಾವಳಿ ಭಾಗದ ಭಕ್ತರು ಅಧಿಕ ಸಂಖ್ಯೆಯಲ್ಲಿ ದೇವಿ ದರ್ಶನಕ್ಕೆ ಆಗಮಿಸಿದ್ದರು. 10 ಗಂಟೆ ಸುಮಾರಿಗೆ ಭಕ್ತರ ಸರತಿ ಸಾಲು ನೆರಳಿನ ವ್ಯವಸ್ಥೆಯನ್ನೂ ದಾಟಿ ಮುಂದೆ ಹೋಗಿತ್ತು. ನೂಕು ನುಗ್ಗಲು, ಜನಸಂದಣಿ ನಿಯಂತ್ರಿಸಲು ಪೊಲೀಸರು ಹರಸಾಹಸ ಪಡುವಂತಾಯಿತು. ಬಿಜೆಪಿ ರಾಜ್ಯ ಉಪಾಧ್ಯಕ್ಷೆ ರೂಪಾಲಿ ನಾಯ್ಕ, ಕುಮಟಾ ಶಾಸಕ ದಿನಕರ ಶೆಟ್ಟಿ, ನಗರಸಭೆಯ ಅಧಿಕಾರಿಗಳು, ಮಾಜಿ ಸದಸ್ಯರು ಸೇರಿದಂತೆ ಅನೇಕ ಗಣ್ಯರು ದೇವಿಯ ದರ್ಶನ ಪಡೆದುಕೊಂಡರು.

ಬೆೇಡ್ತಿ-ಅಘನಾಶಿನಿ ನದಿ ತಿರುವು ಯೋಜನೆಯನ್ನು ಸರ್ಕಾರ ಕೈಬಿಡಬೇಕು, ಶರಾವತಿ, ಬೇಡ್ತಿ-ಗಂಗಾವಳಿ, ಅಘನಾಶಿನಿ, ಶಾಲ್ಮಲಾ, ಪಟ್ಟಣದಹೊಳೆ ನದಿ ಕಣಿವೆಗಳ ಉಳಿಸು ತಾಯಿ ಎಂದು ಸ್ವರ್ಣವಲ್ಲೀ ಮಹಾಸಂಸ್ಥಾನ ಹಾಗೂ ಬೇಡ್ತಿ ಅಘನಾಶಿನಿ ಕೊಳ್ಳ ಸಂರಕ್ಷಣಾ ಸಮಿತಿಯವರು ದೇವಿಯನ್ನು ಪ್ರಾರ್ಥಿಸಿದರು. ಶ್ರೀ ಸ್ವರ್ಣವಲ್ಲೀ ಮಹಾ ಸಂಸ್ಥಾನದ ಅಧ್ಯಕ್ಷ ವಿ.ಎನ್. ಹೆಗಡೆ ಬೊಮ್ಮನಳ್ಳಿ, ಬೇಡ್ತಿ-ಅಘನಾಶಿನಿ ಸಮಿತಿ ಅಧ್ಯಕ್ಷ ಅನಂತ ಹೆಗಡೆ ಅಶೀಸರ, ಕರೂರ ಸೀಮಾ ಅಧ್ಯಕ್ಷ ಉಮಾಪತಿ ಭಟ್ ಮತ್ತಿಗಾರ, ದಾಮೋದರ ಭಟ್ ಶಿರಸಿ, ನಗರ ಭಾಗಿ ಯೋಗ ಮಂದಿರದ ಕಾರ್ಯದರ್ಶಿ ಸಿ.ಎಸ್ ಹೆಗಡೆ, ಶ್ರೀ ಮಠದ ವ್ಯವಸ್ಥಾಪಕ ಮಂಜುನಾಥ ಹೆಗಡೆ, ಇತರರು ಹಾಗೂ ಶ್ರೀ ಮಾರಿಕಾಂಬಾ ದೇವಾಲಯದ ಅಧ್ಯಕ್ಷ ಆರ್.ಜಿ. ನಾಯ್ಕ ಮತ್ತು ಆಡಳಿತ ಮಂಡಳಿಯವರು ವಿಶೇಷ ಪೂಜೆ ಪಾಲ್ಗೊಂಡಿದ್ದರು.

ವಾರದ ಕೊನೆ ದಿನವಾದ್ದರಿಂದ ಭಕ್ತರು ಅಧಿಕ ಸಂಖ್ಯೆಯಲ್ಲಿ ಜಮಾಯಿಸಿದ್ದರಿಂದ ನಗರದ ಎಲ್ಲೆಡೆಯೂ ಟ್ರಾಫಿಕ್ ಜಾಮ್ ಉಂಟಾಗಿತ್ತು. ಮಧ್ಯಾಹ್ನದ ಬಳಿಕ ಶಿರಸಿ-ಕುಮಟಾ ರಸ್ತೆ, ಶಿರಸಿ-ಯಲ್ಲಾಪುರ ರಸ್ತೆ, ಹುಬ್ಬಳ್ಳಿ ರಸ್ತೆ ಸೇರಿದಂತೆ ನಗರಕ್ಕೆ ಸಂಪರ್ಕ ಜೋಡಿಸುವ ಪ್ರಮುಖ ರಸ್ತೆಗಳೆಲ್ಲ ವಾಹನಗಳಿಂದ ತುಂಬಿಕೊಂಡಿತ್ತು. ಸಂಚಾರ ಸಿಕ್ಕು ಸರಿಪಡಿಸಲು ಪೊಲೀಸರು ಹರಸಾಹಸಪಡಬೇಕಾಯಿತು.

ಜಾತ್ರಾ ಗದ್ದುಗೆಯ ಸುತ್ತಮುತ್ತಲಿನ ಸ್ಥಳಗಳಲ್ಲಿ ಬಿಸಿಲಿನಿಂದ ಬಸವಳಿದ ಭಕ್ತರಿಗೆ ವಿವಿಧ ಸಂಘಟನೆಗಳು ತಂಪು ಪಾನೀಯ ವ್ಯವಸ್ಥೆ ಮಾಡಿದ್ದವು. ಇಲ್ಲಿಯ ಅಂಚೆ ವೃತ್ತದ ಬಳಿ ಇಂಜಿನಿಯರ್ಸ್‌ ಅಸೋಸಿಯೇಶನ್ ಶುಕ್ರವಾರ 15 ಸಾವಿರದಷ್ಟು ಮಜ್ಜಿಗೆ ಪ್ಯಾಕೇಟ್‌ಗಳನ್ನು ವಿತರಿಸಿದ್ದರೆ, ಶನಿವಾರವೂ ಅಷ್ಟೇ ಪ್ರಮಾಣದಲ್ಲಿ ವಿತರಣೆ ಮಾಡಿದೆ. ಇಂಜಿನಿಯರ್ ಶ್ಯಾಮಸುಂದರ ಭಟ್ ಸೇರಿದಂತೆ ಕಾರ್ಯಕರ್ತರ ತಂಡ ಈ ಕಾರ್ಯ ನಡೆಸುತ್ತಿದೆ. ಶಿವಾಜಿ ವೃತ್ತದಲ್ಲಿ ಹಿಂದು ಜಾಗರಣ ವೇದಿಕೆ ಉಚಿತ ಮಜ್ಜಿಗೆ ವಿತರಿಸುತ್ತಿದೆ.

ಜಾತ್ರಾ ಗದ್ದುಗೆ ಸನಿಹವೇ ಭಕ್ತರು ಚಪ್ಪಲಿ ಬಿಡುತ್ತಿರುವುದರಿಂದ ಜನಸಂದಣಿ ಇನ್ನಷ್ಟು ಹೆಚ್ಚಲು ಕಾರಣವಾಗುತ್ತಿದೆ. ಚಪ್ಪಲಿ ಬಿಟ್ಟು ದರ್ಶನಕ್ಕೆ ತೆರಳುವ ಭಕ್ತರಿಗೆ ದರ್ಶನ ಪಡೆದು ಬಂದ ಬಳಿಕ ಆ ರಾಶಿಯಲ್ಲಿ ಚಪ್ಪಲಿ ಹುಡುಕುವುದೇ ಕಷ್ಟ ಎಂಬ ಸ್ಥಿತಿ ಉಂಟಾಗುತ್ತಿದೆ. ಚಪ್ಪಲಿ ಹುಡುಕುತ್ತ ನಿಂತವರಿಂದಾಗಿ ದರ್ಶನಕ್ಕೆ ತೆರಳುವವರಿಗೆ ಸಮಸ್ಯೆ ಆಗುತ್ತಿದೆ. ಇದರ ಬದಲು ಹಳೇ ಬಸ್ ನಿಲ್ದಾಣ ಈಗ ಖಾಲಿ ಇದ್ದು, ಇಲ್ಲಿ ಚಪ್ಪಲಿ ಇಡುವ ವ್ಯವಸ್ಥೆ ಮಾಡಬಹುದಿತ್ತು ಎಂಬ ಆಗ್ರಹವೂ ಕೇಳಿಬಂದಿದೆ.