ಹೌದು! ಬಹುತೇಕ ಚರಂಡಿಗಳಲ್ಲಿ ನೀರು ಸರಾಗವಾಗಿ ಹರಿಯುತ್ತಿಲ್ಲ. ಖಾಲಿ ನಿವೇಶನಗಳಲ್ಲಿ ತ್ಯಾಜ್ಯ, ಗಿಡಗಳು, ಪ್ರಮುಖ ರಸ್ತೆಗಳಲ್ಲಿ ಕಣ್ಣಿಗೆ ರಾಚುವ ತ್ಯಾಜ್ಯದ ರಾಶಿ, ನೀರು ನಿಲ್ಲುವ ಸ್ಥಳಗಳ ಹೆಚ್ಚಳ ಸೇರಿ ಹಲವೆಡೆ ಹದಗೆಟ್ಟ ಪರಿಸ್ಥಿತಿ ಇದ್ದು ಸೊಳ್ಳೆಗಳ ಕಾಟ ಹೆಚ್ಚಳವಾಗಿದೆ. ಇದು ಸಾಂಕ್ರಾಮಿಕ ರೋಗಗಳು ಹರಡಲು ಪ್ರಮುಖ ಕಾರಣವಾಗಿದೆ.
ನಗರದಲ್ಲಿ 31 ವಾರ್ಡುಗಳಿವೆ. ಈ ಪೈಕಿ ಸರ್ ಎಂ.ವಿ.ಬಡಾವಣೆ, ಪ್ರಶಾಂತನಗರ, ಮುನ್ಸಿಪಲ್ ಲೇಔಟ್, ವಾಪಸಂದ್ರ, ಭಾರತಿ ನಗರ, ಕಂದವಾರ ಸೇರಿ ವಿವಿಧ ಪ್ರದೇಶಗಳ ಪೈಕಿ ಹಲವೆಡೆ ಮನೆಗಳ ಸಮೀಪ ಇರುವ ಖಾಲಿ ನಿವೇಶನಗಳ ಮಾಲೀಕರು ಕಾಲಕಾಲಕ್ಕೆ ನಿವೇಶನ ಸ್ವಚ್ಛತಾ ಕಾರ್ಯ ಕೈಗೊಳ್ಳುತ್ತಿಲ್ಲ. ಇದರಿಂದ ಪಾರ್ಥೇನಿಯಂ, ಮುಳ್ಳಿನ ಗಿಡಗಳು ದಟ್ಟವಾಗಿ ಬೆಳೆದು, ಇಲಿ, ಹೆಗ್ಗಣ, ಹಾವು, ಕ್ರಿಮಿ ಕೀಟಗಳ ಆವಾಸ ಸ್ಥಾನವಾಗಿ ಪರಿವರ್ತನೆಯಾಗಿವೆ.
