ಮನೆ ಸಂಪ್​ಗಳಿಗೆ ಯುಜಿಡಿ ನೀರು

ತುಮಕೂರು: ಮಹಾನಗರ ಪಾಲಿಕೆಯ 30ನೇ ವಾರ್ಡ್​ನ ವಿಜಯನಗರ ಬಡಾವಣೆಯ 20ಕ್ಕು ಹೆಚ್ಚು ಮನೆಗಳ ನೀರಿನ ಸಂಪ್​ಗಳಿಗೆ ಯುಜಿಡಿ ನೀರು ಹರಿದುಬಂದು ಅವಾಂತರ ಸೃಷ್ಟಿಯಾಗಿದೆ. ಕಳೆದ 2 ದಿನಗಳಿಂದ ಸಂಪ್​ಗಳಿಗೆ ಒಳಚರಂಡಿ ನೀರು ಸೇರಿರುವುದು ಆತಂಕಕ್ಕೆ ಕಾರಣವಾಗಿದೆ.

ವಿಜಯನಗರ 2ನೇ ಮುಖ್ಯರಸ್ತೆ 6ನೇ ಅಡ್ಡರಸ್ತೆಯ 20ಕ್ಕು ಹೆಚ್ಚು ಮನೆಗಳ ಸಂಪ್​ಗಳಿಗೆ ಭಾನುವಾರ ಯುಜಿಡಿ ನೀರು ಹರಿದಿದ್ದು ಜನರಲ್ಲಿ ಭೀತಿ ಹುಟ್ಟಿಸಿತ್ತು. ಈ ಹಿನ್ನೆಲೆಯಲ್ಲಿ ಪಾಲಿಕೆ ಮಾಜಿ ಸದಸ್ಯ ವಿಷ್ಣುವರ್ಧನ್​ ಗಮನಕ್ಕೆ ಸ್ಥಳಿಯರು ತಂದಿದ್ದರು. ತಕ್ಷಣವೇ ಪಾಲಿಕೆ ಸಿಬ್ಬಂದಿ ಗಮನಸೆಳೆದು ತಾತ್ಕಾಲಿಕವಾಗಿ ಪರಿಹಾರ ಒದಗಿಸಿದ್ದರು. ಆದರೆ, ಸೋಮವಾರವು ಯುಜಿಡಿ ನೀರು ಸಂಪ್​ಗಳಿಗೆ ಹರಿದಿದ್ದು ನಗರ ಶಾಸಕರ ಗಮನಕ್ಕೆ ತರಲಾಯಿತು.

ಶಾಸಕರ ದೌಡು: ಮನೆಗಳ ಸಂಪ್​ಗಳಿಗೆ ಯುಜಿಡಿ ನೀರು ಹರಿದಿರುವ ಸುದ್ದಿ ತಿಳಿಯುತ್ತಿದ್ದಂತೆ ಸೋಮವಾರ ಬೆಳಗ್ಗೆ ಶಾಸಕ ಜಿ.ಬಿ.ಜ್ಯೋತಿಗಣೇಶ್​ ಪಾಲಿಕೆ ಅಧಿಕಾರಿಗಳೊಂದಿಗೆ ಸ್ಥಳಕ್ಕೆ ಭೇಟಿ ನೀಡಿ, ಮನೆಗಳಿಗೆ ಭೇಟಿ ನೀಡಿ ಪರಿಶೀಲಿಸಿದರು. ತತ್​ಕ್ಷಣವೇ ಸಮಸ್ಯೆ ಬಗೆಹರಿಸಲು ಅಧಿಕಾರಿಗಳಿಗೆ ಸೂಚನೆ ನಿಡಿದರು.

ಮಳೆ ನೀರು ಚರಂಡಿಯಿಂದ ಸಂಪ್​ಗೆ ನೀರು ಹರಿದುಬರುತ್ತಿರುವುದೇ ಎಂದೂ ಅಧಿಕಾರಿಗಳು ಪರಿಶೀಲಿಸಿದರು. ಈ ಸಮಸ್ಯೆಗೆ ಕಾರಣವೇನು ಈ ಭಾಗದಲ್ಲಿ ಒಳಚರಂಡಿ ಪೈಪ್​ಲೈನ್​ ಮಾರ್ಗ ಒಡೆದುಹೋಗಿ ಕೊಳಚೆ ನೀರು ಸೋರಿಕೆಯಾಗಿ ಸಂಪ್​ಗಳಿಗೆ ಹರಿದು ಬಂದಿದೆಯೆ ಎಂದು ಪತ್ತೆ ಮಾಡಿ ಸಮಸ್ಯೆಗೆ ಪರಿಹಾರ ಕಂಡುಹಿಡಿಯುವಂತೆ ಅಧಿಕಾರಿಗಳಿಗೆ ತಾಕೀತು ಮಾಡಿದರು.

ನಗರ ಪಾಲಿಕೆ ಮಾಜಿ ಸದಸ್ಯ ವಿಷ್ಣುವರ್ಧನ್​, ಪಾಲಿಕೆ ಇಇ ಸಂದೀಪ್​ ಮತ್ತಿತರರು ಹಾಜರಿದ್ದರು.

ಡೆಂ ಭೀತಿ, ಜನರಲ್ಲಿ ಆತಂಕ !

ಯುಜಿಡಿ ಮಾರ್ಗ ಸುಸ್ಥಿತಿಯಲ್ಲಿದ್ದೂ ಕೊಳಚೆ ನೀರು ಸಂಪ್​ಗಳಿಗೆ ಹೇಗೆ ಬರುತ್ತಿದೆ ಎಂಬುದನ್ನು ಪತ್ತೆಹಚ್ಚಲು ಪಾಲಿಕೆ ಸಿಬ್ಬಂದಿ, ಕರ್ನಾಟಕ ಒಳಚರಂಡಿ ಹಾಗೂ ನೀರು ಸರಬರಾಜು ಮಂಡಳಿ ಸಿಬ್ಬಂದಿ ಹರಸಾಹಸ ಪಟ್ಟಿದ್ದು ಸಂಜೆಯಾದರೂ ಸಮಸ್ಯೆ ಮೂಲ ಕಂಡುಹಿಡಿಯಲು ಸಾಧ್ಯವಾಗಿಲ್ಲ. ಸದ್ಯಕ್ಕೆ ಸಂಪ್​ಗೆ ನೀರು ಪೂರೈಕೆ ಸ್ಥಗಿತಗೊಳಿಸಿದ್ದು ಪ್ರತ್ಯೇಕ ವ್ಯವಸ್ಥೆ ಮಾಡಲಾಗಿದೆ. ಸಾಂಕ್ರಾಮಿಕ ರೋಗಗಳ ಭೀತಿ ಹಿನ್ನೆಲೆಯಲ್ಲಿ ಶುದ್ಧ ನೀರು ಪೂರೈಕೆಗೆ ಪಾಲಿಕೆ ಸಿಬ್ಬಂದಿ ಕ್ರಮವಹಿಸಬೇಕಿದೆ.