ಗೌರಿಬಿದನೂರು: ತಾಲೂಕಿನ ದಂಡಿಗಾನಹಳ್ಳಿ ಜಲಾಶಯದಲ್ಲಿ ಮುಳುಗಿ ತೀವ್ರ ಅಸ್ವಸ್ಥಗೊಂಡಿದ್ದ ಮುಂಬೈ ಮೂಲದ ಇಬ್ಬರು ಬಾಲಕಿಯರು ಶನಿವಾರ ಸಂಜೆ ಆಸ್ಪತ್ರೆಗೆ ಸಾಗಿಸುವ ವೇಳೆ ಮಾರ್ಗಮಧ್ಯೆ ಮೃತಪಟ್ಟಿದ್ದಾರೆ.
ಮುಂಬೈ ನಗರದ ಮೀರಾ ರಸ್ತೆಯ ಜೋಯ ಪಾಟೀಲ್(14) ಹಾಗೂ ದೈಸರ್ ಖಾಂದರ್ ಪಾಡ ಪ್ರದೇಶದ ಅಲಿಯಾ ಪಾಟೀಲ್(14) ಮೃತ ಬಾಲಕಿಯರು.
ಸಹೋದರ ಸಂಬಂಧಿಗಳಾದ ಜೋಯ ಹಾಗೂ ಅಲಿಯಾ ಇಬ್ಬರೂ 9ನೇ ತರಗತಿಯಲ್ಲಿ ವ್ಯಾಸಂಗ ಮಾಡುತ್ತಿದ್ದು, ಬೇಸಿಗೆ ರಜೆ ಹಿನ್ನೆಲೆಯಲ್ಲಿ ಗೌರಿಬಿದನೂರಿನ ಮರಿಯಪ್ಪನಪಾಳ್ಯದಲ್ಲಿನ ಸಂಬಂಧಿ ಶಬ್ಬೀರ್ ಅಹಮದ್ ಮನೆಗೆ ಬಂದಿದ್ದರು. ಶನಿವಾರ ಶಬ್ಬೀರ್ ಅಹಮದ್ ಜತೆಗೂಡಿ ಜೋಯ ಹಾಗೂ ಅಲಿಯಾ ಸೇರಿ 8 ಮಕ್ಕಳು ದಂಡಿಗಾನಹಳ್ಳಿ ಜಲಾಶಯಕ್ಕೆ ಪ್ರವಾಸಕ್ಕೆಂದು ತೆರಳಿದ್ದು, ನೀರಿನಲ್ಲಿ ಆಟ ಆಡುವಾಗ ಜೋಯ ಹಾಗೂ ಅಲಿಯಾ ನೀರಿನಲ್ಲಿ ಮುಳುಗುತ್ತಿದ್ದಂತೆ ಸ್ಥಳದಲ್ಲೇ ಇದ್ದ ಶಬ್ಬೀರ್ ಅಹಮದ್ ತಕ್ಷಣವೇ ಇಬ್ಬರನ್ನೂ ರಕ್ಷಿಸಿ ಸಮೀಪದ ಮಂಚೇನಹಳ್ಳಿ ಆಸ್ಪತ್ರೆಗೆ ಕರೆದೊಯ್ಯುವ ವೇಳೆ ಜೋಯ ಹಾಗೂ ಅಲಿಯಾ ಮಾರ್ಗ ಮಧ್ಯೆ ಮೃತಪಟ್ಟಿದ್ದಾರೆ. ಅವಘಡಕ್ಕೆ ಸಂಬಂಧಿಸಿದಂತೆ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
