ಸಮಗ್ರ ಪ್ರಶಸ್ತಿ ಮುಡಿಗೇರಿಸಿಕೊಂಡ ಡಿಎಆರ್​ ತಂಡ

ತುಮಕೂರು: ಜಿಲ್ಲಾ ಸಶಸ ಮೀಸಲು ಪಡೆ ಮೈದಾನದಲ್ಲಿ 3 ದಿನಗಳಿಂದ ನಡೆದ ಜಿಲ್ಲಾ ಪೊಲೀಸರ ವಾರ್ಷಿಕ ಕ್ರೀಡಾಕೂಟಕ್ಕೆ ಬುಧವಾರ ತೆರೆಬಿತ್ತು. ಜಿಲ್ಲಾ ಸಶಸ ಮೀಡಲು ಪಡೆ (ಡಿಎಆರ್​) ಸಮಗ್ರ ಪ್ರಶಸ್ತಿ ಗೆದ್ದುಕೊಂಡಿತು. ಕೇಂದ್ರ ವಲಯದ ಪೊಲೀಸ್​ ಮಹಾನಿರೀಕ್ಷಕ (ಐಜಿಪಿ) ಲಾಭೂರಾಮ್​ ಕ್ರೀಡಾಕೂಟದ ವಿಜೇತರಿಗೆ ಬಹುಮಾನ ವಿತರಿಸಿದರು.

ಪುರುಷರ ವಿಭಾಗದಲ್ಲಿ ತುಮಕೂರು ಉಪವಿಭಾಗಛ ತಿಲಕ್​ ಪಾರ್ಕ್​ ಠಾಣೆಯ ಗುರುಪ್ರಸಾದ್​ ಸವೋರ್ತ್ತಮ ಕ್ರೀಡಾಪಟು ಕೀರ್ತಿಗೆ ಭಾಜನರಾದರು. ಮಹಿಳಾ ವಿಭಾಗದಲ್ಲಿ ಮಧುಗಿರಿ ಉಪವಿಭಾಗದ ಪಾವಗಡ ಠಾಣೆಯ ಗೀತಾ ವೈಯಕ್ತಿಕ ಚಾಂಪಿಯನ್​ ಪ್ರಶಸ್ತಿ ಮುಡಿಗೇರಿಸಿಕೊಂಡರು. 45 ವರ್ಷ ಮೇಲ್ಪಟ್ಟ ಅಧಿಕಾರಿಗಳಾ ವಿಭಾಗದಲ್ಲಿ ಎಎಸ್ಪಿ ವಿ.ಮರಿಯಪ್ಪ ವೈಯಕ್ತಿಕ ಚಾಂಪಿಯನ್​ ಪ್ರಶಸ್ತಿ ಗೆದ್ದುಕೊಂಡರೆ 45 ವರ್ಷ ವಯೋಮಾನದೊಳಗಿನ ಅಧಿಕಾರಿಗಳ ವಿಭಾಗದಲ್ಲಿ ಡಿಪಿಒ ಪಿಐ ಅವಿನಾಶ್​ ಚಾಂಪಿಯನ್​ ಪ್ರಶಸ್ತಿ ಗೆದ್ದುಕೊಂಡರು.

ಹಗ್ಗ ಜಗ್ಗಾಟ: ಪ್ರತಿ ವರ್ಷದಂತೆ ಕ್ರೀಡಾಕೂಟದ ಸಮಾರೋಪ ಸಂದರ್ಭದಲ್ಲಿ ಕೊನೆಯಲ್ಲಿ ನಡೆಯುವ ತೀವ್ರ ಜಿದ್ದಾಜಿದ್ದಿನ ಹಗ್ಗಾ ಜಗ್ಗಾಟವು ಮೈದಾನದಲ್ಲಿ ನೆರದಿದ್ದ ಪೊಲೀಸ್​ ಸಿಬ್ಬಂದಿ ಹಾಗೂ ಅವರ ಕುಟುಂಬದವರನ್ನು ತುದಿಗಾಲ ಮೇಲೆ ನಿಲ್ಲಿಸಿತ್ತು. ತೀವ್ರ ಪೈಪೋಟಿಯಲ್ಲಿ ಡಿಎಆರ್​ ಪೊಲೀಸ್​ ತಂಡ ಪ್ರಥಮ ಸ್ಥಾನ ಗಳಿಸಿತು. ಶಿರಾ ಉಪವಿಭಾಗ ತಂಡ ದ್ವೀತಿಯ ಬಹುಮಾನಕ್ಕೆ ತೃಪ್ತಿಪಟ್ಟುಕೊಂಡರು.

ಎಸ್ಪಿ ಕೆ.ವಿ.ಅಶೋಕ್​, ಎಎಸ್ಪಿ ವಿ.ಮರಿಯಪ್ಪ, ಅಬ್ದುಲ್​ ಖಾದರ್​, ನಗರ ಡಿವೈಎಸ್ಪಿ ಚಂದ್ರಶೇಖರ್​, ಡಿಎಆರ್​ ಡಿವೈಎಸ್ಪಿ ಪರಮೇಶ್​ ಉಪಸ್ಥಿತರಿದ್ದರು.

ಗೀತಾ, ಗುರುಪ್ರಸಾದ್​ ಚಾಂಪಿಯನ್​ಗಳು

ಪುರುಷರ ವಿಭಾಗದಲ್ಲಿ ಗುರಪ್ರಸಾದ್​ 800 ಮೀ., 400 ಮೀ., 1500 ಮೀಟರ್​ ಓಟದ ಸ್ಪರ್ಧೆ ಹಾಗೂ ಲಾಂಗ್​ ಜಂಪ್​ನಲ್ಲಿ ಪ್ರಥಮಸ್ಥಾನಗಳಿಸಿ ವೈಯಕ್ತಿಕ ಚಾಂಪಿಯನ್​ಶಿಪ್​ ಗೆದ್ದುಕೊಂಡರು. ಮಹಿಳಾ ವಿಭಾಗದಲ್ಲಿ ಪಾವಗಡ ಠಾಣೆಯ ಗೀತಾ 100 ಮೀ., 200 ಮೀ., 400 ಮೀ., ಹಾಗೂ ಲಾಂಗ್​ ಜಂಪ್​ನಲ್ಲಿ ಪ್ರಥಮ ಸ್ಥಾನ, ಶಾಟ್​ಪಟ್​ನಲ್ಲಿ ತೃತೀಯ ಸ್ಥಾನದೊಂದಿಗೆ ವೈಯಕ್ತಿಕ ಚಾಂಪಿಯನ್​ ಮುಡಿಗೇರಿಸಿಕೊಂಡರು.