ಜ್ಞಾನಸಿರಿ ಕ್ಯಾಂಪಸ್​ ಪರಿಸರಕ್ಕೆ ಮನಸೋತ ವಿದ್ಯಾರ್ಥಿಗಳು

ತುಮಕೂರು: ಎಲ್ಲೆಲ್ಲೂ ವಿದ್ಯಾರ್ಥಿಗಳ ದಂಡು... ಸುತ್ತೆಲ್ಲ ಹಸಿರು ಗಿಡಮರ... ಆಗಾಗ ತುಂತುರು ಮಳೆ... ವಿಜ್ಞಾನಕೇಂದ್ರದ ಆವರಣದಲ್ಲಿ ಕುತೂಹಲದ ಕಣ್ಣುಗಳು... ತುಂಬಿತುಳುಕಿದ ಶೈಕ್ಷಣಿಕ ಭವನ... ವಿದ್ಯಾರ್ಥಿನಿಲಯ, ಕಲಾಭವನಗಳಲ್ಲಿ ಚುರುಕಿನ ಓಡಾಟ... ವಾವ್​, ಎಷ್ಟೊಂದು ಸುಂದರ ವಾತಾವರಣ... ಎಲ್ಲರ ಬಾಯಲ್ಲೂ ಅದೇ ಉದ್ಗಾರ

ಇದು ಬಿದರಕಟ್ಟೆಯಲ್ಲಿರುವ ತುಮಕೂರು ವಿಶ್ವವಿದ್ಯಾನಿಲಯದ ನೂತನ ಕ್ಯಾಂಪಸ್​ ಱಜ್ಞಾನಸಿರಿಯಲ್ಲಿ ಶುಕ್ರವಾರ ಕಂಡುಬಂದ ದೃಶ್ಯ. ನೂತನ ಕ್ಯಾಂಪಸ್​ನ ಪರಿಚಯ ಮಾಡಿಕೊಡುವ ಉದ್ದೇಶದಿಂದ ನಗರ ಕ್ಯಾಂಪಸ್​ನಲ್ಲಿರುವ ಎಲ್ಲ ವಿದ್ಯಾರ್ಥಿಗಳು ಹಾಗೂ ಅಧ್ಯಾಪಕರಿಗೆ ಜ್ಞಾನಸಿರಿಗೆ ಭೇಟಿನೀಡುವ ಅವಕಾಶವನ್ನು ಕಲ್ಪಿಸಲಾಗಿತ್ತು.

ಭೌತಶಾಸ್ತ್ರ, ಸಾವಯವ ರಸಾಯನಶಾಸ್ತ್ರ, ಸಸ್ಯಶಾಸ್ತ್ರ, ಪ್ರಾಣಿಶಾಸ್ತ್ರ, ಆಹಾರ ವಿಜ್ಞಾನ, ಗಣಿತಶಾಸ್ತ್ರ, ಸೂಕ್ಷ್ಮಾಣುಜೀವಶಾಸ್ತ್ರ, ಜೈವಿಕ ತಂತ್ರಜ್ಞಾನ, ಜೀವರಸಾಯನಶಾಸ್ತ್ರ, ಕಂಪ್ಯೂಟರ್​ ವಿಜ್ಞಾನ, ಡೇಟಾ ಸೈನ್ಸ್​ ಹಾಗೂ ಎಂಸಿಎ ವಿಭಾಗಗಳು ಈಗಾಗಲೇ ಜ್ಞಾನಸಿರಿಗೆ ಕ್ಯಾಂಪಸ್​ಗೆ ಸ್ಥಳಾಂತರಗೊಂಡಿದ್ದು ಯಶಸ್ವಿಯಾಗಿ ಕಾರ್ಯನಿರ್ವಹಿಸುತ್ತಿವೆ. ನಗರ ಕ್ಯಾಂಪಸ್​ನಲ್ಲಿರುವ ಸುಮಾರು ಇಪ್ಪತ್ತು ವಿಭಾಗಗಳ ವಿದ್ಯಾರ್ಥಿಗಳು ಜ್ಞಾನಸಿರಿಗೆ ಭೇಟಿನೀಡಿ ಸಂಭ್ರಮಪಟ್ಟರು.