ಹಾಸನ ಜಿಲ್ಲಾ ಉಸ್ತುವಾರಿ ಕೈಬಿಟ್ಟ ಕೆ.ಎನ್​.ರಾಜಣ್ಣ!

ಹೂಡಾ ಅಧ್ಯಕ್ಷರ ನೇಮಕದಲ್ಲಿ ಜಟಾಪಟಿ! ಹಾಸನ ನಗರಾಭಿವೃದ್ಧಿ ಪ್ರಾಧಿಕಾರ(ಹೂಡಾ) ಅಧ್ಯಕ್ಷರ ನೇಮಕದ ವಿಷಯದಲ್ಲಿಯೂ ಅರಸೀಕೆರೆ ಶಾಸಕ ಕೆ.ಎಂ.ಶಿವಲಿಂಗೇಗೌಡ ಹಾಗೂ ಸಚಿವ ರಾಜಣ್ಣ ನಡುವೆ ದೊಡ್ಡ ಜಟಾಪಟಿಯೇ ನಡೆದಿತ್ತು. ಹೂಡಾ ಅಧ್ಯಕ್ಷ ಸ್ಥಾನವನ್ನು ಅರಸೀಕೆರೆ ತಾಲೂಕಿನ ಕುರುಬ ಸಮುದಾಯದ ಪ್ರಮುಖ ಮುಖಂಡರೊಬ್ಬರಿಗೆ ಕೊಡಿಸಲು ಶಿವಲಿಂಗೇಗೌಡ ಶಿಪಾರಸು ಮಾಡಿದ್ದರು. ಆದರೆ, ಹಾಸನ ಕ್ಷೇತ್ರದವರಿಗೆ ಅಧ್ಯಕ್ಷ ಸ್ಥಾನ ನೀಡುವುದು ನ್ಯಾಯ ಎಂದು ರಾಜಣ್ಣ ಪಟ್ಟುಹಿಡಿದಿದ್ದು ಗುಂಪುಗಾರಿಕೆಯನ್ನೇ ಸೃಷ್ಠಿಸಿತ್ತು. ವಿವಾದ ಸಿಎಂ ಸಿದ್ದರಾಮಯ್ಯ ಅವರ ಅಂಗಳಕ್ಕೂ ತಲುಪಿ ರಾಜಿಸಂದಾನ ಕೂಡ ನಡೆದಿದ್ದು ರಾಜಣ್ಣ ಅವರಿಗೆ ಜಿಲ್ಲಾ ಉಸ್ತುವಾರಿ ಸಚಿವ ಸ್ಥಾನದ ಉಸಾಬರಿಯೇ ಬೇಡ ಎನ್ನಿಸಿತ್ತು. ಆಗಸ್ಟ್​ 15ರಂದು ರಾಷ್ಟ್ರಧ್ವಜಾರೋಹಣ ನೆರವೇರಿಸುವಷ್ಟರಲ್ಲಿ ಬೇರೊಬ್ಬರಿಗೆ ಹೊಣೆ ನೀಡಬೇಕು ಎಂದು ರಾಜಣ್ಣ ಮನವಿ ಮಾಡಿಕೊಂಡ ಹಿನ್ನೆಲೆಯಲ್ಲಿ ಹಾಸನ ಉಸ್ತುವಾರಿ ಕೃಷ್ಣಭೈರೇಗೌಡ ಹೆಗಲಿಗೇರಿದೆ.

ತುಮಕೂರಿನ ಪಾಲಿಗೂ ಕೊಂಚ ಹಿನ್ನೆಡೆ: ಹಾಸನ ಜಿಲ್ಲಾ ಉಸ್ತುವಾರಿ ಸ್ಥಾನಕ್ಕೂ ತುಮಕೂರಿಗೆ ನಂಟಿದೆ, ತುಮಕೂರು ಜಿಲ್ಲೆಯ ಜೀವನಾಡಿ ಹೇಮಾವತಿ ನೀರು ಹಾಸನ ಜಿಲ್ಲೆಯಿಂದಲೇ ಹರಿಯಬೇಕಿದ್ದು ಸಕಾಲದಲ್ಲಿ ನೀರು ಹರಿಸುವ ಹಾಸನ ಜಿಲ್ಲಾ ಉಸ್ತುವಾರಿ ಸಚಿವರ ಕೃಪೆಯೂ ಬೇಕಿದೆ. ಹಾಸನ ಜಿಲ್ಲಾ ಉಸ್ತುವಾರಿ ಸಚಿವರೇ ನೀರಾವರಿ ಸಲಹಾ ಸಮಿತಿ ಅಧ್ಯಕ್ಷರೂ ಆಗಿರುವುದರಿಂದ ತುಮಕೂರು ಜಿಲ್ಲೆಯ ಪಾಲು ಪಡೆಯಲು ಈ ಸ್ಥಾನ ಮಹತ್ವ ಪಡೆದಿದೆ. ಹಿಂದಿನ ಬಿಜೆಪಿ ಸರ್ಕಾರದಲ್ಲಿ ತುಮಕೂರು ಜತೆಗೆ ಹಾಸನ ಜಿಲ್ಲಾ ಉಸ್ತುವಾರಿ ಸಚಿವ ಸ್ಥಾನ ಪಡೆದಿದ್ದ ಜೆ.ಸಿ.ಮಾಧುಸ್ವಾಮಿ ಜಿಲ್ಲೆಯ ಪಾಲಿನ ಸಂಪೂರ್ಣ ನೀರನ್ನು ಹರಿಸಿದ್ದರು. ಅದೇ ರೀತಿ ಕೆ.ಎನ್​.ರಾಜಣ್ಣ ಕೂಡ ಜಿಲ್ಲೆಗೆ ಅಗತ್ಯವಾದ ಸಂದರ್ಭದಲ್ಲಿ ನೀರು ಹರಿಸುವ ಮೂಲಕ ಜಿಲ್ಲೆಯ ಪಾಲಿಗೆ ಕಾವಲುಗಾರರಾಗಿದ್ದರು. ಹಾಸನ ಜಿಲ್ಲಾ ಉಸ್ತುವಾರಿ ಸ್ಥಾನ ತುಮಕೂರು ಜಿಲ್ಲೆಯಿಂದ ಕೈತಪ್ಪಿರುವ ಹಿನ್ನೆಲೆಯಲ್ಲಿ ಜಿಲ್ಲೆಯ ರೈತರಿಗೆ ಕೊಂಚ ನಿರಾಸೆಯಾಗಿದೆ, ಆದರೆ, ಬಯಲು ಸೀಮೆಯ ಜಿಲ್ಲೆಯ ಕೃಷ್ಣಭೈರೇಗೌಡ ನೀರಿನ ಕಷ್ಟ ಅರ್ಥ ಮಾಡಿಕೊಂಡು ನ್ಯಾಯವಾಗಿ ನಡೆದುಕೊಳ್ಳಲಿದ್ದಾರೆ ಎಂಬ ಭರವಸೆಯೂ ಇದೆ.