ಮರಳೂರಿನಲ್ಲಿ ಯುವಕನ ಕೊಲೆ; ಜಿಲ್ಲೆಯಲ್ಲಿ ಹೆಚ್ಚಾದ ಅಪರಾಧ ಚಟುವಟಿಕೆ

ತುಮಕೂರು: ಗೃಹ ಸಚಿವರ ತವರು ಜಿಲ್ಲೆ ತುಮಕೂರು ಅಪರಾಧ ಚಟುವಟಿಕೆಗಳಿಗೆ ಸುದ್ದಿಯಾಗುತ್ತಿದೆ, ಪುಡಿರೌಡಿಗಳು ಬಾಲ ಬಿಚ್ಚಲಾರಂಭಿಸಿದ್ದರೂ ಪೊಲೀಸರು ಶಾಂತರಾಗಿರುವುದು ಆಶ್ಚರ್ಯ ಮೂಡಿಸಿದೆ.

ಗಾಂಜಾ ಹಾಗೂ ಡ್ರಗ್ಸ್​ ಎಗ್ಗಿಲ್ಲದೆ ಮಾರಾಟವಾಗುತ್ತಿದೆ ಎಂಬ ಅಘಾತಕಾರಿ ಸುದ್ದಿಯ ನಡುವೆಯೇ ಶುಕ್ರವಾರ ತಡರಾತ್ರಿ ಹುಡುಗಿ ವಿಚಾರಕ್ಕೆ ಯುವಕರ ನಡುವೆ ಶುರುವಾದ ಕಿರಿಕ್​ ಒಬ್ಬನ ಕೊಲೆಯಲ್ಲಿ ಅಂತ್ಯವಾಗಿದೆ.

ಕಳೆದ ಒಂದೂವರೆ ತಿಂಗಳಲ್ಲಿ ನಗರದಲ್ಲಿ ಮೂರು ಬಾರಿ ಮಚ್ಚು, ಲಾಂಗುಗಳು ಝಳಪಿಸಿವೆ. ಇತ್ತೀಚೆಗಷ್ಟೇ ಡ್ರಗ್ಸ್​ ನಶೆಯಲ್ಲಿದ್ದ ಯುವಕನೊಬ್ಬ ಹುಡುಗಿಯ ವಿಚಾರಕ್ಕೆ ಇನ್ನೊಬ್ಬ ಯುವಕನ ಮೇಲೆ ಮಚ್ಚಿನ ದಾಳಿ ನಡೆಸಿದ್ದ ಘಟನೆ ಸದಾಶಿವನಗರದಲ್ಲಿ ನಡೆದಿತ್ತು. ಈ ಘಟನೆ ಮಾಸುವ ಮುನ್ನವೇ ಇದೀಗ ನಗರದ ಮರಳೂರು ದಿಣ್ಣೆಯಲ್ಲಿ ಮತ್ತೊಂದು ಭೀಕರ ಕೊಲೆ ನಡೆದುಹೋಗಿದೆ.

ಸಾದಿಕ್​ ಎಂಬ ಎಂಬಾತದಿಂದ ರಿಹಾನ್​ಪಾಷ(20) ಕೊನೆಯಾದ ಯುವಕ, ಕೊಲೆಗೆ ಹುಡುಗಿಯ ವಿಷಯ ಕಾರಣ ಎನ್ನಲಾಗಿದೆ. ಶುಕ್ರವಾರ ರಾತ್ರಿ ಮೊಬೈಲ್​ಗೆ ಕರೆ ಮಾಡಿ ರಿಹಾನ್​ನನ್ನು ಮನೆಯಿಂದ ಹೊರೆಗೆ ಕರೆಸಿಕೊಂಡ ಸಾದಿಕ್​ ಚಾಕುವಿನಿಂದ ಚುಚ್ಚಿ ಪರಾರಿಯಾಗಿನೆ. ತೀವ್ರ ರಕ್ತಸ್ರಾವದಿಂದ ಕೆಳಗೆ ಬಿದ್ದು ಒದ್ದಾಡುತಿದ್ದ ರಿಹಾನ್​ ಪಾಷ ಆಸ್ಪತ್ರೆಯಲ್ಲಿ ಸಾವಿಗೀಡಾಗಿದ್ದಾನೆ.

ಜಯನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು 6 ಆರೋಪಿಗಳನ್ನು ವಶಕ್ಕೆ ಪಡೆದಿದ್ದಾರೆ.