ಶಿಕ್ಷಣ ಭೀಷ್ಮ ಗಂಗಾಧರಯ್ಯ ಮಹಾದ್ವಾರ

ತುಮಕೂರು: ತುಮಕೂರು ದಸರಾ ಇನ್ನಷ್ಟು ವಿಜೃಂಭಣಗೊಳ್ಳುತ್ತಿದೆ. ಅ.11 ಹಾಗೂ 12ರಂದು ನಡೆಯಲಿರುವ ವೈವಿಧ್ಯಮಯ ಕಾರ್ಯಕ್ರಮಗಳಿಗೆ ಸಮರೋಪಾದಿ ಸಿದ್ಧತೆ ನಡೆದಿದ್ದು ಜಿಲ್ಲಾ ಉಸ್ತುವಾರಿ ಸಚಿವ ಡಾ.ಜಿ.ಪರಮೇಶ್ವರ ತಂದೆ ಶಿಕ್ಷಣ ಭೀಷ್ಮಡಾ.ಎಚ್​.ಎಂ.ಗಂಗಾಧರಯ್ಯ ಮಹಾದ್ವಾರ ನಿರ್ಮಿಸಲಾಗಿದೆ.

ಎರಡು ದಿನಗಳ ಸಾಂಸತಿಕ ಕಾರ್ಯಕ್ರಮ ಆಯೋಜಿಸಲು ನಿರ್ಮಾಣಗೊಂಡಿರುವ ಬೃಹತ್​ ವೇದಿಕೆಗೆ "ಅಮರ ಶಿಲ್ಪಿ ಜಕಣಾಚಾರಿ' ಹೆಸರಿಡಲಾಗಿದೆ. ಖ್ಯಾತ ವಿಜ್ಞಾನಿ ರಾಜರಾಮಣ್ಣ ಹೆಸರಿನಲ್ಲಿ ವಸ್ತುಪ್ರದರ್ಶನ ಏರ್ಪಡಿಸಲಾಗಿದೆ. ಎಚ್​ಎಎಲ್​ ಹೆಲಿಕಾಪ್ಟರ್​ ನಿರ್ಮಾಣ ಘಟಕದವರು ನಿರ್ಮಿಸಿರುವ ಹೆಲಿಕಾಪ್ಟರ್​ ಮಾದರಿಯನ್ನು ಪ್ರದರ್ಶನದಲ್ಲಿಡಲಾಗಿದ್ದು ಪರಮೇಶ್ವರ ಬುಧವಾರ ವೀಸಿದರು.

ಕಾರ್ಯಕ್ರಮ ವೀಕ್ಷಿಸಲು ಬರುವ ಕಲಾಸಕ್ತರಿಗೆ ಯಾವುದೇ ರೀತಿ ತೊಂದರೆಗಳುಂಟಾಗದಂತೆ ಆಸನ ವ್ಯವಸ್ಥೆ, ವಾಹನ ನಿಲುಗಡೆ ವ್ಯವಸ್ಥೆ, ಭದ್ರತಾ ವ್ಯವಸ್ಥೆ, ಸಂಚಾರ ವ್ಯವಸ್ಥೆಗೆ ಅಗತ್ಯ ಕ್ರಮ ಕೈಗೊಳ್ಳುವಂತೆ ಜಿಲ್ಲಾಧಿಕಾರಿ ಶುಭ ಕಲ್ಯಾಣ್​, ಜಿಪಂ ಸಿಇಒ ಜಿ.ಪ್ರಭುಗೆ ನಿರ್ದೇಶನ ನೀಡಿದರು.

ಈ ಸಂದರ್ಭದಲ್ಲಿ ಪಾವಗಡ ಶಾಸಕ ಎಚ್​.ವಿ. ವೆಂಕಟೇಶ್​, ಪಾಲಿಕೆ ಆಯುಕ್ತೆ ಬಿ.ವಿ. ಅಶ್ವಿಜ, ನಿರ್ಮಿತಿ ಕೇಂದ್ರದ ರಾಜಶೇಖರ್​ ಮತ್ತಿತರರು ಹಾಜರಿದ್ದರು.

ಪರಂ ದಂಪತಿ ಪೂಜೆ

ಗೃಹ ಸಚಿವ ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವ ಡಾ.ಜಿ. ಪರಮೇಶ್ವರ ಹಾಗೂ ಕನ್ನಿಕಾ ಪರಮೇಶ್ವರಿ ದಂಪತಿ ಬುಧವಾರ ದಸರಾ ಉತ್ಸವ ಪ್ರಯುಕ್ತ ನಗರದ ಸರ್ಕಾರಿ ಜೂನಿಯರ್​ ಕಾಲೇಜು ಮೈದಾನ ಡಾ.ಶ್ರೀ ಶಿವಕುಮಾರ ಸ್ವಾಮೀಜಿ ಧಾರ್ಮಿಕ ಮಂಟಪದಲ್ಲಿ ಪ್ರತಿಷ್ಠಾಪಿಸಿರುವ ಕಾಳರಾತ್ರಿ(ಶಾರದಾ) ಅಲಂಕಾರದಲ್ಲಿದ್ದ ಚಾಮುಂಡೇಶ್ವರಿ ದೇವಿಯ ದರ್ಶನ ಪಡೆದು ಪೂಜೆ ಸಲ್ಲಿಸಿದರು.