ಸಂಕಷ್ಟದಲ್ಲಿ ಮೂರು ಸಾವಿರ ರೈತರು

ಪರಶುರಾಮ ಕೆರಿ ಹಾವೇರಿ

ಜಿಲ್ಲೆಯ ರೈತರು ನೆರೆ ಹಾಗೂ ಅತಿವೃಷ್ಟಿಯ ಹೊಡೆತಕ್ಕೆ ಸಿಲುಕಿ ನಲುಗಿದ್ದಾರೆ. ಈ ಸಮಯದಲ್ಲಿ ನೆರವಾಗಬೇಕಿದ್ದ ಬೆಳೆ ವಿಮೆ ಹಣವೂ ಸಕಾಲಕ್ಕೆ ಸಿಗದೇ ರೈತರು ಪರದಾಡುವಂತಾಗಿದೆ.

2018-19ನೇ ಸಾಲಿನ ಮುಂಗಾರು ಹಂಗಾಮಿನಲ್ಲಿ ತಾಲೂಕಿನ 2,533 ರೈತರಿಗೆ ಹೋಬಳಿವಾರು ಫಸಲ್ ಬಿಮಾ ಯೋಜನೆಯಲ್ಲಿ 2.13 ಕೋಟಿ ರೂ., ಗ್ರಾಪಂವಾರು ಫಸಲ್ ಬಿಮಾ ಯೋಜನೆಯಲ್ಲಿ 7,621 ರೈತರಿಗೆ 13.21 ಕೋಟಿ ರೂಪಾಯಿಯ ವಿಮೆ ಪರಿಹಾರವು ಕಳೆದ ಜುಲೈನಲ್ಲಿಯೇ ಬಿಡುಗಡೆಗೊಂಡಿದೆ. ಆದರೆ, ತಾಂತ್ರಿಕ ಸಮಸ್ಯೆಯ ನೆಪದಲ್ಲಿ ತಾಲೂಕಿನಲ್ಲಿ ಅಂದಾಜು 3 ಸಾವಿರದಷ್ಟು ರೈತರಿಗೆ ಇನ್ನೂ ಹಣ ಪಾವತಿಯಾಗಿಲ್ಲ. ಈ ಕುರಿತು ರೈತರು ಕೃಷಿ ಇಲಾಖೆ, ಬ್ಯಾಂಕ್​ಗಳಿಗೆ ಅಲೆದಾಡಿ ಬೇಸತ್ತಿದ್ದಾರೆ.

ಏನು ತಾಂತ್ರಿಕ ಸಮಸ್ಯೆ?: ರೈತರು ಬೆಳೆ ವಿಮೆ ಕಂತು ತುಂಬುವ ಸಮಯದಲ್ಲಿ ನಮೂದಿಸಿದ್ದ ಬೆಳೆಯನ್ನೇ ಬೆಳೆದಿಲ್ಲವಂತೆ. ವಿಮೆ ತುಂಬಿದ ಬೆಳೆಯೇ ಬೇರೆ, ಬೆಳೆದಿರುವ ಬೆಳೆಯೇ ಬೇರೆಯಾಗಿದೆ. ಹೀಗಾಗಿ, ಆ ರೈತರಿಗೆ ವಿಮೆ ಹಣ ನೀಡುವುದಿಲ್ಲ ಎಂಬ ವಾದ ಇನ್ಶೂರೆನ್ಸ್ ಕಂಪನಿಯವರದ್ದಾಗಿದೆ. ಆದರೆ, ಇಲ್ಲಿ ನಿಜವಾಗಿ ತಪ್ಪಾಗಿದ್ದು, ರೈತರಿಂದಲೋ ಅಥವಾ ಬೆಳೆ ದೃಢೀಕರಣ ನೀಡಿರುವ ಕೃಷಿ ಇಲಾಖೆಯದ್ದೋ ಎಂಬ ಪ್ರಶ್ನೆ ಎದ್ದಿದೆ. ಜತೆಗೆ ರೈತರು ವಿಮೆ ತುಂಬಿದ ಬ್ಯಾಂಕ್​ನ ಬದಲು ಕೊನೆಯದಾಗಿ ಯಾವ ಬ್ಯಾಂಕ್​ಗೆ ಆಧಾರ್ ಸಂಖ್ಯೆಯನ್ನು ಲಿಂಕ್ ಮಾಡಿದ್ದಾರೋ ಆ ಬ್ಯಾಂಕ್ ಖಾತೆಗೆ ವಿಮೆ ಹಣ ಜಮೆಯಾಗಿದೆ. ಮತ್ತೊಂದು ವಿಚಿತ್ರವೆಂದರೆ, ಮೊಬೈಲ್​ಫೋನ್ ಸಿಮ್ೆ ಸಂಬಂಧಿಸಿದ ಕಂಪನಿಯ ಬ್ಯಾಂಕ್​ನಲ್ಲಿ ಹಣ ಜಮಾವಣೆಯಾದ ಉದಾಹರಣೆಗಳು ಬೆಳಕಿಗೆ ಬಂದಿವೆ. ರೈತರೇ ಸ್ವತಃ ವಿಮಾ ಕಂಪನಿಗೆ ಹೋಗಿ ವಿಚಾರಿಸಿದಾಗ ಈ ವಿಷಯ ಬಯಲಾಗಿದೆ.

ಒಂದೇ ಗ್ರಾಮದಲ್ಲಿ ಕೆಲವರಿಗಷ್ಟೇ ಹಣ ಮಂಜೂರಾಗಿದೆ. ಇದರಿಂದ ಕಂಗಾಲಾದ ರೈತರು ಬ್ಯಾಂಕ್ ಹಾಗೂ ಕೃಷಿ ಇಲಾಖೆಯ ಕಚೇರಿಗೆ ಅಲೆದಾಡುತ್ತಿದ್ದಾರೆ. ಕೆಲವರು ಯುನೈಟೆಡ್ ಇಂಡಿಯಾ ಇನ್ಶೂರೆನ್ಸ್ ಕಂಪನಿ ಕಚೇರಿಗೂ ಹೋಗಿ ವಿಚಾರಿಸಿದಾಗ, ‘ವಿಮೆ ತುಂಬಿದ ಬೆಳೆಯೇ ಬೇರೆ, ಬೆಳೆ ಕಟಾವು ಸಮೀಕ್ಷೆಯಲ್ಲಿ ಜಮೀನಿನಲ್ಲಿದ್ದ ಬೆಳೆಯೇ ಬೇರೆಯಾಗಿದೆ. ಹೀಗಾಗಿ ವಿಮೆ ಬರುವುದಿಲ್ಲ’ ಎಂದು ಹೇಳಿ ಕಳುಹಿಸುತ್ತಿದ್ದಾರೆ. ಕೃಷಿ ಇಲಾಖೆಯವರನ್ನು ಈ ಕುರಿತು ವಿಚಾರಿಸಿದರೆ, ‘ಈ ಸಮಸ್ಯೆಯನ್ನು ಶೀಘ್ರದಲ್ಲಿಯೇ ಪರಿಹರಿಸಲಾಗುವುದು. ನಿಮಗೂ ವಿಮೆ ಹಣ ಬರುತ್ತೆ’ ಎನ್ನುತ್ತಿದ್ದಾರೆ. ಆದರೆ, ಆರು ತಿಂಗಳಿನಿಂದ ಅಲೆದಾಟ ಮಾತ್ರ ತಪ್ಪಿಲ್ಲ ಎಂದು ರೈತರು ದೂರುತ್ತಿದ್ದಾರೆ.