ಕೆರೆ ಕಾಮೇಗೌಡ ಮತ್ತು ಗ್ರಾಮಸ್ಥರ ನಡುವಿನ ಆರೋಪ-ಪ್ರತ್ಯಾರೋಪ ಕುರಿತು ಬುಧವಾರ ಮಳವಳ್ಳಿ ತಾಲೂಕಿನ ದಾಸನದೊಡ್ಡಿ ಗ್ರಾಮದಲ್ಲಿ ನಡೆಯಬೇಕಿದ್ದ ಶಾಂತಿ ಸಭೆ ತಹಸೀಲ್ದಾರ್ ಗೈರು ಹಾಜರಿಯಿಂದ ರದ್ದಾಯಿತು. ಮಂಗಳವಾರ ಕಾಮೇಗೌಡರ ಆರೋಗ್ಯ ವಿಚಾರಿಸಲು ಗ್ರಾಮಕ್ಕೆ ಭೇಟಿ ನೀಡಿದ್ದ ಉಪ ವಿಭಾಗಾಧಿಕಾರಿ ಸೂರಜ್ ಮುಂದೆ ಕಾಮೇಗೌಡ ಹಾಗೂ ಗ್ರಾಮಸ್ಥರು ಪರಸ್ಪರ ದೂರು ಹೇಳಿಕೊಂಡಿದ್ದರು. ಆಗ ಉಪ ವಿಭಾಗಾಧಿಕಾರಿ, ಬುಧವಾರ ಬೆಳಗ್ಗೆ 10.30ಕ್ಕೆ ತಾಪಂ ಇಒ ಹಾಗೂ ಪೊಲೀಸರ ಸಮ್ಮುಖ ಶಾಂತಿ ಸಭೆ ನಡೆಸಿ, ವರದಿ ನೀಡಬೇಕೆಂದು ತಹಸೀಲ್ದಾರ್ ಚಂದ್ರಮೌಳಿಗೆ ಸೂಚಿಸಿದ್ದರು. ಶಾಂತಿ ಸಭೆಗೆ ಬಾರದಿದ್ದಾಗ ತಹಸೀಲ್ದಾರ್ ಮೊಬೈಲಿಗೆ ಕರೆ ಮಾಡಿದಾಗ, ‘ನೀವೇ 8ರಿಂದ 10 ಜನ ಕಚೇರಿಗೆ ಬನ್ನಿ’ ಎಂದಿದ್ದಾರೆ. ಅದಕ್ಕೆ ಒಪ್ಪದ ಜನರು ಗ್ರಾಮಕ್ಕೆ ಬಂದು ಅಹವಾಲು ಕೇಳುವಂತೆ ಪಟ್ಟು ಹಿಡಿದಿದ್ದಾರೆ. ಅದಕ್ಕೆ ತಹಸೀಲ್ದಾರ್ ಉಡಾಫೆಯಿಂದ ಉತ್ತರಿಸಿದರೆಂದು ಗ್ರಾಮಸ್ಥರು ‘ವಿಜಯವಾಣಿ’ ಜತೆ ಮಾತನಾಡುತ್ತ ಆರೋಪಿಸಿದರು.
