ಡಿಕೆಶಿಗೆ ಎರಡನೇ ದೊಡ್ಡ ಟಾಸ್ಕ್​!

* ವೈಯಕ್ತಿಕ ವರ್ಚಸ್ಸಿಗೆ ಸವಾಲಾದ ಚನ್ನಪಟ್ಟಣ ಕ್ಷೇತ್ರ

* ಸೋಲನ್ನು ಸರಿದೂಗಿಸುವ ಸವಾಲು

ಗಂಗಾಧರ್​ ಬೈರಾಪಟ್ಟಣ ರಾಮನಗರ

ರಾಜ್ಯದ ಉಪಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್​ ಅವರಿಗೆ ಕೇವಲ 6 ತಿಂಗಳ ಅವಧಿಯಲ್ಲಿ ಎರಡನೇ ದೊಡ್ಡ ಟಾಸ್ಕ್​ ಎದುರಾಗಿದೆ. ಕೆಪಿಸಿಸಿ ಅಧ್ಯಕ್ಷರಾಗಿ ಡಿ.ಕೆ. ಶಿವಕುಮಾರ್​ ಅವರಿಗೆ ರಾಜ್ಯದ ಮೂರು ವಿಧಾನಸಭೆ ಕ್ಷೇತ್ರಗಳ ಉಪಚುನಾವಣೆಯೂ ಮಹತ್ವವೇ ಆದರೂ, ಚನ್ನಪಟ್ಟಣ ಕ್ಷೇತ್ರ ವೈಯಕ್ತಿಕ ವರ್ಚಸ್ಸಿಗೆ ಸವಾಲಾಗಿರುವ ಕ್ಷೇತ್ರವಾಗಿದೆ.

ಕಳೆದ ಮೇ ತಿಂಗಳಲ್ಲಿ ನಡೆದ ಲೋಕಸಭೆ ಚುನಾವಣೆಯಲ್ಲಿ ಸಹೋದರ ಡಿ.ಕೆ. ಸುರೇಶ್​ ಸೋಲು ಆಘಾತ ನೀಡಿದ್ದು, ಚನ್ನಪಟ್ಟಣ ಉಪಚುನಾವಣೆ ಮೂಲಕ ಈ ಸೋಲನ್ನು ಗೆಲುವಿನ ಮೂಲಕ ಸರಿದೂಗಿಸುವ ಸವಾಲು ಎದುರಾಗಿದೆ.

ಸೋಲು ಕಾಡಿದೆ:

ಲೋಕಸಭೆ ಚುನಾವಣೆ ಸೋಲು ಡಿ.ಕೆ. ಸಹೋದರರನ್ನು ಕಾಡಿದೆ. ಅನಿರೀತವಾಗಿ ಡಾ.ಸಿ.ಎನ್​. ಮಂಜುನಾಥ್​ ಅವರನ್ನು ಕಣಕ್ಕೆ ಇಳಿಸುವ ಮೂಲಕ ಬಿಜೆಪಿ ಜಾಣ ನಡೆ ಅನುಸರಿಸಿತು. ಇದರ ಹೊರತಾಗಿಯೂ ರಾಜಕೀಯದ ಎಲ್ಲ ತಂತ್ರಗಾರಿಕೆ ಬಳಕೆ ಮಾಡಿ, ಮತದಾರರ ಮನಮುಟ್ಟುವ ಡಿ.ಕೆ. ಸಹೋದರರ ಪ್ರಯತ್ನಕ್ಕೆ ಯಶಸ್ಸು ಸಿಗಲಿಲ್ಲ. ಈ ಸೋಲು ಕಾಂಗ್ರೆಸಿಗರಿಗೆ ಅರಗಿಸಿಕೊಳ್ಳಲು ಸಾಧ್ಯವಾಗದಷ್ಟು ಆಘಾತ ನೀಡಿತು. ಆದರೆ, ಚನ್ನಪಟ್ಟಣ ಉಪಚುನಾವಣೆ ಮೂಲಕ ಆ ಸೋಲಿನಿಂದ ಹೊರ ಬರಲು ದೊಡ್ಡ ಅವಕಾಶ ಒದಗಿ ಬಂದಿದೆ.

ಆಸೆ ಮೂಡಿಸಿದ ಮತಗಳಿಕೆ

ಬೆಂಗಳೂರು ಗ್ರಾಮಾಂತರ ಲೋಕಸಭೆ ಕ್ಷೇತ್ರದಲ್ಲಿ ಕಾಂಗ್ರೆಸ್​ ಸೋಲು ಕಂಡರೂ ಚನ್ನಪಟ್ಟಣ ವಿಧಾನಸಭೆ ಕ್ಷೇತ್ರ ವ್ಯಾಪ್ತಿಯಲ್ಲಿ ಕಾಂಗ್ರೆಸ್​ ಮತಗಳಿಕೆ ಚನ್ನಪಟ್ಟಣದಲ್ಲಿ ಗೆಲ್ಲುವ ಆಸೆ ಮೂಡಿಸಿತು. ಚನ್ನಪಟ್ಟಣದಲ್ಲಿ ಮೈತ್ರಿ ಅಭ್ಯರ್ಥಿ ಡಾ.ಸಿ.ಎನ್​ ಮಂಜುನಾಥ್​ 1,06,971 ಮತಗಳನ್ನು ಪಡೆದುಕೊಂಡರೆ, ಡಿ.ಕೆ.ಸುರೇಶ್​ 85,375 ಮತಗಳನ್ನು ಪಡೆದುಕೊಂಡರು. ಇದು ಹಿಂದಿನ ಮೂರು ಚುನಾವಣೆಗಳಿಗಿಂತ ಗಳಿಸಿದ ಹೆಚ್ಚಿನ ಮತಗಳಾಗಿವೆ.

ಗೆಲ್ಲುವ ಹಠ:

ಸೋಲಿನ ನಂತರ ಚನ್ನಪಟ್ಟಣ ಕ್ಷೇತ್ರದ ಉಪಚುನಾವಣೆ ಎದುರಾಗುವುದು ನಿಶ್ಚಿತವಾಗುವುದನ್ನು ಅರಿತ ಡಿಸಿಎಂ ಡಿ.ಕೆ ಶಿವಕುಮಾರ್​, ಚನ್ನಪಟ್ಟಣ ಕ್ಷೇತ್ರದಲ್ಲಿ ಕಾಲಿಗೆ ಚಕ್ರ ಕಟ್ಟಿಕೊಂಡವರಂತೆ ಓಡಾಟ ಆರಂಭಿಸಿದರು. 5 ತಿಂಗಳಲ್ಲಿ ಸಾಕಷ್ಟು ಬಾರಿ ಕ್ಷೇತ್ರದಲ್ಲಿ ಸಂಚಾರ ಮಾಡಿ, ಇಡೀ ಆಡಳಿತ ಯಂತ್ರವನ್ನೇ ಚನ್ನಪಟ್ಟಣಕ್ಕೆ ಕರೆತರುವ ಮೂಲಕ ಅಭಿವೃದ್ಧಿ ಮಂತ್ರ ಜಪಿಸಿದ್ದಾರೆ. ಸಾವಿರಾರು ನಿವೇಶನ ಹಂಚಿಕೆಗೆ ಸಿದ್ದತೆ, ಉದ್ಯೋಗ ಮೇಳದಂತಹ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳುವುದು ಮಾತ್ರವಲ್ಲದೇ, ಜಿಲ್ಲಾಡಳಿತವನ್ನು ಈ ಕಾರ್ಯದಲ್ಲಿ ಸಂಪೂರ್ಣವಾಗಿ ತೊಡಗಿಸಿಕೊಳ್ಳುವಂತೆ ಮಾಡುವಲ್ಲಿಯೂ ಯಶಸ್ವಿ ಆಗುವ ಮೂಲಕ ಗೆಲ್ಲುವ ಹಠವನ್ನು ತೊಟ್ಟಿದ್ದಾರೆ.

ನಡೆಯಲಿದೆ ಆಪರೇಷನ್​ ಹಸ್ತ

ಕಳೆದ ಲೋಕಸಭೆ ಚುನಾವಣೆಯಲ್ಲಿಯೇ ಜೆಡಿಎಸ್​&ಬಿಜೆಪಿಯ ಹಲವು ಮುಖಂಡರನ್ನು ಕಾಂಗ್ರೆಸ್​ಗೆ ಸೆಳೆಯುವಲ್ಲಿ ಡಿ.ಕೆ. ಸಹೋದರರು ಯಶಸ್ವಿ ಆಗಿದ್ದರು. ಇದೇ ತಂತ್ರವನ್ನು ಈ ಬಾರಿಯೂ ಮಾಡಲು ವೇದಿಕೆ ಸಿದ್ದವಾಗಿದೆ. ಈಗಾಗಲೇ ಜೆಡಿಎಸ್​ & ಬಿಜೆಪಿಯ ಹಲವು ನಾಯಕರ ಸಂಪರ್ಕವನ್ನು ಸಾಧಿಸಲಾಗಿದ್ದು, ಶ್ರೀವೇ ಹಲವರು ಪಕ್ಷ ಸೇರ್ಪಡೆ ಆಗಲಿದ್ದಾರೆ ಎನ್ನುತ್ತಾರೆ ಕಾಂಗ್ರೆಸ್​ ಮುಖಂಡರು.

ಡಿಕೆಸು ಸ್ಪರ್ಧೆಗೆ ಒತ್ತಡ

ಸದ್ಯದ ಚನ್ನಪಟ್ಟಣ ರಾಜಕೀಯ ಪರಿಸ್ಥಿತಿಯಲ್ಲಿ ಕಾಂಗ್ರೆಸ್​ ಗೆಲುವು ಅಷ್ಟು ಸುಲಭವಾಗಿಲ್ಲ. ಒಂದೆಡೆ ಬಿಎಂಐಪಿಸಿಐ ಅಧ್ಯಕ್ಷ ರುನಂದನ್​ ರಾಮಣ್ಣ ಅವರ ಹೆಸರು ಮುಂಚೂಣಿಯಲ್ಲಿದ್ದರೆ, ಮಾಜಿ ಶಾಸಕ ಎಂ.ಸಿ. ಅಶ್ವತ್ಥ್​ ವರಿಷ್ಠರು ಸೂಚಿಸಿದರೆ ಸ್ಫರ್ಧೆಗೆ ಸಿದ್ದವಾಗಿದ್ದಾರೆ. ಆದರೆ, ಕಾಂಗ್ರೆಸ್​ ಕಾರ್ಯಕರ್ತರ ಮನದಲ್ಲಿ ಇರುವ ಏಕೈಕ ಹೆಸರು ಡಿ.ಕೆ.ಸುರೇಶ್​. ಪ್ರತಿ ದಿನ ಚನ್ನಪಟ್ಟಣದಿಂದ ಕಾರ್ಯಕರ್ತರ ನಿಯೋಗ ತೆರಳಿ ಸ್ಪರ್ಧೆಗೆ ಒತ್ತಡ ಹಾಕುತ್ತಲೇ ಇದ್ದಾರೆ. ಆದರೆ, ಡಿಕೆಸು ಸ್ಪರ್ಧೆ ನಿರಾಕರಿಸುತ್ತಿದ್ದಾರೆ. ಒಂದು ವೇಳೆ ಡಿ.ಕೆ.ಸುರೇಶ್​ ಸ್ಪರ್ಧೆ ಮಾಡಿದರೆ, ಅಣ್ಣನ ಎರಡನೇ ಟಾಸ್ಕ್​ನ ಗೆಲುವು ತಂದು ಕೊಡುವ ಅವಕಾಶ ಹೆಚ್ಚಿವೆ.