ಕಸ ಬೇರ್ಪಡಿಸದಿರುವುದು ಸಮಸ್ಯೆ!

* ಬಿಎಸ್​ಡಬ್ಲುಎಂಎಲ್​ ಸಿಇಒ ಕರೀಗೌಡ ಹೇಳಿಕೆ

* ಕಸದಿಂದ ವಿದ್ಯುತ್​ ಉತ್ಪಾದಿಸುವ ಟಕಕ್ಕೆ ಭೇಟಿ

ಬಿಡದಿ

ರಾಜಧಾನಿ ಬೆಂಗಳೂರಿನಲ್ಲಿ ನಿತ್ಯ 6 ಸಾವಿರ ಮೆಟ್ರಿಕ್​ ಟನ್​ ಕಸ ಉತ್ಪತ್ತಿಯಾಗುತ್ತಿದ್ದು, ಅದರಲ್ಲಿ ಒಣ ಕಸ ಬೇರ್ಪಡಿಸಿ ವಿದ್ಯುತ್​ ಉತ್ಪಾದಿಸುವ ಘಟಕಕ್ಕೆ ಕಳುಹಿಸಲಾಗುತ್ತದೆ ಎಂದು ಬೆಂಗಳೂರು ಘನತ್ಯಾಜ್ಯ ನಿರ್ವಹಣಾ ನಿಗಮದ (ಬಿಎಸ್​ಡಬ್ಲುಎಂಎಲ್​) ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಕರೀಗೌಡ ಹೇಳಿದರು.

ಬಿಡದಿಯಲ್ಲಿ ರಾಜ್ಯ ವಿದ್ಯುತ್​ ನಿಗಮ (ಕೆಪಿಸಿಎಲ್​) ಹಾಗೂ ಗ್ರೇಟರ್​ ಬೆಂಗಳೂರು ಪ್ರಾಧಿಕಾರ ಜಂಟಿಯಾಗಿ ಸ್ಥಾಪಿಸಿರುವ ಒಣ ಕಸದಿಂದ ವಿದ್ಯುತ್​ ಉತ್ಪಾದಿಸುವ ಘಟಕಕ್ಕೆ ಅಧಿಕಾರಿಗಳ ತಂಡದ ಜತೆ ಗುರುವಾರ ಭೇಟಿ ನೀಡಿ, ಪರಿಶೀಲಿಸಿ ಮಾತನಾಡಿದರು.

ಜನರು ಕಸವನ್ನು ಬೇರ್ಪಡಿಸದೆ ಹಾಕುತ್ತಾರೆ. ಇದರಿಂದ ಸಮಸ್ಯೆ ಹೆಚ್ಚುತ್ತದೆ. ಈ ಬಗ್ಗೆ ಸೂಕ್ತ ಕ್ರಮ ವಹಿಸುವಂತೆ ಅಧಿಕಾರಿಗಳಿಗೆ ಸೂಚನೆ ನೀಡಿದರು. ಘಟಕಕ್ಕೆ ನಿತ್ಯ 600 ಮೆಟ್ರಿಕ್​ ಟನ್​ ಒಣ ಕಸದ ಅವಶ್ಯಕತೆಯಿದ್ದು, ಸದ್ಯಕ್ಕೆ 200 ಮೆಟ್ರಿಕ್​ ಟನ್​ ಒಣ ಕಸ ಮಾತ್ರ ಬರುತ್ತಿದೆ. ಹಾಗಾಗಿ ಈ ತಿಂಗಳಲ್ಲಿ 500 ಮೆಟ್ರಿಕ್​ ಟನ್​ ಒಣ ಕಸ ಬೇರ್ಪಡಿಸಿ ಕಳುಹಿಸಿ ಕೊಡುವ ಗುರಿ ಹೊಂದಿದ್ದೇವೆ. ಈಗಾಗಲೇ ಜಮೀನುಗಳಲ್ಲಿ ಹಾಕಿರುವ ಕಸವನ್ನು ಜರಡಿ ಹಿಡಿದು ಸಿಕ್ಕ ಪುಡಿಯನ್ನು ಗೊಬ್ಬರ ಉತ್ಪಾದನೆಗೆ ಕಳುಹಿಸಿ ಇನ್ನು ಉಳಿದ ಪ್ಲಾಸ್ಟಿಕ್​ ಸೇರಿ ಇತರ ವಸ್ತುಗಳನ್ನು ವಿದ್ಯುತ್​ ಘಟಕಕ್ಕೆ ಕಳುಹಿಸಿಕೊಡಲಾಗುತ್ತದೆ ಎಂದು ತಿಳಿಸಿದರು.

11 ಮೆಗಾವ್ಯಾಟ್​ ವಿದ್ಯುತ್​ ಉತ್ಪಾದನೆ:

ಕೆಪಿಸಿಎಲ್​ನ ಇಇ ಸತೀಶ್​ ಕುಮಾರ್​ ಮಾತನಾಡಿ, ರಾಜ್ಯದಲ್ಲಿ ಪ್ರಥಮವಾಗಿ ಒಣ ಕಸದಿಂದ ವಿದ್ಯುತ್​ ಉತ್ಪಾದಿಸುವ ಘಟಕವನ್ನು 2000ದಲ್ಲಿ ಪ್ರಾರಂಭಿಸಲಾಯಿತು. ಬಿಡದಿ ಘಟಕವು 2024ರಲ್ಲಿ ಉತ್ಪಾದನೆ ಆರಂಭಿಸಿದ್ದು 4,200 ಮೆಟ್ರಿಕ್​ ಟನ್​ ಕಸವನ್ನ ಸಂಗ್ರಹಿಸಿಟ್ಟುಕೊಳ್ಳುವ ಟ್ಯಾಂಕ್​ ಈ ಘಟಕದಲ್ಲಿದೆ. ಘಟಕದಲ್ಲಿ ಪ್ರತಿದಿನ 11 ಮೆಗಾವ್ಯಾಟ್​ ವಿದ್ಯುತ್​ ಉತ್ಪಾದಿಸಲಾಗುತ್ತಿದೆ. ಉತ್ಪಾದನೆಯಾದ ವಿದ್ಯುತ್​ ಅನ್ನು ಅಂಡರ್​ ಕೇಬಲ್​ ಮೂಲಕ 4 ಕಿ.ಮೀ. ದೂರದಲ್ಲಿರುವ 66 ಕೆವಿ ವಿದ್ಯುತ್​ ಸ್ಟೇಷನ್​ಗೆ ಸರಬರಾಜು ಮಾಡಲಾಗುತ್ತಿದೆ. ಸದ್ಯ ಕಸದಿಂದ ಉತ್ಪತ್ತಿಯಾಗುತ್ತಿರುವ ವಿದ್ಯುತ್​ ಅನ್ನು ಪ್ರತಿ ಮನೆಗೆ 5 ಕಿಲೋ ವ್ಯಾಟ್​ನಂತೆ 25 ಸಾವಿರ ಮನೆಗಳಿಗೆ ನಿತ್ಯವೂ ವಿದ್ಯುತ್​ ಪೂರೈಸಬಹುದಾಗಿದೆ ಎಂದು ಹೇಳಿದರು.

ನಗರದ ಕಸ ಎಲ್ಲೋಗುತ್ತೆ?:

ಬೆಂಗಳೂರಿನಲ್ಲಿ ಉತ್ಪತ್ತಿಯಾಗುವ ಕಸವನ್ನು ಬೆಳ್ಳಹಳ್ಳಿ, ಮಿಟ್ಟಗಾನಹಳ್ಳಿಯಲ್ಲಿ ನಿಗದಿ ಮಾಡಿರುವ ಜಮೀನಿಗೆ ಹೋಗುತ್ತಿದೆ. ಉಳಿದಂತೆ 7 ತ್ಯಾಜ್ಯ ನಿರ್ವಹಣೆ ಟಕ ಹಾಗೂ ದೊಡ್ಡಬಳ್ಳಾಪುರದ ಒಂದು ಖಾಸಗಿ ತ್ಯಾಜ್ಯ ನಿರ್ವಹಣೆ ಟಕಕ್ಕೆ ಕಳುಹಿಸಲಾಗುತ್ತಿದೆ. ಅಲ್ಲಿ ಬೇರ್ಪಡಿಸಿದ ಒಣ ಕಸವನ್ನು ಬಿಡದಿ ಟಕಕ್ಕೆ ಕಳುಹಿಸಿಕೊಡಲಾಗುತ್ತಿದೆ ಎಂದು ಕರೀಗೌಡ ಮಾಹಿತಿ ನೀಡಿದರು.

ಕಸದಿಂದ ವಿದ್ಯುತ್​ ಉತ್ಪಾದಿಸುವ ಇನ್ನೆರಡು ಘಟಕಗಳನ್ನು ಬೆಂಗಳೂರು ದಕ್ಷಿಣ ಹಾಗು ಉತ್ತರ ಭಾಗದಲ್ಲಿ ಸ್ಥಾಪಿಸಲು ದೊಡ್ಡಬಳ್ಳಾಪುರ ಹಾಗೂ ಗೊಲ್ಲಹಳ್ಳಿಯಲ್ಲಿ ಜಾಗ ಗುರುತಿಸಲಾಗಿದೆ. ಕೆಪಿಸಿಲ್​ ಹಾಗೂ ಜಿಬಿಎ ಸಹಭಾಗಿತ್ವದಲ್ಲಿ ಈ ಘಟಕವನ್ನು ಸ್ಥಾಪಿಸಲಾಗಿದ್ದು, ಅದೇ ರೀತಿ ಇನ್ನೆರಡು ಘಟಕಗಳನ್ನು ಸ್ಥಾಪಿಸುವ ಪ್ರಸ್ತಾವನೆ ಸಿದ್ಧಪಡಿಸಲಾಗಿದೆ.ಕರೀಗೌಡ, ಸಿಇಒ, ಬಿಎಸ್​ಡಬ್ಲುಎಂಎಲ್​