ಜಿಲ್ಲಾ ಉಸ್ತುವಾರಿ ಸಚಿವ ಡಾ. ಎಂ.ಸಿ. ಸುಧಾಕರ್ ನಗರದ ಯುಜಿಡಿ ನೇರವಾಗಿ ಅಮಾನಿ ಗೋಪಾಲಕೃಷ್ಣ ಕೆರೆಗೆ ಹರಿಯು ತ್ತಿರುವುದರ ಬಗ್ಗೆ ಹಲವು ಬಾರಿ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಆದರೆ, ನಿರಂತರವಾಗಿ ಘಟಕದಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಕೊಳಚೆ ನೀರು ಸಂಗ್ರಹ, ಕಾಲಕಾಲಕ್ಕೆ ಸಂಸ್ಕರಣೆ ಯಾಗದಿರುವುದು, ವೈಜ್ಞಾನಿಕ ರೀತಿಯಲ್ಲಿ ಮರುಬಳಕೆಗೆ ಕ್ರಮ ಕೈಗೊಳ್ಳದಿರುವ ಅಸಡ್ಡೆ ಧೋರಣೆಯನ್ನು ತೋರಿದ್ದು ಇದೀಗ ಅಸಹಾಯಕತೆ ತೋರಲಾಗುತ್ತಿದೆ. ತ್ಯಾಜ್ಯ ನೀರಿನ ಸಂಸ್ಕರಣಾ ಘಟಕಕ್ಕೆ ಪರ್ಯಾಯವಾಗಿ ಹೊಸ ಜಾಗದಲ್ಲಿ ಮತ್ತೊಂದು ಘಟಕ ನಿರ್ಮಾಣ, ಯುಜಿಡಿ ಪೈಪ್ಲೈನ್ ಅಳವಡಿಕೆ ಸೇರಿ ಇತರ ಕಾಮಗಾರಿಗೆ 30 ಕೋಟಿ ರೂ. ಮಂಜೂರಾಗಿದ್ದು, ಡಿಪಿಆರ್ ತಯಾರಾಗಿದೆ. ವಾಪಸಂದ್ರ, ದಿನ್ನೇಹೊಸಹಳ್ಳಿ ರಸ್ತೆ, ಕಂದವಾರ, ಪ್ರಶಾಂತ ನಗರದಲ್ಲಿ ಕಾಮಗಾರಿ ಸೇರ್ಪಡೆಯ ಚರ್ಚೆಯಾಗಿದ್ದು, ಸ್ಥಳೀಯ ನಗರಸಭೆ ಸದಸ್ಯರ ಸಲಹೆಯಂತೆ ಘಟಕಕ್ಕೆ ಹೊಸ ಜಾಗ ಗುರುತಿಸಲಾಗುತ್ತಿದೆ. ಇಲ್ಲಿ ಕಾಮಗಾರಿ ಮುಗಿದು, ಹಾಗೆಯೇ ನಿರ್ವಹಣೆ ಪ್ರಾರಂಭಕ್ಕೆ ಚಾಲನೆ ನೀಡಲು ತಿಂಗಳಾನುಗಟ್ಟಲೇ ಸಮಯ ಬೇಕಾಗುತ್ತದೆ. ಇದರ ನಡುವೆ ಯುಜಿಡಿ ನೀರು ನೇರವಾಗಿ ಕೆರೆಗೆ ಹರಿಯುವುದನ್ನು ತಡೆಯುವ ನಿಟ್ಟಿನಲ್ಲಿ ಗಮನಹರಿಸುತ್ತಿಲ್ಲ. ಇದರಿಂದ ಅನೇಕ ತಲೆಮಾರುಗಳಿಂದ ಸಂರಕ್ಷಣೆ ಮಾಡಿಕೊಂಡು ಬಂದಿದ್ದ ನಗರದ ಪ್ರಮುಖ ಜಲಮೂಲ ಕಲುಷಿತಗೊಳ್ಳುತ್ತಿದ್ದು ಬಳಕೆಗೆ ಯೋಗ್ಯವಲ್ಲ ಎನ್ನುವಂತಹ ದುಸ್ಥಿತಿ ತಲುಪಿದೆ.
