ಮಾಹಿತಿ ಆತಂಕ: ಪೌರತ್ವ ತಿದ್ದುಪಡಿ ವಿಧೇಯಕವನ್ನು ಕೇಂದ್ರ ಸರ್ಕಾರ ಜಾರಿ ಮಾಡಿದ ಬಳಿಕ ಕರ್ನಾಟಕವೊಂದರಲ್ಲೇ 900 ಸಂಖ್ಯೆಯಲ್ಲಿ ಚಿಕ್ಕಪುಟ್ಟ ಸಭೆಗಳು ನಡೆದಿವೆ. ಯಾವುದೇ ಕಾರಣಕ್ಕೂ ಸರ್ಕಾರಕ್ಕೆ ಸಹಕಾರ ನೀಡವಾರದೆಂದು ಭಾಷಣಕಾರರು ತಲೆಗೆ ತುಂಬಿ ಹೋಗಿದ್ದಾರೆ. ರಾಷ್ಟ್ರೀಯ ಗಣತಿ ನಡೆಸುವ ಘೋಷಣೆಯಾಗಿದ್ದು, ಈ ವೇಳೆ ಮಾಹಿತಿ ನೀಡಿದ್ದೇ ಆದರೆ ಅಪಾಯವಾಗಬಹುದು ಎಂದು ಒತ್ತಿ ಒತ್ತಿ ಹೇಳಿದ್ದೂ ಇದೆ. ಇನ್ನು ಕರೊನಾ ಬಗ್ಗೆ ಸರ್ಕಾರ ಹೆಚ್ಚು ಒತ್ತು ಕೊಡುವುದು ಮತ್ತು ಸಾಮಾಜಿಕ ಅಂತರ ಕಾಯ್ದುಕೊಳ್ಳುವಂತೆ ಸೂಚಿಸುವುದು, ಸಾಮೂಹಿಕ ಪ್ರಾರ್ಥನೆಗೆ ಅವಕಾಶ ಕೊಡದೇ ಇರುವುದೂ ಸಹ ತಮ್ಮ ಸಮುದಾಯವನ್ನು ಒಡೆಯಲು ಮಾಡಿರುವ ತಂತ್ರವೆಂದೂ ಅಪಪ್ರಚಾರವೂ ಜಾಲತಾಣದಲ್ಲಿ ವ್ಯವಸ್ಥಿತವಾಗಿ ನಡೆದಿದೆ. ಇದೆಲ್ಲ ಕಾರಣದಿಂದ ಕರೊನಾ ಜಾಗೃತಿ ಮತ್ತು ಲಾಕ್ ಡೌನ್ ಶೇ.100 ಯಶಸ್ವಿಯಾಗದಿರಲು ಕಾರಣ ಎಂದು ಅಧಿಕಾರಿಗಳು ಅಂದಾಜಿಸಿದ್ದಾರೆ. ಸರ್ಕಾರದ ನೌಕರ, ಅಧಿಕಾರಿಗಳು ಯಾವುದೇ ರೂಪದಲ್ಲಿ ಮಾಹಿತಿ ಸಂಗ್ರಹಿಸಲು ಮನೆಗಳಿಗೆ ಬರಬಹುದು, ಅವರನ್ನು ವಾಪಾಸು ಕಳಿಸಬೇಕೆಂದು ಪೌರತ್ವ ಸಭೆಯ ಭಾಷಣಕಾರರು ಹೇಳಿದ್ದರಿಂದಾಗಿಯೇ ಈಗ ಆರೋಗ್ಯ ಇಲಾಖೆ ಸಿಬ್ಬಂದಿ, ಆಶಾ ಕಾರ್ಯಕರ್ತೆಯರಿಗೆ ಹಿನ್ನೆಡೆಯಾಗುತ್ತಿದೆ ಎಂಬ ವಿಶ್ಲೇಷಣೆಯೂ ಸರ್ಕಾರದ ಮಟ್ಟದಲ್ಲಿ ಕೇಳಿಬಂದಿದೆ. ಬುಧವಾರ ಬೆಂಗಳೂರಿನಲ್ಲಿ ನಡೆದ ಪ್ರಕರಣದಲ್ಲೂ ಸಹ ಆಶಾ ಕಾರ್ಯಕರ್ತೆಯರು ಕರೊನಾ ಸೋಂಕಿತರಿಗಾಗಿ ಮಾಹಿತಿ ಕಲೆ ಹಾಕುವುದನ್ನು ತಪ್ಪಾಗಿ ಅರ್ಥೈಸಿಕೊಂಡ ಆ ಸಮುದಾಯದವರು ಮಸೀದಿಯಿಂದಲೂ ಮಾಹಿತಿ ಕೊಡದಂತೆ ಫರ್ವನು ಹೊರಡಿಸಿದ್ದು ಸರ್ಕಾರದ ಗಮನಕ್ಕೆ ಬಂದಿದೆ. ಒಟ್ಟಾರೆ, ಪೌರತ್ವ ತಿದ್ದುಪಡಿ ಹೋರಾಟ ಕರೊನಾ ಜಾಗೃತಿಗೆ ಅಡ್ಡಿಯಾಗುತ್ತಿದೆ ಎಂದು ಪೊಲೀಸ್ ಸಿಬ್ಬಂದಿ ತಿಳಿಸಿದ್ದಾರೆ.
