ಚಿಂತಾಮಣಿ: ತಾಲೂಕಿನ ಬುರುಡಗುಂಟೆ&ಕೋನೇಪಲ್ಲಿ ಮಧ್ಯೆ ಭಾನುವಾರ ರಾತ್ರಿ ಬರುತ್ತಿದ್ದ ಟೆಂಪೋ ಚಾಲಕನನ್ನು ತಡೆದ ನಾಲ್ವರು ಖದೀಮರು, ಹಣ ನೀಡುವಂತೆ ಬೆದರಿಕೆ ಹಾಕಿ, ಹಲ್ಲೆ ಮಾಡಿದ್ದಾರೆ. ಗಾಯಗೊಂಡಿದ್ದ ಕೋನೇಪಲ್ಲಿಯ ರಾವೇಂದ್ರ ಚಿಂತಾಮಣಿ ಸಾರ್ವಜನಿಕ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದು, ಈ ಬಗ್ಗೆ ಕೆಂಚಾರ್ಲಹಳ್ಳಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಬುರುಡುಗುಂಟೆಯ ಗೌತಮ್ ಮತ್ತು ಅಪರಿಚಿತ ಮೂವರು ಕಾರಿನಲ್ಲಿ ಬಂದು ಟೆಂಪೋವನ್ನು ಅಡ್ಡಗಟ್ಟಿ ಹಣ ಕೊಡುವಂತೆ ಕೇಳಿದರು. ಹಣ ಕೊಡದ್ದಕ್ಕೆ ಕೆರಳಿ ದೊಣ್ಣೆಗಳಿಂದ ಹಲ್ಲೆ ಮಾಡಿದರು, ಮಾಮೂಲಿ 2000 ರೂ. ಕೊಡಬೇಕು, ಇಲ್ಲವೆಂದರೆ ಸಾಯಿಸಿಬಿಡುತ್ತೇವೆ ಎಂದು ಬೆದರಿಕೆ ಹಾಕಿದರು. ಅಷ್ಟರಲ್ಲಿ ಬೈಕ್ನಲ್ಲಿ ಬಂದವರು ಗಲಾಟೆ ಬಿಡಿಸಿ ಗಾಯಗೊಂಡಿದ್ದ ತನ್ನನ್ನು ಆಸ್ಪತ್ರೆಗೆ ದಾಖಲು ಮಾಡಿದರು ಎಂದು ದೂರಿನಲ್ಲಿ ಉಲ್ಲೇಖಿಸಿದ್ದಾರೆ.
