ತಾಲೂಕಿನ ಹಲವು ಭಾಗಗಳಲ್ಲಿನ ರೈತರು ಕೊಳವೆ ಬಾವಿಯನ್ನು ನಂಬಿ ಕೃಷಿ ಮಾಡುತ್ತಾರೆ. ಅನೇಕ ಕೊಳವೆ ಬಾವಿಗಳು ಈ ಬಾರಿ ನೀರಿಲ್ಲದೆ ಬರಿದಾಗಿವೆ. ಕಳೆದ 3-4 ವರ್ಷಗಳ ಕಾಲ ಜಿಲ್ಲೆಯಲ್ಲಿ ಮಾರ್ಚ್ವರೆಗೂ ಮಳೆಯಾಗಿದೆ. ನಂತರದಲ್ಲಿ ಆಗಾಗ ಮಳೆಯಾಗಿ ಭೂಮಿ ತೇವವಾಗಿ ಇರುತ್ತಿತ್ತು. ಆದರೆ, ಈ ಬಾರಿ ದೀಪಾವಳಿ ವೇಳೆಯಲ್ಲಿಯೇ ಮಳೆ ಕೈ ಕೊಟ್ಟಿದ್ದರಿಂದ ನೀರಿನ ಬರ ಎಲ್ಲೆಡೆ ಕಾಡುತ್ತಿದೆ. ಹೊನ್ನಾವರ ತಾಲೂಕಿನ ಚಿಕ್ಕನಕೋಡ, ಹಿರೇಬೈಲ, ಗೇರುಸೊಪ್ಪ, ಚಂದಾವರ, ಹೊದ್ಕೆ, ಶಿರೂರು, ಮಂಕಿ, ಮಾಗೋಡ ಸೇರಿ ಹಲವು ಗ್ರಾಮಗಳಲ್ಲಿ ಕೊಳವೆ ಬಾವಿಗಳಲ್ಲಿ ನೀರಿನ ಪ್ರಮಾಣ ಕಡಿಮೆಯಾಗಿದೆ. ಇದರಿಂದಾಗಿ ತಮ್ಮ ಭೂಮಿಗೆ ನೀರುಣಿಸಲು ರೈತರು ಪರದಾಡುತ್ತಿದ್ದಾರೆ.
