ಹದಗೆಟ್ಟ ತಾರೆಮಾರ್-ಮಳಲಿ ರಸ್ತೆ : ಗಂಜಿಮಠ ಪಂಚಾಯಿತಿಯಲ್ಲಿ ದುರಸ್ತಿಗೆ ಹಣವಿಲ್ಲ ಸರ್ಕಾರದಿಂದ ಅನುದಾನ ನಿರೀಕ್ಷೆ

ಧನಂಜಯ ಗುರುಪುರ

ಗಂಜಿಮಠ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ತಾರೆಮಾರ್-ಮಳಲಿ ಒಳರಸ್ತೆ ಸಂಪೂರ್ಣ ಹದಗೆಟ್ಟಿದ್ದು, ಹೊಂಡಗುಂಡಿಗಳಿಂದ ವಾಹನ ಸಂಚಾರ ಸಂಚಕಾರವೆನಿಸಿದೆ. ಈ ಬಾರಿಯಾದರೂ ರಸ್ತೆ ದುರಸ್ತಿಯೊಂದಿಗೆ ಡಾಂಬರು ಹಾಕುವಂತೆ ಸಾರ್ವಜನಿಕರು ಆಗ್ರಹಿಸಿದ್ದಾರೆ.

ಮುತ್ತೂರು-ಗಂಜಿಮಠ ಮುಖ್ಯ ರಸ್ತೆಯ ತಾರೆಮಾರ್‌ನಿಂದ ಮಳಲಿ ಸಂಪರ್ಕಿಸುವ ಅಂದಾಜು 4 ಕಿ.ಮೀ. ರಸ್ತೆಗೆ ವರ್ಷಗಳ ಹಿಂದೆ ಹಾಕಲಾಗಿದ್ದ ಡಾಂಬರು, ಜಲ್ಲಿ ಕಿತ್ತು ಹೋಗಿ ಬೃಹತ್ ಗುಂಡಿಗಳು ಸೃಷ್ಟಿಯಾಗಿವೆ. ಈ ರಸ್ತೆ ಮೂಲಕ ಮುಂದೆ ಸಾಗಬೇಕಿದ್ದರೆ ವಾಹನ ಸವಾರರು ಸರ್ಕಸ್ ಮಾಡಬೇಕಿದ್ದು, ಕೆಲವರು ಕೈಕಾಲಿಗೆ ಗಾಯ ಮಾಡಿಕೊಂಡಿದ್ದಾರೆ. ತಾರೆಮಾರ್, ಮೊಗರು ಮತ್ತು ನಾರಳ ಸುತ್ತಲ ಪ್ರದೇಶದ ಜನರಿಗೆ ಮಳಲಿ ಮೂಲಕ ಗಂಜಿಮಠ, ಗುರುಪುರ ಕೈಕಂಬ, ಪೊಳಲಿ ಮೂಲಕ ಬಿ.ಸಿ.ರೋಡ್‌ಗೆ ಸಂಚರಿಸಲು ಇರುವ ಏಕೈಕ ರಸ್ತೆ ಇದಾಗಿದೆ.

ಮಳೆಗಾಲದಲ್ಲಿ ಗುಂಡಿಗಳೇ ತುಂಬಿರುವ ರಸ್ತೆಯಲ್ಲಿ ಕೆಸರು ನೀರಿಂದ ಕೆರೆಯಂತೆ ಕಾಣುತ್ತದೆ. ವಾಹನ ಸವಾರಿ ಸವಾಲಿನ ಕೆಲಸವಾಗಿದೆ. ಗುಂಡಿಗಳ ಆಳ ಅರಿವಿಲ್ಲದೆ ಮುಂದೆ ಸಾಗುವ ದ್ವಿಚಕ್ರ ವಾಹನ ಸವಾರರು ಗಾಯಗೊಂಡಿದ್ದಾರೆ ಎಂದು ಸ್ಥಳೀಯ ಪ್ರತ್ಯಕ್ಷದರ್ಶಿಗಳು ಹೇಳಿದ್ದಾರೆ.

ಕುಪ್ಪೆಪದವು, ಮೂಲರಪಟ್ಣ, ಮುತ್ತೂರು, ಇರುವೈಲು ಭಾಗದ ಜನರಿಗೆ ಪೊಳಲಿ ದೇವಳಕ್ಕೆ ತೆರಳಲು ಅತಿ ಹತ್ತಿರದ ಒಳರಸ್ತೆ ಇದಾಗಿದೆ. ಇಲ್ಲಿ ಪ್ರತಿದಿನ ನೂರಾರು ವಾಹನಗಳು ಸಂಚರಿಸುತ್ತವೆ. ಇನ್ನಾದರೂ ಈ ರಸ್ತೆ ದುರಸ್ತಿಗೆ ಸಂಬಂಧಪಟ್ಟ ಇಲಾಖೆ ಮುಂದಾಗಬೇಕು. ಇಲ್ಲವಾದಲ್ಲಿ ಅಪಘಾತಗಳಿಂದ ಸಾವು-ನೋವು ಸಂಭವಿಸಬಹುದು.

https://www.vijayavani.net/dakshina-kannada-district-arebhashe-culture-and-literary-association

https://www.vijayavani.net/belthangady-taluk-level-yoga-asana-competition