ಬಿಸಿಲಿನ ತಾಪ ಬೆಳೆಗೆ ಶಾಪ

ನಾಗರಾಜ ಕುಂಕೂರ ಕುಂದಗೋಳ
ಕಳೆದ ಮೂರ್ನಾಲ್ಕು ವರ್ಷಗಳಿಂದ ಅತಿವೃಷ್ಟಿ ಹಾಗೂ ಅನಾವೃಷ್ಟಿಯಿಂದ ರೈತರು ತತ್ತರಿಸಿದ್ದಾರೆ. ಈ ವರ್ಷ ಜುಲೈ ಮೊದಲ ವಾರ ಸುರಿದ ಮಳೆ ನಂತರ ಕೈಕೊಟ್ಟಿದ್ದು ಅನ್ನದಾತರು ಆಕಾಶದತ್ತ ಚಿತ್ತ ನೆಟ್ಟಿದ್ದಾರೆ.

ಈ ಬಾರಿ ಮುಂಗಾರು ಮಳೆ ಜುಲೈನಲ್ಲಿ ಆರಂಭವಾಗಿದ್ದು, ರೈತರು ಸಾಲಸೋಲ ಮಾಡಿ ಬೀಜ, ಗೊಬ್ಬರ ಖರೀದಿಸಿ ಬಿತ್ತನೆ ಮಾಡಿದ್ದರು. ಆದರೆ, ಆಗಸ್ಟ್​ನಲ್ಲಿ ಆಕಾಶದಲ್ಲಿ ಮೋಡಗಳು ತೇಲುತ್ತಿವೆಯೇ ವಿನಃ ಮಳೆ ಸುರಿಯುತ್ತಿಲ್ಲ. ಇದರಿಂದ ಬೆಳೆಗಳು ಬಿಸಿಲಿನ ತಾಪಕ್ಕೆ ಜಮೀನಿನಲ್ಲೇ ಕಮರುವಂತಾಗಿದೆ.

ಈ ಬಾರಿ ತಾಲೂಕಿನಲ್ಲಿ 4,500 ಹೆಕ್ಟೇರ್ ಪ್ರದೇಶದಲ್ಲಿ ಮೆಣಸಿನಕಾಯಿ ಬೆಳೆ ಬೆಳೆದಿದ್ದು, ಬಿಟಿ ಹತ್ತಿ 10330 ಹೆಕ್ಟೇರ್ ಬಿತ್ತನೆ ಆಗಿದೆ. ಶೇಂಗಾ 9100 ಹೆಕ್ಟೇರ್ ಹಾಗೂ ಗೋವಿನಜೋಳ 7700 ಹೆಕ್ಟೇರ್ ಪ್ರದೇಶದಲ್ಲಿ ಬಿತ್ತನೆ ಆಗಿದೆ. ಆಗಸ್ಟ್​ನಲ್ಲಿ 73 ಮೀ.ಮೀ. ಮಳೆ ನಿರೀಕ್ಷೆ ಇತ್ತು. ಆದರೆ, 32 ಮೀ.ಮೀ. ಮಳೆ ಸುರಿದಿದೆ. ಸಂಶಿ ಹೋಬಳಿ ಭಾಗದಲ್ಲಿ 80.6 ಮೀ.ಮೀ. ಮಳೆ ನಿರೀಕ್ಷೆ ಇತ್ತು. ಆದರೆ, ಅಲ್ಲೂ 14.9 ಮೀ.ಮೀ. ಮಳೆಯಾಗಿ 65 ಮೀ.ಮೀ. ಮಳೆ ಕೊರತೆಯಾಗಿದೆ.

ಹರಸಾಹಸ: ಬೆಳೆ ಒಣಗುತ್ತಿರುವುದನ್ನು ಕಂಡ ರೈತರು ಮುಂದೆ ಮಳೆ ಆಗುತ್ತದೆ ಎಂಬ ಭರವಸೆಯಿಂದ ಕೆರೆ- ಕಟ್ಟೆಗಳಿಂದ ಟ್ಯಾಂಕರ್ ಮೂಲಕ ನೀರು ತಂದು ಬೆಳೆಗೆ ಸಿಂಪಡಣೆ ಮಾಡುತ್ತಿದ್ದಾನೆ. ಕೆಲವರು ಕೃಷಿ ಹೊಂಡದಲ್ಲಿರುವ ನೀರನ್ನು ಪಂಪ್​ಸೆಟ್ ಮೂಲಕ ಬೆಳೆಗೆ ಹರಿಸುತ್ತಿದ್ದಾರೆ.