ಚೈತ್ರ ಶುದ್ಧ ಚತುರ್ದಶಿ ಭಾನುವಾರ (ಏ. 25) ಅನಂಗ ಚತುರ್ದಶಿಯಿಂದ ಸುಗ್ಗಿ ಹಬ್ಬ ವಿಧ್ಯುಕ್ತವಾಗಿ ಪ್ರಾರಂಭವಾಗಬೇಕಿತ್ತು. ಒಂದು ವಾರ ಪರ್ಯಂತ ಹಾಲಕ್ಕಿ ಒಕ್ಕಲಿಗರ ವಿವಿಧ ತಂಡಗಳ ಸುಗ್ಗಿ ಕುಣಿತದಿಂದಾಗಿ ಈ ಭಾಗದಲ್ಲಿ ಗುಮಟೆ, ತಮಟೆ, ತಾಳ, ಕುಂಚ ಮತ್ತು ಸುಗ್ಗಿ ಮಕ್ಕಳ ಗೆಜ್ಜೆ ನಾದ ಎಲ್ಲೆಡೆ ಕೇಳಿ ಬರಬೇಕಿತ್ತು. ಆದರೆ, ಕರೊನಾ ವ್ಯಾಧಿಯಿಂದಾಗಿ ಸತತ ಎರಡನೆ ವರ್ಷ ಸುಗ್ಗಿ ಹಬ್ಬಕ್ಕೆ ಭಂಗ ಬಂದಿದೆ. ಉಳಿದೆಡೆಗಳಲ್ಲಿ ಹೋಳಿ ಮತ್ತು ಸುಗ್ಗಿ ಫಾಲ್ಗುಣದಲ್ಲಿ ಆಚರಿಸಲ್ಪಡುತ್ತದೆ. ಆದರೆ, ಗೋಕರ್ಣದ 12 ಹಾಲಕ್ಕಿ ಸೀಮೆಗಳಲ್ಲಿ ಮಾತ್ರ ಸುಗ್ಗಿ ಹಬ್ಬ ಪುರಾಣೋಕ್ತವಾದ ರೀತಿಯಲ್ಲಿ ಚೈತ್ರ ಶುದ್ಧದ ಅನಂಗ (ಕಾಮದೇವ) ಚತುರ್ದಶಿಯಂದು ಕಾಮ ದಹನದಿಂದ ಪ್ರಾರಂಭವಾಗಿ ಒಂದು ವಾರ ಕಾಲ ನಡೆಸಲ್ಪಡುತ್ತದೆ.
