ಚನ್ನಬಸಪ್ಪ ಇದುವರೆಗೆ ರಾಜ್ಯಾದ್ಯಂತ 200ಕ್ಕೂ ಹೆಚ್ಚು ಬಯಲಾಟ ಪ್ರದರ್ಶನಗಳಲ್ಲಿ ಮೃದಂಗ ವಾದನದ ಸಾಥ್ ನೀಡಿದ್ದಾರೆ. ಇದಲ್ಲದೆ, ಸಣ್ಣ ವಯಸ್ಸಿನಿಂದಲೂ ರಂಗಭೂಮಿ ಬಗೆಗೆ ಆಸಕ್ತಿ ಹೊಂದಿ ಬಯಲಾಟ ಪ್ರಯೋಗಗಳಲ್ಲಿ ಕರ್ಣ, ಅಭಿಮನ್ಯು, ಪ್ರಭಾವತಿ, ಚಿತ್ರಾಂಗದೆ, ಉತ್ತರೆ, ಗಣಪತಿ, ದುಷ್ಯಾಸನ ಹಾಗೂ ವಾಲಿ ಮುಂತಾದ ಪಾತ್ರಗಳಲ್ಲಿ ಅಭಿಯಿಸಿ ಸೈ ಎನಿಸಿಕೊಂಡಿದ್ದಾರೆ. ಹಿರಿಯ ಕಲಾವಿದರಾದ ಇವರು ತಮ್ಮ ಕೃಷಿ ವೃತ್ತಿಯೊಂದಿಗೆ ದೊಡ್ಡಾಟ, ಸಣ್ಣಾಟ ಮತ್ತು ಮೃದಂಗ ವಾದ್ಯ ನುಡಿಸುವುದನ್ನು ಪ್ರವೃತ್ತಿಯಾಗಿ ಅಳವಡಿಸಿಕೊಂಡಿದ್ದಾರೆ. ಮಾಸನಕಟ್ಟಿ ಗ್ರಾಮದ ದುರ್ಗಾದೇವಿ, ಬಸವೇಶ್ವರ, ಚಾಮುಂಡೇಶ್ವರಿ ಬಯಲಾಟ ತಂಡಗಳೊಂದಿಗೆ ರಾಜ್ಯದ ಮಂಗಳೂರು, ಬೆಂಗಳೂರು, ಉಡುಪಿ, ಮೂಡಬಿದರೆ, ಹಂಪಿ ಉತ್ಸವ, ಧಾರವಾಡದ ಕಲಾಕ್ಷೇತ್ರ, ಗದಗ ಕಮ್ಮಟ, ಶಿಗ್ಗಾಂವಿ ರಾಕ್ ಗಾರ್ಡನ್, ಜಾನಪದ ವಿಶ್ವ ವಿದ್ಯಾಲಯ, ಬಾಗಲಕೋಟೆ ಸೇರಿದಂತೆ ನೂರಾರು ಸ್ಥಳಗಳಲ್ಲಿ ಪ್ರದರ್ಶನ ನೀಡಿದ್ದಾರೆ.
