ಜಿಲ್ಲೆಯ 4 ಶಾಲೆ ಶೂನ್ಯ ಸಾಧನೆ

ತುಮಕೂರು: ಈ ಬಾರಿಯ ಎಸ್ಸೆಸ್ಸೆಲ್ಸಿಯಲ್ಲಿ ಮಧುಗಿರಿ ಶೈಕ್ಷಣಿಕ ಜಿಲ್ಲೆಯ ಎರಡು ಹಾಗೂ ತುಮಕೂರು ಶೈಕ್ಷಣಿಕ ಜಿಲ್ಲೆಯ 2 ಶಾಲೆಗಳು ಶೂನ್ಯ ಸಾಧನೆ ಮಾಡಿವೆ.

ಮಧುಗಿರಿ ಶೈಕ್ಷಣಿಕ ಜಿಲ್ಲೆಯ ಪಾವಗಡ ತಾಲೂಕಿನ ಕೇಲಾರ್ಲಹಳ್ಳಿ ರಾಷ್ಟ್ರಪ್ರಗತಿ ಹೈಸ್ಕೂಲ್, ಕೊರಟಗೆರೆ ತಾಲೂಕಿನ ಶ್ರೀ ವಿವೇಕಾನಂದ ರೂರಲ್ ಹೈಸ್ಕೂಲ್‌ಹಾಗೂ ತುಮಕೂರು ಶೈಕ್ಷಣಿಕ ಜಿಲ್ಲೆಯ ಕುಣಿಗಲ್ ತಾಲೂಕಿನ ಹುಲಿಯೂರು ದುರ್ಗದ ಕೆಂಪೇಗೌಡ ಪ್ರೌಢಶಾಲೆ, ಭಾರತೀಯ ರೆಡ್‌ಕ್ರಾಸ್‌ನ ಕಿವುಡ ಮತ್ತು ಮೂಗರ ಶಾಲೆ ಶೂನ್ಯ ಸಾಧನೆ ಮಾಡಿ ಅನಪೇಕ್ಷಿತ ದಾಖಲೆ ಬರೆದಿವೆ.

ಪಾತಾಳಕ್ಕೆ ಕುಸಿದ ಮಧುಗಿರಿ: ಕಳೆದ ಬಾರಿ ಶೇ.93.23ರಷ್ಟು ಫಲಿತಾಂಶ ಪಡೆದು 9ನೇ ಸ್ಥಾನಗಳಿಸಿದ್ದ ಮಧುಗಿರಿ ಶೈಕ್ಷಣಿಕ ಜಿಲ್ಲೆಯು ಶೇ. 62.44 ಫಲಿತಾಂಶಗಳಿಸಿ 30ನೇ ಸ್ಥಾನಕ್ಕೆ ಕುಸಿದಿದೆ. ಒಟ್ಟಾರೆ ಫಲಿತಾಂಶ ಶೇ.30.79ರಷ್ಟು ಕಡಿಮೆ ಆಗಿದೆ. ಇನ್ನೂ ತುಮಕೂರು ಶೈಕ್ಷಣಿಕ ಜಿಲ್ಲೆ 20ನೇ ಸ್ಥಾನದಿಂದ 16ನೇ ಸ್ಥಾನಕ್ಕೇ ಜಿಗಿದಿದೆಯಾದರು ಸರಾಸರಿ ಫಲಿತಾಂಶದಲ್ಲಿ ಶೇ.14.27ರಷ್ಟು ಕುಸಿದಿರುವುದು ಶೈಕ್ಷಣಿಕ ವಲಯದಲ್ಲಿ ಚರ್ಚೆಗೆ ಗ್ರಾಸ ಒದಗಿಸಿದೆ.

ಪರೀಕ್ಷಾ ಕೇಂದ್ರಗಳಲ್ಲಿ ವೆಬ್ ಕ್ಯಾಸ್ಟಿಂಗ್ ಅಳವಡಿಸಿದ ಪರಿಣಾಮ ಫಲಿತಾಂಶದ ಮೇಲೆ ನೇರವಾಗಿ ಬಿದ್ದಿದೆ. ಸಾಮೂಹಿಕ ನಕಲು ಮಾಡಲು ಅವಕಾಶವಾಗದೆ ಇರುವುದು ಫಲಿತಾಂಶದಿಂದ ಸ್ಪಷ್ಟವಾಗಿದೆ.