ವಿಜೃಂಭಿಸಿದ ಹುಲಿ ವಾಹನ ಉತ್ಸವ: 2ನೇ ದಿನದ ಜಾತ್ರೆಯಲ್ಲಿ ಹುಲಿವಾಹನ ಉತ್ಸವ ವಿಜೃಂಭಣೆಯಿಂದ ನೆರವೇರಿತು. 5 ದಿನ ಜಾತ್ರೆಯಲ್ಲಿ ಸೋಮವಾರ ಕೃಷಿ ಸಮದ್ಧಿಯ ಆಚರಣೆಯಾದ ಚಂದ್ರಮಂಡಲ ಉತ್ಸವ ನಡೆಯಿತು. ಮಾರನೆ ದಿನ ಮಂಗಳವಾರ ರಾತ್ರಿ 9 ಗಂಟೆ ಬಳಿಕ ಹುಲಿವಾಹನ ಉತ್ಸವಕ್ಕೆ ಸಹಸ್ರಾರು ಭಕ್ತರು ಸಾಕ್ಷಿಯಾದರು. ಶ್ರೀ ಸಿದ್ದಪ್ಪಾಜಿ ಗದ್ದುಗೆ ದರ್ಶನ ಪಡೆದು ಪೂಜಾ ಕೈಂಕರ್ಯಗಳನ್ನು ನಡೆಸಿದರು. ತಿ.ನರಸೀಪುರ ಮೂಲದ ಎಸ್.ಮೇಗಡಹಳ್ಳಿ ಗ್ರಾಮಸ್ಥರು ಹಿಂದಿನಿಂದಲೂ ಸಾಂಪ್ರದಾಯಿಕವಾಗಿ ಹುಲಿವಾಹನದ ಉತ್ಸವದ ಪಲ್ಲಕ್ಕಿಯನ್ನು ವಿವಿಧ ಹೂಗಳಿಂದ ಅಲಂಕೃತಗೊಳಿಸಿ ಸಿದ್ಧಪಡಿಸುತ್ತಾರೆ. ಅದರಂತೆ, ಈ ಬಾರಿಯು ಪದ್ಧತಿಯಂತೆ ಪಲ್ಲಕ್ಕಿಯನ್ನು ಸಿದ್ಧಗೊಳಿಸಿದರು. ರಾಜ ಬೊಪ್ಪೇಗೌಡನಪುರದ ಪೀಠಾಧಿಪತಿ ಶ್ರೀ ಜ್ಞಾನಾನಂದ ರಾಜೇಅರಸ್ ಅವರು ಸಿದ್ದಪ್ಪಾಜಿ ಗದ್ದುಗೆಗೆ ಆಗಮಿಸಿ ಪೂಜೆ ಸಲ್ಲಿಸಿದ ಬಳಿಕ ಬೆಳ್ಳಿಯ ಲಿಂಗ ಸಮೇತ ನಾಗಾಭರಣವನ್ನು ಹುಲಿವಾಹನ ಉತ್ಸವಕ್ಕೆ ಪ್ರತಿಷ್ಠಾಪನೆ ಮಾಡಲಾಯಿತು. ಆನಂತರ, ಸ್ವಾಮೀಜಿ ಅವರು ಹುಲಿ ವಾಹನ ಉತ್ಸವಕ್ಕೆ ಪೂಜೆ ಸಲ್ಲಿಸಿ ಉತ್ಸವಕ್ಕೆ ಚಾಲನೆ ನೀಡಿ ದೇವಾಲಯ ಪ್ರದಕ್ಷಿಣೆ ಹಾಕಿದರು. ನೀಲಗಾರರ ಜಾಗಟೆ, ಡೊಳ್ಳು, ತಮಟೆ, ಕಂಸಾಳೆ ಸದ್ದಿನಲ್ಲಿ ಕುರುಬನಕಟ್ಟೆಯ ಚೆನ್ನಯ್ಯ-ಲಿಂಗಯ್ಯ ಕಂಡಾಯಗಳು, ಸತ್ತಿಗೆ, ಸೂರಾಪಾನಿ, ಛತ್ರಿ, ಚಾಮರ ಉತ್ಸವಕ್ಕೆ ಮೆರುಗು ನೀಡಿತು.
