ಅಪಘಾತದಲ್ಲಿ ಮಗ ಸಾವು, ತಂದೆ ಗಂಭೀರ

ಮಾಗಡಿ: ತಂದೆಯೊಂದಿಗೆ ದ್ವಿಚಕ್ರವಾಹನದಲ್ಲಿ ದೇವಸ್ಥಾನಕ್ಕೆ ತೆರಳುತ್ತಿದ್ದ ಬಾಲಕ ಸರಕು ಸಾಗಣೆ ವಾಹನ ಡಿಕ್ಕಿಯಾಗಿ ಮೃತಪಟ್ಟಿದ್ದು, ಬಾಲಕನ ತಂದೆಯೂ ಗಂಭೀರ ಗಾಯಗೊಂಡಿದ್ದಾರೆ.

ಕುಣಿಗಲ್​ ತಾಲೂಕಿನ ನಾಗನಹಳ್ಳಿಯ ಹರ್ಷಿತ್​(13) ಮೃತ ಬಾಲಕ. ಹರ್ಷಿತ್​ ತಂದೆ ನಾಗೇಶ್​ ಗಂಭೀರ ಗಾಯಗೊಂಡವರು. ಇಬ್ಬರೂ ಬೈಕ್​ನಲ್ಲಿ ಕರಲಹಳ್ಳಿ ಶ್ರೀಬಸವೇಶ್ವರ ದೇವಾಲಯಕ್ಕೆ ತೆರಳುತ್ತಿದ್ದರು. ಮಾರ್ಗ ಮಧ್ಯೆ ಕೋಂಡಹಳ್ಳಿ ಗೇಟ್​ ಬಳಿ ಮಾಗಡಿ ಕಡೆಯಿಂದ ಬಂದ ಬೊಲೆರೋ ಡಿಕ್ಕಿಹೊಡೆದಿದೆ ಎನ್ನಲಾಗಿದ್ದು, ಡಿಕ್ಕಿ ರಭಸಕ್ಕೆ ಹರ್ಷಿತ್​ ಹಾಗೂ ನಾಗೇಶ್​ ಗಂಭೀರ ಗಾಯಗೊಂಡಿದ್ದರು. ಸ್ಥಳಿಯರು ಗಾಯಾಳುಗಳನ್ನು ಮಾಗಡಿ ತಾಲೂಕು ಆಸ್ಪತ್ರೆಗೆ ದಾಖಲಿಸಿದ್ದರಾದರೂ ಚಿಕಿತ್ಸೆಗೆ ಸ್ಪಂದಿಸದ ಹರ್ಷಿತ್​ ಕೊನೆಯುಸಿರೆಳೆದಿದ್ದಾನೆ. ನಾಗೇಶ್​ ಅವರನ್ನು ಹೆಚ್ಚಿನ ಚಿಕಿತ್ಸೆಗಾಗಿ ಬೆಂಗಳೂರು ಆಸ್ಪತ್ರೆಗೆ ರವಾನಿಸಲಾಗಿದೆ.

ತಾಲೂಕಿನ ಆಗಲಕೋಟೆ ಹ್ಯಾಂಡ್​ ಪೋಸ್ಟ್​ನ ಸಿಎನ್​ಎಸ್​ ಮಾಡೆಲ್​ ಶಾಲೆಯಲ್ಲಿ ಹರ್ಷಿತ್​ 8ನೇ ತರಗತಿಯಲ್ಲಿ ವ್ಯಾಸಂಗ ಮಾಡುತ್ತಿದ್ದ. ಮಾಗಡಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.