ಆದರೆ, ಪೊಲೀಸರು ಆರೋಪಿಗಳನ್ನು ರಕ್ಷಿಸುವ ಕಾರ್ಯ ಮಾಡುತ್ತಿದ್ದಾರೆ. ಘಟನೆ ನಡೆದು 15 ದಿನ ಕಳೆದರೂ ಆರೋಪಿಗಳನ್ನು ಬಂಧಿಸಿಲ್ಲ. ಮೇ 25 ರಂದು ಶಿರಸಿ ಹೊಸ ಮಾಟುಕಟ್ಟೆ ಪೊಲೀಸರು ಮೃತರ ಪತ್ನಿ ಸಹನಾ, ಅವರ ತಾಯಿ ಗೀತಾ ರಾಯ್ಕರ್, ತಂದೆ ಜಗದೀಶ ರಾಯ್ಕರ್ ಅವರ ಹೇಳಿಕೆಯನ್ನು ವಿಡಿಯೋ ರೆಕಾರ್ಡ್ ಮಾಡಿಕೊಂಡು ಹೋದರು. ಆದರೆ, ಮರುದಿನ ಹೊಸ ಮಾರುಕಟ್ಟೆ ಠಾಣೆಯ ಪಿಎಸ್ಐ ರತ್ನಾ ಕುರಿ ಅವರು ಬೇರೆಯದೇ ಹೇಳಿಕೆಯೊಂದನ್ನು ಖಾಲಿ ಹಾಳೆಯ ಮೇಲೆ ಬರೆದು, ಸ್ವತಃ ಸಹಿ ಮಾಡಿದ್ದು, ಮೃತರ ಪತ್ನಿ, ಹಾಗೂ ಸಂಬಂಧಿಕರ ಬಳಿ ಸಹಿ ಪಡೆಯಲು ಬಂದಿದ್ದರು. `ಮೃತ ಪ್ರೀತಂ ಪಾಲನಕರ್ ಅವರನ್ನು ಯಾರೂ ಬೆದರಿಸಿಲ್ಲ. ತಮ್ಮ ಮಗಳ ಅನಾರೋಗ್ಯವನ್ನು ಮನಸ್ಸಿಗೆ ಹಚ್ಚಿಕೊಂಡು ಅವರು ಆತ್ಮಹತ್ಯೆಗೆ ಶರಣಾಗಿದ್ದಾರೆ' ಎಂದು ಅರ್ಥ ಬರುವ ಹೇಳಿಕೆಗೆ ಸಹನಾ ಹಾಗೂ ಇತರರ ಬಳಿ ಸಹಿ ಮಾಡಿಸುವ ಪ್ರಯತ್ನವನ್ನು ಪೊಲೀಸರು ನಡೆಸಿದರು. ಆದರೆ, ಸಹನಾ ಸಹಿ ಮಾಡಿಲ್ಲ.
ಪೊಲೀಸರ ಈ ವರ್ತನೆಯಿಂದ ಬೆರಗಾಗಿ ನಾನು ಎಸ್ಪಿ ಅವರಿಗೆ, ಪಶ್ಚಿಮ ವಲಯ ಐಜಿಪಿ, ಡಿಜಿಪಿ ಹಾಗೂ ಗೃಹ ಸಚಿವರಿಗೂ ದೂರು ನೀಡಿದ್ದು, ತನಿಖಾಧಿಕಾರಿ ಪಿಎಸ್ಐ ರತ್ನಾ ಕುರಿ ಅವರನ್ನು ಬದಲು ಮಾಡುವಂತೆ ಒತ್ತಾಯ ಮಾಡಿದ್ದೇನೆ. ತನಿಖಾಧಿಕಾರಿಯನ್ನು ಬದಲು ಮಾಡಿದ್ದು, ಬಿಟ್ಟು ಅವರ ಮೇಲೆ ಯಾವುದೇ ಕ್ರಮ ವಹಿಸಿಲ್ಲ ಎಂದು ಅಸಮಾಧಾನ ವ್ಯಕ್ತಪಡಿಸಿದರು. ಮೃತರ ಸಹೋದರ ಪವನ್ ಪ್ರಕಾಶ ಪಾಲನಕರ್ ಇದ್ದರು.
