ಜಾತಿ, ಮತ, ಭೇದವಿಲ್ಲದೆ ಸರ್ವ ಭಕ್ತರಿಗೂ ದೇಗುಲದ ಗರ್ಭಗುಡಿ ಪ್ರವೇಶಿಸಿ ಶಿವ ಮೂರ್ತಿ ಸ್ಪರ್ಶಿಸಿ, ಪೂಜಾ ಕೈಂಕರ್ಯಗಳಲ್ಲಿ ಭಾಗಿಯಾಗುವ ಅವಕಾಶವಿದೆ. ಆದರೆ ಇತ್ತೀಚೆಗೆ ದೇಗುಲದಲ್ಲಿ ದೈವಜ್ಞ ಶ್ರೀ ಬೇಳ ಪದ್ಮನಾಭ ಶರ್ಮ ಇರಿಂಜಾಲಕ್ಕುಡ ಅವರ ನೇತೃತ್ವದಲ್ಲಿ ನಡೆದ ಅಷ್ಟಮಂಗಲ ಪ್ರಶ್ನಾ ಚಿಂತನೆಯಂತೆ ಮಹಾಶಿವರಾತ್ರಿ ದಿನದಂದು ಗರ್ಭಗುಡಿ ಪ್ರವೇಶಿಸಿ ಶಿವಲಿಂಗ ಮುಟ್ಟಿ ಪೂಜೆ ಮಾಡುವ ಭಕ್ತರು ದೇಗುಲದ ಪುಷ್ಕರಿಣಿಯಲ್ಲಿ ತೀರ್ಥಸ್ನಾನ ಮಾಡಿ, ಮಡಿ ಬಟ್ಟೆ ಧರಿಸಿ ಶಿವಲಿಂಗ ಮುಟ್ಟಿ ಪೂಜೆ ಮಾಡಬೇಕೆಂದು ಕಂಡು ಬಂದಿರುವುದರಿಂದ ಈ ಬಾರಿ ಶಿವರಾತ್ರಿ ದಿನದಂದು ಮುಟ್ಟಿ ಪೂಜೆಯಲ್ಲಿ ಕೊಂಚ ಬದಲಾವಣೆ ಮಾಡಲಾಗಿತ್ತು. ಒಂದು ಸಾವಿರ ವರ್ಷಕ್ಕೂ ಹೆಚ್ಚಿನ ಇತಿಹಾಸ ಹೊಂದಿರುವ 10ನೇ ಶತಮಾನದಲ್ಲಿ ನಿರ್ಮಿಸಲಾದ ಗೋಕರ್ಣ ಹೊರತುಪಡಿಸಿದರೆ ಭಕ್ತರು ಶಿವಲಿಂಗ ಮುಟ್ಟಿ ಪೂಜೆ ಮಾಡುವ ರಾಜ್ಯದ ಎರಡನೇ ದೇವಾಲಯ ಇದಾಗಿದೆ.
